BEISEI BO | NEWS AND FACTS

MUTTHLUK THEOLOGY

2009-08-31T21:46:00.000-07:00

by Samuel C. Zaithankhuma, Tahan

Vawi khat chu Rev. Lalsawma’n bawp khawkherh theology tih Didakhe chanchinbuah a lo ziak tawh a, a qha hle. Pathian biaa biak ina kan pun khawm hian biak ina chhawm luh hi kan nei ta nual mai. Hmuam chi te, chhiar chi te, zuk chi te, ei chite kan paipawn mai bakah keimahni taksa ngei hi kan awm dan phung ni lova a awm a ching fo qhin. Rev. Lalsawma’n bawp khawkherh theology a ziakah khan biak ina Pathian biaa kan qhut hian a tam zawk deuh thaw hian bawp kan khawkherh thu a sawi a. Chu chuan Pathian kan zah lohna leh Amah kan biak danah pawh kan pawlawhzia min hriattir a. Tun qumah pawh hian biak ina Pathian biaa kan inkhawm laia (a bik takin sermon lai) kan mutthluk nasatzia leh chu chuan thuhriltu mai bakah Amah Pathian kan zah lohna a tihlan theih dante kan chhui dawn a. “A tlak tlak vanduai” kan ti mai a ni ang chu!

Kan damchhung hmun thuma qhena hmun hnih hi mut nan kan hmang a. Mut kan mamawh dan erawh kum azirin a danglam. Nausen hian ni khat (darkar 24)-ah darkar 20 lai mut an mamawh laiin kum 12 chinah chuan darkar 10 vel mut an mamawh leh a. Puitling tan chuan darkar 6/7 vel hi a tawk hle niin mi thiamte chuan an chhut a.

Pathian biak hi Pathianin mihring a siam chhan tihpuitlinna pakhat a nih avangin a pawimawh em em a. Biak ina kan inkhawm dan style hi kohhran hrang hrangah a danglam deuh vek a. Heng Catholic, Anglican, Methodist, etc., hi an thuhmun deuh a. A urhsun zawnga Pathian be chi an ni. Revival lam uara charismatic lam tuipuitute ve thung chuan taksa che zawng leh tawnhriat an dah pawimawh thung.

Kan sawi tum tak chu Pathian kan biak duh dan style chu danglam mah se, pathian bia kan nih tlat avangin ‘takna” chu a awm ngei tur a ni. Biak ina Pathian be tura kan lo kal hian Pathian leh kan inkar tibuai thei, Amah kan biakna tipawnlanga tiho theite zingah mutthluk hi sawi hmaih chi a ni lo.

Biak ina kan mutthluk chhan sawi tur tam tak a awm thei ang. Pakhatnaah chuan “Pathian biaa inngaih tak tak lohna” kan nei a ni mai thei. Mihring hian hmuh theih loh aiin hmuh theih hi kan qih (hlau) zawk a ni thei ang em? Khawvel lalte chu be ta ila mutthluk chu sawi loh pawlawh tak pawhin kan qhu ngam dawn em ni?

Pahnihnaah chuan thuhriltu kan ngaihsan loh vang pawh a ni thei ang. Mite rilru hip zawnga thu sawi thiam thlawt loten thu an sawi qum chuan mutthluk mai chu a sam viau a ni.

Kan mutthluk chhan pathumna ni theia lang chu “ngaiah” kan neih tawh vang a ni. Inkhawmnaa muthlu thinte hi chik takin lo zir ta ila, mutthluk ching bawk kha an muthlu leh nge nge thin.

Pathian faka kan zai lai chuan kan tui a, miten min hmu lo palh ang ti ni awm takin ban kan phar a, lam tualah kan vir mup mup mai a, a lawmawm hle. Mahse, Pathian thuhriltu a lo ding a, Bible a chhiar tan chauh tihah kan muthlu leh nghal si. A mak ngawt mai.
A chhan palina nia lang chu kan taksa a chauh vang a ni thei. Krismas leh Kumthar lai te, chhiatni thatni a lo awm qumahte chuan zan dang aiin kan mu tlai deuh thin a. Mut kham lo na na na chu mutthluk palh chu a harsa lo hle ang. Kan taksa a chauh avanga kan muthlu hi chu Amah Pathian pawh hian min hrethiam ta ve ang. Mantira a awm dawn zanah pawh khan a zirtirte chuan an lo muthilhsan zel a nih kha!

Amaherawhchu, puitling kan nih a, zana darkar 6/7 kan muthilh bawk a, Pathian biak inkhawmnaa kan la muthlu leh ziah a nih chuan taksa chauh vang (mut kham loh vang)-a muthlu chu kan nih hmel loh a ni.

Kan sawi tak kan mutthluk chhan hmasa pathum: Pathian biaa ingnaih tak tak lohva, thuhriltu kan ngaihsan loh vang, leh “ngaia neihna” avanga muthlu kan nih avangin kan inenfiah a tul hle awm e.

Kan mutthluk hian mahni khum laizawla thin thi diaia kan muhil qhinte ai chuan kan muhil chiang lo deuh a ang a. Chu pawh chu lo ni se, kan chhia leh tha hriatna erawh chu kan hloh tho niin a lang.

Mizo-te kan inenfiahna tur pakhat chu kan biak in chhung nun dan hi a ni ve ngei ang. Biak ina kan inkhawm chhung na na na chu ‘uluk’ tak leh ‘takna’ neia Pathian kan biak avan qha em! Bula mi biak sur sur te, tawngtai laia khaini (sahdah) lo hmuam zauh te, bawp khawkherha thut te, pawn lama rilru pek daih te, lehkha lo chhiar daih te, mutthluk, etc, te hi sim thei hram ila. Hmasawnna rahbi tharah kan chuangkai a lo ni ang.
A reng thuah mut hrim hrim hi taksain mamawh bawk mahse mut tam lutuk hian nghawng tha lo a hring thei a. Boston State Hospital-a Sleep Laboratory-in mipa thahnem tak chanchin an zir chianna atanga a lan danah chuan ni tin darkar 9 leh a aia rei mu thinte chu:

(1) Enghelh an ngah bik
(2) An nun a nguai
(3) Hriselna thuah insawiselna neuh neuh an ngah bik a, Darkar 6 mute chu:
(1) An harh vang a
(2) Tum ruhna leh tum fel tak an nei
(3) Khawtlang tana mi qangkai an ni
(4) Lungawina an hmu tam niin an zir chhuak tlat mai.

Bible pawh hian mutthluk chu sawi loh a hun lova mut hi retheihna a nihzia min hrilh. “I duh chuan mu hlek la, chhing hlek rawh, kut kuangkuahin chawl hlek teh, i mut hlanin i rethei hman ang a, thlakchhamnain sipai angin a rawn nang thut ang che” (Thufingte 6:10-11) a lo ti a ni.

Biak ina Pathian kan biak laia kan muthlu qhin pawh hi a hun lova mut hlek ang chiah a ni a. Thlarau lamah kan pachhe ve ngei dawn a ni. Thlarau lama chak lohna hi thil pawi tak a ni a, taksa, rilru thlengin a qha lo zawngin nghawng a nei qhin. Pathian hmaa kan thiltihte kan puan hunah Pathianin min lo mutthluksan ve loh nan inkhawm laia mutthluk hi sim i tum qheuh ang u.

KAN PI LEH PUTE

2009-08-22T06:13:00.000-07:00

By Rengpuia [The Rengs, Singapore]

Falama kan awm laiin thal sikul chawlh hian Tahanah kan zin thin a. Kan chhungkaw inkhai bawr laih min hmuh veleh ka piin, ‘Mapuia te an lo haw e’, a ti thin. ‘An lo zin’, a ti lo. ’87 kumah Tahanah kan pem a. ’89 khan pawimawh tiin Falamah ka zu zin leh a. Falama ka piin, ‘ I u Tea a lo haw e’, tiin ka pu te-a fate a au khawm a. Kha ta ka pi lawm zia kha!

Ka pite hian enga ti nge ‘zin’ ti lova ‘haw’ an hman tlat le! Tawngkam hmanna dik an hriat chian loh vang chu a nih ka ring lo. An tupa hi an thinlungah eng tik lai paw’n ka awm reng a. Hmun dang ram dangah kan va pem daih a, hun rei tak kan va awm hnu paw’n anni chuan zin chhuak rei min ti mai a. Eng tikah emaw an hnena let leh tur nia ngaiin min thlir reng a. Chu rilru atang chuan, keini’n va zin zawk ang leka kan inngaih laiin, anni chuan ‘ Tea a lo haw e’, min ti ta thin a ni ngei ang.

Tahana ka pi leh pute kha ka pa lama ka pi leh pute an ni a. Ka pi chu Hualngo nu zet mai; ‘chhuk leh chho’ pawh ‘suk leh so’, ‘chhawhchhi’ pawh ‘sawhsi’ ti thin a ni a. Naupanga thukhawchang, a tawng hi kan nuih pui dar dar thin. Tuibur hi a zu reng a, a tui a hmuam bawk a. Ka pi leh tuibur rim hi thliar hran hleihtheih pawh a ni lo. Tuna ka han ngaihtuah pawh hian ka hnarah tuibur rim a cham vang vang hian ka zu hre tlat.

Zan mutnaah thawnthu min hrilh thin a. Mahse pawnto chau tawh lam kan nih avangin kei phei chuan a tawp hmaa ka mutthilh san a tam zawk. Zingah bawng hnute a sawr thin a. Chaw kan ei hian a saum thawh hlim a nih chuan mi a chawm sak a, a nih loh leh bawng hnute. Chi hi chawah mi a phul sak ngei ngei bawk..

A ke lei ei, khir chhah zet mai chem tea a zei thla zer zer mai kha hmuhnawm kan ti thei teh e! Sikula kan tih that ve deuh thu a hriat te hian a lo lawm ve em em a. A mi fuihna ber chu, “Zir turh turh rawh u”, tih kha a ni mai. Chu bak sawi thiam hek lo. Zing a bazaar haw hi kan lo chang thin a. Chhang min hawn thin avangin! Pawisa a neih tlem deuh changa ka pu a hawn kep ve loh changin ka pu kha a vui bang thei lo.

Ka pu chu Leithum atanga kawl phai leilet zuana Tahana pem a ni. Pa lian pui a ni a. A tu leh fate, tuma’n kan tiat lo. Pa taima tak a ni e an ti a. Mahse a vanduai a. A tha (nerve) hi a tha lo va. Ka hriat phak ve hman hma hian mahnia chechang thei lovin a awm tawh. A kal duhin kaih a ngai a. Thutthleng seiah a thu tlok tlok a. A kut leh a lu hi a khur dur dur a. A tha khur chuan a tawng te thleng hian a tihsak phah a.

Ka hriat reng thin chu a luphut an khuih sak thin kha a ni. Luphut hi a leng darh chuai chuai mai a. A chang phei chuan pawna inkhuih hial a ngai thin. Luphut chu zozai chu a thak em em ngei ang. Luphut thak takngial pawh kha a inhiat tha hleithei lo kha a nia! Kum rei tak chu tianga awm ta chu pangchan chang hi a nei thin. Hreawm a tawrh rei zia ngaihtuahin thinchhia leh khermai taka a awm lo kha mak ka ti zawk.

Tum khat pawh a kal dan zirin chhuat laiah ka kal chhut chhut a, ka ni fate’n min dawm der a. Kan nui vak vak a, a aw khurh dan ang te’n ka han tawng vel chiam a. A lo nui khuk khuk a, “ Ka tih dan chu zir nuam in ti hle mai”, a ti a. Huatah a la lo.

Falama ka pu hi ka pi aiin kum sarihin a naupang a. Ka pi hi a ralkhat ngaihzawn em avangin an va dil tawp a. Ka pi te chuan lo hnial thlak rikngawt ai chuan tiin an tlin zawh loh tura an ngaih zat, sial an lo dil a. Ka pu te’n an lo tlin tak avangin an innei ta e an ti a. Hei hi tu min hrilh nge tih ka hre tawh lo. Dik chiah lo lai pawh a awm maithei. Mahse an thawnthu hi ti hian mawi ka ti a. Hriat chian leh zual ka tum hran lo.

Ka pu hi Zawlsei atanga Falama pem a ni awm e. Falam Presbyterian kohhran upa min a ni ve. Mistiri hna thawk a ni. Ka u matric zir lai hian ka pu chuan a zilh a. “ Pa-a, ngaihzawng ka nei a, lehkha ka zir thei lo in tih dawn ai chuan”, tiin bul a han tan a. “Ban daih rawh u”, a ti dawn emaw tih nak a laiin, “ Nei mai rawh u”, a ti daih!

Ka pi Chawngtinzovi hi chawngthu a ni lo va, Fanai a ni. Nu invawng fel tak leh hmel tha tak a ni. Mi hi a ngai thei em em mai a. Tahan damawi in hovin T.B leh sikserh hrik an hmuh theih em em lai khan kei ka hritlang va inen tir pawh kha, “T.B i nei”, min lo ti tlat mai a. Ka inngaih bel chho emaw ni, ka khawvel kha a hnim deuh ruih te hian ka hre tan a. Zial ka zuk ngam loh vang pawh a ni maithei.

Chu tih lai chuan Falama ka pu a rawn zin a. A haw dawnin Falam damdawi in puia in-checkup tha turin min sawm a. Kan inzui haw ta a. Falam ka thleng chiah chu ka piin cheroot tel lian tawk hi mi lo lei nghal a. T.B in-checkup tura kal ka ni tih a hre tho. Ka zu khu vut vut a, ka dam suai suai hian ka inhria. T.B vei tih chi loh lutuk!

A nihna takah chuan Falama ka pi leh pu te hi ka nu pianna nu leh pa te an ni lo. A pa tea te an ni a, fa nei thei lo an ni.

Ka nu hi a nuin a thih san hma a. A pa (ka pu ) hi tirhkoh a ni a. A hna thawh leh a fa te pa li nen a buai em avangin a fanu upa ber (ka nu) leh a fapa naupang ber (ka pu tea) te chu an khua(Zawlsei) lama awm rih turin rem an ruat ta a.

Tahan bul Mualzawl khua atang kein an kal chhuak a. Falam an thleng thla ta a. Ka nu, naupang tein a nau a pua a, a kal hnak hnak mai a hmuhin ka pi a awm hle hle thei ta lo. Falam atanga an kal chhuah leh hnu tawkfangah a va um zui a, a hruai haw ta a. Chu mi ni atang chuan fa nei thei lo ka pi chu chhungpui nu dik tak a lo ni ta a, tu leh fate nen puinawi takin a hun a chhiar ve tan ta a ni. Mi tam zawkin he thu hi an hre lo. Kei paw’n puitling thawkhat ka nih ve hnua ka hriat chauh a ni. Ka pi chu eng emaw ti tak hian lainatna ka nei tlat. Kan pianna pi a ni lo tih kan hriat hnu khan kan en dan a danglam taah mi a ngai ang tih hi ka hlauh ber a ni! Enge maw chang khan inthlahrunna kha a nei emaw ni! Min nel loh chang deuh a neiin ka hre tlat thin. Ka ngaihbel lek ni teh se.

Pi leh pu tumah ka nei ta lo. A mal malin an kal liam zo ta! An hun tawp lam awmpui theih pawh tumah ka nei lo. Enge maw changa ka hrechhuak thin tih bak ka pi leh pute’n ka nunah chan ram an nei ta lo.

Nakinah keipawh, ka awm loh hnuin khawvel hi a her ngaiin her mahse tu hriat lohvin ka la tham ral ang. [www.singaporemizo.blogspot.com]

NEUH NEUH

2009-05-07T20:19:00.000-07:00

A tu-khaw-kha hi fel kim biai va awm hek suh. Thaa inngai chu a that lohna a puang zar a ni lek fang a, mi kara inti pa rum rut si, hmeichhe laka khup dui ang vel a ni. Ngaihtuah fip chan phei chuan tih tur neuh neuh, eng emaw pui a tam narawh le! Leipui (khen) han siam dawn ta ila a hnaih chawi apui hi a lo inkahpukchaw zuih mai a, chutachhapah mahni thu pawh hman sen nak alaiin tu tu emawin chu-e kha-e an lo ti ve thla zen nen, a buai-an-thlak a ni e.

Hna pakhat

Hna tam tak karah hna pakhat han thawk dawn ila, pawimawh apui hi a lo inchherchhuan hnur mai si a. Hriain duh mah ila, a pawi (chengte reuh hi) lam hi kan lo harsat ve khanglang si nen. Miten an ti a, an hausakpui, hah thi kulin kan ti ve, a chu-ti-lua bawk si lo. Khual an zin a, kan zin ve, a tawpah sum dawng tih takah kan sum hi a dawng tial tial a, a hnu kharnaah phei chuan kut ben chu sawi loh nupuite biang bak ben tur awm hek lo. Chuti chuan ti ve rawh an ti, neih-thing-lung khawngin kan bei, a sawt chuang lo. Nakkum chu aw... kan ti bui bui mai a nih hi. Eng nge a chhan le? ... "Bei nge sei run dung" an ti a ni lawm ni? Sala....

Rualban Hautak

Chem tuma kezungpui hlep kan kalsan a, hrikhru inseh puak pawp pawp lah bye bye a ni tawh bawk. Ei leh in bakah incheina a lo tul. Nula leh nuhovin inchi 3 vela inkamsan an duh. Istiri-a sam tihmar an lo duh vei nen. Pa ber lah phun ngam si lo, zanah eng committee tee emaw a lo awm, haw tlai bawk. Nu ber lah tul buai, fate inbual tir tur duh lo um paha arpui no hruaiin a lo um phei chuan posi hi a mawi lo piah lam a ni. Chawlhni tukah sa lo chuan a ni thei si lo, bat zui a tul. Mei eng man, kohhran leh tlang khawn tesep a lo tul, thirsakawr chhe siam a lo tul, etc.,.. indaih ni reng reng a awm lo. Dam loh hi kan cho lo a ni ber mai. Dam ngei ngei tur a ni e. Chhungkaw sum hman dan hi chhut ngun a va tha tak em! Duh zawng lei rih lovin mamawh zawng lei hmasa ila, zan mut a ziaawm deuh mahna.

Kut nei si, kut bul

Pianpui thiamna leh zir chawpa thiam an awm. Ti ngai lo na na na chu mawhchhiat tur awm hek lo. Mipa ni ve lem si a, pheikhawk dahna tak ngial pawh kilh pum hlei thei lo chu i ti a ni mai thei. Kunia leh ara hum khawr tut te, perek tlawn tlai tha te pawh chhu per nawlh nawlh thei te pawh an awm chiang alawm. Mitiri puitling ni lovin puitling mitiri hi kan society-ah hian an kat nuk ta ve ang. A sawi zawng chuan a awlai phian, a tak ram hi a ni pawimawh zawk ta chu. In kaiten, varanda, vawk kuang, pal hung, lehkha bu dahna (chhuar) te hi tu siam nge ni ang le? Ka thiam lo tiin thu hmuar ringawt suh, ti ve chhin la, a kawng kawng a awm ve zel a ni tih hi. Thirsakawr chuang thiam lo phurh ang vel a ni.

Kam hlei ziap zuap

Hmeichhe tawng thei lai leng lah hi de..de..de..de an tih chhung hian kho khat chu nuam sain an dak liam mai thin an ti. Keiniho hi chu thil dang zawng aiin kam kan nei tam. Sawi loh tur leh thu khuh tur ang hi a chak hian kan chak zek zek. Chanchin chhum bung te hre mah se, intih hriat duh luatah kan tlak duah a, kan chungah bawk a tla leh thin. Nin deuh chan phei chuan "Ka thian, hre lo ve deuh em em teh" tia kuk fawk mai a nap awm mai thin. Khual thu thang leh ar pan chuk an ti thin a, a dik bon top. Hlate khuaa dam lo pangngai pawh kha, kan khuaah meuh chuan an phum dawn ti tih der tawh mai thin. Pawlho thiltiha sep sep ti ti a len kual fo chuan a ruka inmelh rek rekna a thlen thin a. Nang chauh a nia ka hrilh ang che, kan ti kual dun dun chuan chaw a haw lo fo ang.

Mi ningkhawng hriat

Miten a fel, a thiam an ti fo thin mai thei, a tirtute boruak hriat a tul hle. Hemite chu an tha tih mai vangin ar nghal zuan luh fo hi min chhang kham hlui thei a, mahni'n tul tih mai vanga mite thil tihna inrawlh chhen pawh hi thluak thawl te tih tawk lek a ni. I va leng (tel) a nih pawhin an dinhmun zawt hmasa la, engemaw va khawih zut zut suh ang che. A ruk te hian "he mihring hi a rawn kal leh dek duk ta" an ti palh ang che. Eng emawa chanvo pek ni si lo, khauphar thawven vang hrima inbarh luh tum hi an awm thin. Thisen 'O' dabawlte tih tawk lek a ni. Ruat loh a tawk chauh an ti palh ang che. Zana bengchheng taka khuang vuak, sarak tuar tuar, ang chite pawh thenawm dam lo tan bakah veng chhung a tiralmuang lo a ni. Kawng laia vawk ek, ran thi, bawlhhlawh rimchhia avang pawhin kan ner hnur mai thin a nih hi. Thaw uih bula bekbawr tul reng si hi kua a let fo reng a ni.

Theihnghilh over

Haihawt hi man pek belha sale chur chur mai chakawm tak a ni. Bike leh thirsakawr theihnghilh i hre fo ang. Pasalte theihnghilh pawh sawi tur an awm. Meitalh, lukhum leh ball-pen te phei chu theihnghilh zin pawl tak a ni ta ve ang. Meitalh emaw, ball-pen emaw hum reng chunga zawng phili buai ta te pawh an kat nuk mai. Hui-ha.. a buaithlak zawng a nih hi. Khual hla tak, hnathawh hmuna thleng tawh hmanraw pawimawh tak theihnghilh palh ngat hi chu aw, Awi karei a va pawi tak em! U Thlerh? Haihawt loh nan lehkha pheka ziakin emaw bang tara chhinchhiah emawin thai lang thin ang che. chuta pawha i la theihnghilh fo a nih chuan bungbu tawp mai rawh. Tihngaihna a awm hlawl lo ve lumum.

Tawp thut ang

Neuh neuh kan thai rang. Heng lo neuh neuh pawh sawi tur neuh neuh a awm hnerhnur. Ngaihtuah zui ve neuh neuh ula, kamrak tur neuh neuh a inkahpukchaw zut ang. Kan ti neuh neuh va, kan nawi neuh neuh zel a nih hi...

THANGCHHUAH BEL

2009-04-30T21:22:00.000-07:00

by Zara, G.T.I

Chhiat ni, that ni leh puipun nikhua ilova, thingpui lum nan chauhva kan hman thin vai bel lian tawk tak, no zanga aia tlem lo lum theihna, a panga beng pali nei chu kan khua leh kan khaw chhevela khuate chuan ‘Thangchhuah Bel’ tiin kan hre lar hle a. Chu vai bel kan lo neih dan pawh kha thilmak sawi sen loh zinga pakhat a tlin ve avangin thang leh tharte sawichhawn zel atan ka rawn sik hawng dawn a ni.

Thang khat lian kal taah khan ti mai ila, 1986-1987 bawr vel kha ni tain ka hria. Kan khaw tlangval chhuanvawr zinga mi, Thangriruma chu kan khaw tleirawl pahnih tuia tla a char laiin amah a aleh chet sual a, a thih phah ta a. A nakum, a thih chamah chuan amah hriat reng nan tiin a chhungte’n Cup chhuah an tum ta a. Chu Cup chu chhun bel khap 12 a ni a, Thangriruma nau Bible School atanga chhuak hlima chuan ‘Thangriruma Memorial Cup’ tiin hming a puttir a, kan khaw lehkha thiam thenkhatte erawh chuan “Bel an chhuah dawn avangin Thangriruma Memorial Pot tih zawk tur a ni” an ti ve thung a. Mahse, Thangriruma Memorial Cup tiin a pu hlen ta tho a ni. Khua leh tui tana nun chan ngam, tlangval tlawmngai hriatrengna Cup a nih bakah, a hming pawh a sap deuh nialnual avangin khawtlang a deng chhuak chakin mite ngaihven a hlawh ta em em a.

Chutichuan, Thangriruma Memorial Cup foot ball tournament chu favang awllen lai chuhin buatsaih a ni ta a. Khaw hnai leh khaw hla atanga foot ball team 16-te chu group 4-a inthenin an inkhel ta char char a. Hnehna changte chu an haw haw a, a tlawm zawkte erawh mittui tap hnap nen lungchhe van kaiin an hawng ve thung a. Chawlh kar hnih a han vei liam leh meuh chuan final-a intawk tur team hnih chu hai rual lohvin a lo lang ta a ni. Rin leh beisei ang ngeiin kan khaw ‘A’ team leh Khawkelek khua ‘A’ team-te chu, amah Zo Beckham-a dan tekin an inkhuai nuai dawn ta a ni. Chhei raw le!

Apui apangina an nghahhlelh em em Thangriruma Memorial Cup final ni chu a lo thleng ta. Kan khaw field-a entu mipui tlim hmur chu Tualte vanglaia theipui rah tha an sawi ang mai, field hual vela in leh thingahte chuan an bei tak fer fur a. Inkhel turte field chhunga an rawn luh hnuah phei chuan lehlam tantute’n ‘Khawkelek….Khawkelek’ tiin an lo au rual thup thup a. Chutiang bawkin min tantute pawhin ‘Khawkhawkherh …. Khawkhawkherh’ tiin an lo au ve bawk a. A lo rei takah chuan ‘Khaw’ tih kha telh tawh lovin, ‘Kelek ….Kelek’ ‘Khawkherh…..Khawkher’ tiin mahni tan lam theuhte chu auvin an thum mup mup mai a. Chu chu lo fing li nga dan atang pawhin a hriat theih a ni an ti.

Keini khaw hnih hi kum dangah pawh final-a intawk fo, pakhatna leh pahnihna inlak chhawk zak zak thin kha kan ni a. Tun tumah pawh hian khap 12 bel chu put hawn ngei tumin tha tawp leh thiam tawp chhuaha an inkhuainuai avangin mipui mit pawh tlai namen lovin a tlai a. Kan khaw team captain, back fual Tuala phei chu a bawihi’n ‘U Tual… goal khat chuk khat a nia aw’ tia a lo intiam vang nge ni dawn, back-ah a awm ta mek emaw ti ila, lehlam goal hmaah a lo thleng daih a. Chutah a la awm mek emaw ti ila, a laiah a lo tlan lut hman leh a. Tan namen lohvin a tang a ni tih a hriat hle a ni. Chutiang bawkin lehlam team pawh tha thlah miah lova an tan ve avangin tu lamah mah inthun goal lo vin, hun chanve chu a zo ta mai a, hun chanve dang khel leh turin an chawl hahdam rih a.

Chutia an chawlh hlan chuan back fual Tuala chuan a naute chu ko khawmin thu a hrilh ta mawlh mawlh a. Ani hi Township slected-a thlan tlin a lo nih thin tawh avangin kan khaw team captain leh coach nih a fawm a, kan rinchhan em em a ni. Tunah pawh hian team lehlam sa panna lai leh sa chhahna lai nia a hriatte chu kawhhmuhin awm dan tur leh chet dan turte a hrilh a ni tih a rin theih nghal mai awm e.

Hun chanve dang chu an han khel tan leh a. Khawkelek ho lah chu atir aiin an che mawi a, an ball lak leh deh dan pawh a that zawk avangin kan lam goal hmaah chuan fanghmir chaw zawng, kal lam leh haw lam insulpel ang main an zi tak mup mup a. Chutih karah, kan lam hmatlanin ball a chang a, Khawkelek goal lama a han tlanpui zar zar mai chu le!... Tlai khawhnuah ka ngaihtuah let thin a. Khami nia, Thangriruma Memorial Cup final inkhelh kha, tun lai chhana mit tla lek leka kan en thin, Worlk Cup final te, Primier League final te leh Champion Leagure final-te nena khaikhin pawhin a mihring leh a leilung tih loh chu danglamna reng neiin ka hre lo zu nia.

Nu pakhatin “A chumi… savun ham puar pakhat uma patling phar phar tak mai chu!... naupang a chhia nghal loh” a tih ang mai, khaw hnih patling rual savun ham puar uma an inbeihbuaina pawh minute 90 dawn lai a lo ni ve ta. Tu zawkin nge thun lut hmasa ang aw tia mipui thin a phut det det lain back fual Tuala chuan a ball chan chu goal veng pek let tum ang ni siin kan lam goal-ah a’n vai lut pawp mai chu le!..Khawkelek tantute au thawm rinzia chu, khatih lai khan vanpui pawh rawn chim se a hriat tham loh vang tih tur hi a ni. Chutih karah ‘Engtiziaa mahni lama thun lut ta nge maw a nih le”tia thenkhat an phun sep sep laiin, ring fahrana “Tuala… chuk ni lovin kuk a ni zawk tawh ang…kuk” tia au ri chuan thenkhatte a lo tihlim ve bawk a.

Lai an han thai a. Rei vak lovah kan khaw goal hmaah chuan an zi leh ta mup mup a. Tawkfangah chuan back fual Tuala bawk chuan ball chu a chang leh a, a ball chhan chu a thiante a pe mai dawn emaw kan tih lain kan lam goal-ah bawk a pet lut leh pek a. Min tantute beidawng au thawm leh lehlam tantute hlim lawm au thawm inhmeh loh zia chu, ruang men zana in chhung lama tap ri leh pawn lama nui ri a inhmeh lo ang chiah kha a ni. Chu nak-a-laiin amah back fual Tuala lah chu field laiah a rulpui lu din thul, a dai-bi-ling vei thul a. Hril a hai duh teh asin.

Lai an han thai leh a. Engtizia nge maw ni.. Khawkelek hma tlan pakhat chuan ball chu a tlanpui nal nal a, an lam goal-ah a’n thun luh hmiah mai chu!...mipui mak ti leh a ngaihna hre lo chu an chiau tak teng tung hlawm a. Hmanhmawh bak lengin lai chu an han thai leh a. Khawkelek lamin an hmahni goal-ah bawk thun luh an tum mek lain, back fual Tuala’n “ Naute u…i tang ang u” tiin a han au va. Chuveleh, kan khaw player ho chu goal veng nalamin Khawkelek goal hmaah an chim phei ta huk a. Khawkelek hovin anmahni lamah thun luh phet an tum laiin kan player ho lah chuan thun lut thei lo turin an lo dang ve vat vat bawk a. Khawvel a buai zo ta. Hun a han zawh meuh chuan goal 2, goal 1-in kan tlawm ta a ni.

A zanah chuan lal leh upate’n public meeting meuh kovin back fual Tuala chu thu an zawt ta a. Amah, back fual Tuala lah chuan, “ A ni khawp mai…atira lawman an siam kha bel pakhat chauh kha a ni a, a hnuah khaw hnai, khaw hlaa an chhungkhat laina rawh phur tharte’n a cheng zawngin lawman pahnihna an rawn siam leh a, an belh an belh ta mai bawk si a. Half-time chawlha an puanah khan cheng sangnga lai a tling hman tawh a, chu chu khap 12 man deuhthaw a ni. Inuan thu lovah, belte chu kan neih zawng tak alawm, a pawisain dawng zawk ila, tichuan, buh zai leh thingai lain kan intuak bawk ang a, Sanmyo-a ka pu Khuangliankhamate belpui ang saw kan lei zawk dawn nia ka ti a, kan naute chek ngeih zawng tak a lo ni a, lungrual takin kan amen ta dial a ni. Chutichuan,Khawkelek ho min tlawm ai chuan tiin mahni kan intlawm ta zawk a ni e” tiin a han chhang dap dap a. Chu chuan paho a tilungawi a, nuho a tilawm a, thalaiho a tiphur bawk a, in chhung kil khat melha thu tum hmuk, back fual Tuala kuk tuma meeting zawh nghak rani pawh a tinui sen sen ve ta ni. Back fual Tuala pawn kuk ni lovin chuk a hlawh ve leh ngei ang le.

Kum a lo thar a, Vau thla a lo det meuh chuan kan nghahhlelh em em bel thar hmel chu kan hmu ve ta a ni. Paho intiremhriain bel hming tur an han ngaihtuah nak nak hlawm a. ‘Thangriruma hriatrengna’ han tih mawl tut lah ni theiin an hre si lo, tuk pumin an inhnial laih laih a. Chutih lai tak chuan, Seipui khaw chhuak, veng mawng hmeithai te hi a lo chho dan dan a, thil awmzia a hriat chuan, “Che!…patling chaw ei hun theihnghilh phunga ngaihtuah nan a va tlak lo et… thang kan chhuahpui alawm, Thangchhuah bel i ti men ang un” a rawn ti ta roh va.

Chutichuan, chhiat ni, that ni leh puipun nikhua ilova, thingpui lum nan chauhva kan hman thin vai bel lian tawk tak, no zanga aia tlem lo lum theihna, a panga beng pali nei chu kan khua leh kan khaw chhehvela khuate chuan Thangchhuah bel tiin an hre lar hlen ta a ni..

2009 CHAPCHAR KUT

2009-03-31T06:35:00.000-07:00

by Zalianthanga, Tahan

Kawlphai (Myanmar) Zofate hian 1965 kum khan ‘Lushai Day’ a hmang tan a, 1973 kumah chuan eng emaw harsatna avangin Lushai Day chu Chapchar Kut tia thlak a ni. Tichuan he mi kum atang chuan Chapchar Kut chu hman chhoh zel a ni a. Amaherawhchu, 1985 kum khan rokhawlhna avangin chawlh a ni ta a ni. Chutia Chapchar Kut chawlh reng tur chu ngaingam lovin Tahan hnam puipate (Lushai Welfare Organization) chuan thar thawh leh zai an rel ta a ni.

Tichuan, Tahana hnam puipate leh Tahan Mizo Kristian Thalai Pawl (TMKTP) nen tang kawpin 23 April, 2005 khan EFCM Hall (Tahan ‘A’)-ah hman tan leh a ni. Hnam lam chi hrang hrangte buatsaih a ni. Tichuan kum tin khel lovin hman chhoh zel a ni a, kumin (2009) phei chuan Tahan bila hmang tawh lovin Tahan leh a chhehvela Mizo khuate nen hmanho a ni. Hei hi a tum khatna a nih angin inpumkhatna lantirna thil pawimawh tak a lo ni.

Hun hman dan:

Inchai:

A hun : 23-26 March 2009 Zan

A hmun : EFCM Jubilee Hall, Tahan ‘A’

Chapchar Kut pualin inchai buatsaih a ni a. Tahan ‘B’ group-ten mawhphurhna an la a ni. Khaw 23 atangin (Kalay-Kabaw) mi 54 an tel thei a. Mipui kan thahnem bawk. Kut a tiropui hle.

Lawmman late chu:-

Pa te:

1st Conventionthanga

kum 22 pound 120 Pyinkone K.50000

2nd Lalrinkunga

kum 30 pound 120 Tahan ‘F’ K.30000

Pa laihawl:

1st Lalramnghaka

kum 22 pound 135 Kanan K.50000

2nd K. Thantluanga

kum 20 pound 127 Tahan ‘F’ K.30000

Pa lian:

1st Lalmuanawma

kum 22 pound 163 Varpui K.60000

2nd C. Ramdinsanga

kum 20 pound 148 Tahan ‘F’ K.40000

Nb. Certificate mawihnai tak leh chengfaiin Chapchar Kut 26.3.2009 (a ni 2-na) khan mipui hmaa hlan a ni.

Hnam lam leh a behbawm:

A hun : 25-27 March, 2009 Chhun dar 12:00 Noon

A hmun : Methodist Centenary Hall (Tahan ‘C’)

Tahan leh a chhehvela Mizo khaw awmte sawmin hnam lam turte mawhphurhna insem a ni a, thla khat chhung vel zan tin deuh thaw lam zir a ni, thawm a tha thei hle mai. A chang phei chuan zing lam dar khat thleng thleng te an zir hlawm a ni. Heng hnam lam chi hrang hrang zirtir thintu Pu Zarlawma (Tahan ‘A’) a fakawm hle.

Chapchar Kut pa atan Pu Khawvelthanga (Tahan ‘B’) thlan a ni. Zai thiam mi 35 lawr chhuah a ni a, chung zingah chuan Kanan nula thiandun Chawngthanmawii leh Tamu Miss Ramchuanmawii te’n ‘Hlim ten I leng dial dial ang’ tih hla an sak chu mipui beng a fahin tiril a fan thuk hle. Kan mur sung sung mai alawm.Hui…ha..

Hnam lam rawn show thei khua (Group) te chu: Zotlangsang lam chu Tuivar, Pinkhung, Tahan ‘F’ te na lam . ‘F’ Group lam te chu mipui mit an tlung hle a ni ang, kut tawpniah lam tura sawm nawn leh hial an ni. Khual lam chu – Tahan ‘E’ leh Myohla ten an lam a. Sar lam chu Tahan ‘A’ ten an lam thung. Cheraw chu Tahan ‘C’ leh Sanmyo ten an lam a. Zawlkhawsir lam chu Tahan ‘B’ leh Varpui ten an lam a, Kan zotlangram nuam lam chu Tahan ‘D’ Group ten an lam bawk. Chheuh lam leh Dar lam an tel thei ta lo chu a pamhmai khawp mai.

Kut ni hian a pui a pang, a tar a zurin kan hlut thiam hle. Hall leng lo khawpin kan bawr a ni ber mai.. Hun kar zehah Thli-hiau program hmangin zirtir nei thiam thu thianghlim chu Mr.Mamuana leh Thanga ten an kam rak kual vel a, boruak an siam tha khawp mai.

Chapchar Kut tan hian thilpek (sum) petute an awm nual a, ram dang atanga Mizo insuihkhawm tlawmngai pawlten an rawn thawh nual bawk Kut mipui hmaah puan chhuah hial a ni. Chu bakah khaw hrang hrang atang leh Tahan Group tin atangte pawhin thahnem tawk tak a tling khawm a, a lawmawm hle. Kan tanrualzia a lang chiang hle mai. Kut tawp ni ban dawn hnaihah ruah a rawn sur zeuh a, boruak a siam thui hle mai.

“Kut pui ka ur khuangruah chiar nghian e,

Chappui rawh lovin a tul ngai lo;

Chappui rawh lovin a tul ngai lo,

Ka chung chhawrthla a vanglai lo maw”

Tih hla thu nen pawh inhmeh tak a ni. Kan pi leh puten Chapchar Kut an hman thin lai hian ruah a sur thin ni ngei tur a ni. Tuna hla thu kan hmuh atang hian a hriat theih a ni. Hmun. Danga awm kan u leh nau, nuleh pa, thian leh rual, chhungkhat lainate hian han hmu vein rawn chen ve se, kan va’n titak em. Hun leh nite a la inher vel leh zel ang a, tawn leh ni a la awm ngei ang le. Kabaw lamah pawh Chapchar Kut hman fo a ni tawh a, 6,7 April 2009 pawh hian Khampat khuaah hman tur a ni bawk. Kan nghakhlel hlawm hle mai. Nakinah chuan Chaphar Kut hi hmun khata hman hunte pawh a la awm zel mahna.

Tahanah Chapchar Kut

2009-03-08T08:18:00.000-07:00

by Admin

Tahan hnampuipate huaihawtna hmangin leh Tahan Mizo Kristian Thalai Pawl te tangkawpin 25-27,March,2009 chhun atangin Methodist Centenaru Hall, Tahan Mission Vengah hman tur a ni a. Tahan B Group-te mawhphurhna an pek angina INCHAI buatsaih a ni bawk ang. He inchai hi 23-26, March,2009 zan hian EFCM Hall-ah buatsaih a ni thung ang. Lawmman chu Kut tiak ni 27.3.2009 hian hlan tur a ni. He Kutah hian Tahan A to G Group bakah, Tahan leh a chhehvela Mizo khaw hrang hrang ten hnam lam an rawn show dawn a ni. Tahan khaw chhungah pawh Group tinin hnam lam chi hrang hrang zirin zanah thawm an tha hle mai.

Chapchar Kutah hian Tahan leh a chhehvela zaithiam larte sawm a ni tawh a, item chi hrang hrang neih tum a ni bawk. Khaw tinah Kut hman atan tiin mitlawmngaite hnenah tlawmngaihna thilpek an khawn mek a, kan phur hlawm hle.

KHAWTLANG NUN SIAM THAT NANA THALAITE MAWHPHURHNA

2009-03-07T04:27:00.000-08:00

by Zalianthanga [Tahan]

1. Thuhma:

He thupui ziak tura a ruat hmasak zawk chu Rev. Dr. Ngurliana a ni a. Amaherawhchu ziak tura hun tiam karah hna thupui hraw tak tak chai tur a neih avangin a theih dawn loh thu hriat a ni awm e. Tichuan kan hruaituten ziak tur an dap ta chung chung a, a hun a tepter bawk si nen tuna a ziaktu hi an pem buh vel ta chawp mai a. Engpawh ni sela, kan theih leh tlin ang tawk tal chuan tarlan kan tum a ni ang chu. Khawtlang thil hi chu chenna hmun azirin ngaih dan leh chet dan phung a inang lo thei hle ang. Amaherawhchu, 'mahni khaw tih dan' hmangin siam that hna chu sawi tur a awm nual ang.

2. Khawtlang nun chu engnge?

Khawtlang nun hi sawifiah fak awlai lo tak a ni a, a kaihhnawih thil leh pawhfan tur pawh sawi tur a hnihthum hle ang le. Sociologist te chuan Society leh Community te bakah mihring a huhova awm khawm mai pawh ni lo, inkungkaihna kalhmang (pattern) leh awm dan phung tura ngaih (norms) atanga lo zichhuak, politics, economics, social leh cultural interactions, leh religious life tena a nghawng chhuah zawng zawng hi khawtlang nun kan tih ber chu a ni mai awm e. Chu chuan ze nghet a nei lo va, hmasawnna, thiamna, hriatna hnar lo chhuak zel hian a thuai danglam thin a ni.

3. Khawtlang siamthatna beihpui hmasa:

Khawtlang siam thatna beihpui hi hun hmasa lamah sawi tur a awm ngei ang. Martin Lutherana thlawpzuiin Geneva khawpui, John Calvin-ana kohhran leh khawtlang siam that hna hi sawi a hlawhin, nghawng lah a nei nasa hle a ni. Ruihhlo leh sex, inrawk leh inpawnghekna a hluar nasa hle a, chung zawng zawng chu dan chi hrang hrangin a tudai theih hial a ni a. Human Society-ah a lut thuk a, hmasawnna kawng thar (new development) a sah awngsak ta a ni. A tirah chuan John Calvin te thianza (Farile, Conrault) chu sawi chhiain namen lovin an hua a, an hnawt chhuak ta hial a ni. Mahse, an hnathawhna policy chuan mipuite hnenah fiahna a lo awm ta a, a hnuah siamthat hna thawk leh turin an ko leh ta a ni. He thenfai hna hi a ropui a, Reformed kohhran bulpui an ni kan tithei awm e.

4. Tradition & Change (Nunphung inthlakthleng)

Hmanlai Zawlbuk University-a thalaite nun kha chingal leh saum rim a na bik a, khawtlang nun pawh a himin chhiatni thatniah phei chuan a hulum em em a ni. Kum 1894 atang khan Kristiana mitvarna kan dawng a, he mi hnu atang phei chuan life style a dang zo ta a, inchei dan, chet dan, in leh lo, hmanrua chi hrang hrangte chu Western Culture-in a rawn luahlan chho zel a, kan ngaihhlut zawng (value system) pawh nasa fein a khalh thui ta a ni. Kristiante Zawlbuk (Biak In)ah kan fuankhawmin kan hnimphum a, khawtlang nunah erawh chuan a chu tivak lem lo. Kum 40 kal ta vela thil tih dan kha thing (date out) kan ti a, tunlai taka (modernism) nun tulin kan hria a, mahse khawtlang nuna thalai phusate erawh chu 'phut chawp tlawmngaihna' a ang ta hle mai Pipu serh leh sangte chu hluihlawn. a ni titih tawhnain hnamro thil tam tak zingah a tha lai thur lawr chhuah a, tunlai mila inhnek remtir thiam a tul ta hle mai.

5. Post Modernism (Tunlai khawvel piah lam):

Globalisation (kawtkai khawvel)-ina a hrin chhuah, khawvel ram tin, hmun tina inpawhtawnna leh inhriattawna a chak tak em avangin khawvel hi khaw pakhata ngaiin Global Village an ti ta hial a. Media force-in min thunun tan a, TV, Fax, Internet.... Radio, Computer etc... te hmangin hnam tin culture sadai a thiat tan a, tun lai piah lama kan chen tak avangin Post Modernism kan tihna chhan chu a ni. Chu chuan thalaite nunah a tha lam leh a chhia lamah nghawng a nei a, Media ethics hi zir chian a tul tak meuh a ni. Chuti lo chuan 'a lera thuai' nun a paw chhuak zel ang a, theuleu, sex, pirpak taka nunziain min chiahpiah reng a nih si chuan kan pherh tual tual thei mai ang. Chuvang tak chuan work ethics lamah tan kan lak a tul tak meuh a ni.

6. Khawtlang cheimawi:

Kan khawtlang hi han bel chiang ila, a awngrawp ta em ni tiha zawhna hi thil pawimawh tak a ni. Thalaite hian eng ber hi nge kan siamthat tak ang le? Kawtthler kawngte hi hawi vel ila, a tawp ta hle mai. Kawng kam vela bawlhhlawh vum ther thur te, lei tla-bal te, tui kawng mumal lo te hi thalaiten thenfai reng tura mawi tur a ni ngei ang. Tui thli, ek rim chhia te pawh hi chhehvel a titawp mai bakah hriselna thleng pawi a khawih thei a ni. Chuvang chuan kan chhehvela boruak tikhawlo thei nunchate enkawl dan (Ecology) chen hian mawhphurhna kan nei a, khawtlang hminga thenfai hna hi thalaite koah a innghat thui hle a ni.

7. Chhiatni thatni:

Chhiatni thatni sawngbawl thilah hian 'hunin a rawn hril zel' a ni bawk a, lenkhawm ina meizial zu put put pawh kan awm tawh bar lo. Amaherawhchu, ruang men zana thalai kal beitham lutuk te, thlan lai an khat ta pharh a, thing khawn an tiavai a, zualko kal kan insawm tan a, kuang siamtu an bibo tan bawk a. Heng hi zirlai tam vang te emaw, hnathawk leh dawrkai tam vangte emaw chu lo ni mah sela, kan inthlahdah vang hrim hrim a ni thei ang em? 'Phut chawp tlawmngaihna' hi engtia kuai her chi nge ni ang le? Tun laiah chuan kan tul tlangpui tawh a, zing kara mitthi vui te, thlan leh kuang ready made-siamsa te, ruang men zana vanram ngaih hla chauh ni lo Kristian thalai hla tha te hi rimawi nena zaiho te (item chi hrang hrang pawh siamin) hi a tha tawh ang em? Mitthite pawh hi nakinah chuan hmun pakhatah kan la in hal lo ang tih tu'n nge sawi thei. Heng lumen zan leh lenkhawmah te, hnatlang leh inkohkhawm nia thalai kal lo 'chawi' kan tihte pawh hi ngaihtuah chian lehzual a hun tawh hle. Rev. Dr. Lalsawman, "Kan khawtlang lungphum a nghing" a tih thu hi belhchian dawl tak a ni.

Chhiatni leh thatniah pawh hian hunserh leh chaw ei tur tak ngialah pawh hun pek a harsa lek lek tawh a ni. Hnam dang karah kan khawsa a, in ven fimkhur a tul hle mai. Hnam nun a bo loh nan pipu nunzia ten lenkhawm hla te, hnam incheina bungrua leh thawmhnaw te uar a tharthawh leh hi thalate mawhphurhna liau liau a ni.Peng leh hlek ila, Mandat thiat tur takngial pawh a kara inkar hial a tul ta mai hi a lungchhiat thlak hial zawk a ni. Inneih, lungphun, lawmthu sawi pawh hi tihdanglam a hun tawh ang em le? Mizo society hiTribal Society ni tawh chiah si lo, Industrial Society kai rih si lo inkar 'Transition Stage-a awm lai niin a lang a, kan fimkhur a ngai em em a ni. Chuvang chuan tlawmngaihna-logy hi tun lai milin engtin nge kan her rem tak ang le?

Tlangkawmna:

Min chimtu boruak azirin thil a danglam thei a, tihdan hlui nazawng pawh a tha kher lo mai thei bawk. Khawhar ina riah chungchang te, mitthi ral chungchang te, Mandat-a ti ti bawrh bawrh te, khawtlang bungrua enkawl hna te, thenawm khawveng indawr chungchangah te, khawtlang thalaite leh veng lal upate nena indawr thila phung kan thluknaahte hian khaw khat leh khaw khat tih dan a inang kher lo mai thei. Khawtlang nun siama that (Social Reform) kawngtah hian thalaite hi hnam kut leh ke tak tak kan nih avangin tan lak a hun tak meuh a ni.Kan sawi tum taka erawhchu 'tun aia khawtlang thiltihah thalaite hi Zo zia taka kan inhnamhnawih zel turin leh intulut thuk turin mawhphurhna lian tak kan nei tih hi kan thu laimu bera chu a ni e.

Lehkhabu rawnte:

1. Rev. Dr. Vanlalchhuanawma, Calvina Zirtirna leh Mizo nun Vol.II; Calvin Study Centre (ATC), Aizawl: 2004

2. Hrawse, Rev. L.H. Tunlai khawvela Mizote harsatna, Aizawl: 2005.

3. Christian Media Society. Kristianna leh tunlai khawvel, Aizawl: 2008.

4. Synod Social Front Committee, Khawtlang nun hruaina Aizawl: 2000

5. The Synod Publication Board, Mizo hnam zia leh khawtlang nun siam thatna, Aizawl: 1988

TAHANAH LENKHAWM ZAI INTIHSIAK

2009-02-27T07:28:00.001-08:00

By Zalianthaga [Tahan]

26.2.2009 zan khan Tahan PCM Hall ah Tahan A to G te lenkhawm zai intihsiak a ni a a hlimawm khawp mai. He intihsiakna turah hian Group tinah thla hnin deuh thaw kan zir a, a hau tak ang reng khawp mai. Tichuan he mni zan hian zan dar 6:00 vel atangin Hall kiangah kan inhawr khawm a , mipui kan zi nuai mai mai ani. Tichuan dar 6:30 atang Thalai hla sak zawh hnu chuan hun serh hman tan a ni a, Tahana lenkhawm zai insuihkhawm Zonun zaleng Groupte chuan hman min hruaisak a, chu mi zawh chuan CHAWIMAWI PHUTE CHAWIMAWI hun hman tan a ni.

A hmasa berin Dr. Than Bil Luai chu; vangtlang tana hriselna mai bakah damlo enkawl hnaa ngilnei tak a a enkawlna avangin chawimawi a phu kan ti a, kawlphai Zofate tana lei Arsi lian zinga mi pakhat a nihna angin chawimawi a ni a, minute 15 chhung thusawi hun pek a ni. He mi zawh hian Tahan atanga hmar lam Letpanchaung khuaa naupang tui tla(August,2008) Bemjamia nunna chhantu Tv.Lalmuanpuia Kum 21 (Letpanchaung, Chhim Veng) chuan thih ngam lu pu, nuapang a chhanna avangin an pahnin chuan THUCHEI MAWI TAKA SIAM LEH TAWLHLOHPUAN hlan an ni. He hi Tahan Social Reform Felloship hminga hlan a ni e. A buatsaihtu hi Tahan Mizo Kristian Thalai Pawl te buatsaih a ni e.

He mi zawh hian Lenkhawm zai intihsiak nghal a ni a, ‘F’ Gorup in hma an hruai a, intihsiakna tan nghak a ni. Group tin hian lenkhawm hla 7 theuh zir a ni a, he mi zan hian hla 7 zing a mi lehkha pawtin a pawt hla chu intihsiak nana hman ngal a ni. Hla endiktute hi Zonun Zaleng Group zinga mi 8 ruat an ni. Hall kan khat thap mai a, intihsiak laia lam pawh kan awm nual mai.

Lawmman sem a ni a Pakhatna ‘B’ Group Ks. 20000

Pahninna ‘C’ Group Ks. 15000

Pathuamna ‘A’ Group an ni e Ks. 1000

Group dangte chu Consulation Ks.5000 theuh pek an ni. Tahan mipui nu leh paten min hlutpui bawk a, kan changtlung hle mai. Group photo ho Tahan ‘F” Group zai lai a ni a, a dang pakhat hi TMKTP hruaitute an ni e.

Zalianthanga

Journal Secretary

Tahan Mizo Kristian Thalai Pawl

IDD CALL A THEIH TA

2009-02-04T06:16:00.000-08:00

TSO leh iCafe Internet dawr ah hian IDD call a theih tawh a. February 2009 thla chung Special Discount a ni.

CALL RATE
LANDLINE
US 200
Canada 200
UK 200
Italy 200
Germany 200
Norway 200
Denmark 200
France 200
Russia 300
Spain 200
Taiwan 200
Japan 200
Hong Kong 200
China 200
Malaysia 200
Singapore 200
Philippines 200
Thai 300
Israel 350
Australia 300
Brunei 500
India 350
UAE 800
Qatar 700

MOBILE
UK (mobile) 800
Italy (mobile) 1000
Germany (mobile) 1000
Norway (mobile) 1000
Denmark (mobile) 1000
Japan (mobile) 800

SMS pawh thawn thei tawh e..

HRIATZAUNA HI NUN TIHMASAWNTU A NI

2009-01-22T10:21:00.000-08:00

by Zalianthanga, Tahan

Mihring timihringtu chu Hriatna tluantling a neih vang ti ila a sual tam awm lo ve. He hriatna chi 5 (mit, beng, ka, thluak, taksaa deh) finkhawm hian duhthlanna zalen a neihtir a, chu chuan Eden mawlna atan hriatna khawvelah a hlang chho va, a ni telin hma a sawn tial tial a, finna leh changkanna tual zawlah a cheng ve ta thin a ni.

Hriatna chu:
He hriatna hi hmasang Grik mithiam Plato (ca.427-347 BCE) hun atang tawh khan an lo buaipui tawh a, chu hriatna chu tawn hriat atanga lo awm nge a nih a, ngaihtuahna fim atangin? Nge, a pahnih inbelhbawmin a siam tih hi a ni a. Chu chu Epistemology an ti a. Epistemology hmanga zir chhuah finna hi kohhran chanchin hma lama Pathian thu thiam langsarho pawh kha he hriatnaa zirna hian a chiah hneh hle a ni.

Khawvel hun hmasa mawl hun lai kha chuan kan chenna lei hi thil zawl duai, zau pui mai niin an ngai a, lei leh van hmun lai taka awm niin an ngai bawk a. Ni te, thla te, arsi zawng zawngte an inher kual suau suau a, ni khatah vawi khat zel lei hi an hel chhuak thin tiin Ptolemaya’n Isua pian hma kum 300 lai khan a lo vawrh lar tawh a. Chu ngaihdan thing tak chu rei a daih ta bik lo. Hriatna a lo zau deuh deuh a, kum zabi 16-na chawhma lam atang kha chuan Poland mithiam Copernicus-a (1475-1543) a lo chhuak a, chu chuan ‘lei hi a bial a, lei hi Niin a hel ni lovin, lei zawk hian Ni chu a hel zawk a ni’ a rawn ti a.

Chu mi thu bawk chu chiang leh zualin Italy Scientist Galileo-a (1564-1642) chuan ama kut kawih ngat Entlangna (Telescope) hmangin mipui hmaah a puangzar ta a. Kohhran hmasa Roman Catholic te ngaihdan a pel ta a, chu thurin chu sut turin Kohhranten nasa fein an nawr a, a nunna an laksak hmain a sut let thei hram ta a ni.

Hmasawnna Kawtkai:
Finna a rawn sang zel a, mithiam an pung chho zel bawk a. Kum 1650-1800 atang kha chuan thiamna lamah harhna (Enlightenment Period) a lo thleng a. He harhna nasa tak hian Modern World a hring chhuak a, chu mi zawhah Industrial Society-in a rawn um zui a. Tunah phei chuan Information Technology lamah chelh rual lovin min hnuk lut ta a ni. Chu chu Post Modern World tih a ni. Chu chuan a huaptir chu Globalization-ina a hrin chhuah ti ila a sual tam awm lo ve.

Khawvel hmun tin kil khawr atangin Media force chuan min chiah piah tan a, hnam nunphung hnufualten hnam changkan tih dan a rawn zir mek zel a. Khawvel hi khaw pakhatah ngaiin ‘Global Village’ (Kawtkai khawvel) an ti hial a ni. Redio, TV, Fax, Internet etc.. hmangin min tuam a ni ta ber mai. He Cyber Society chuan mi tin rilru a chawk harh a, Communication leh living standard-ah pawh rual kan ban ve narawh le. Tun hmaa Tahan leh Tamu pawh a ni tela an kalna pawh ni khatah lehlan a ni thei ta. Hei hian hriatna a lo zau avanga nun hmasawnna kan tithei ang le.

Ngaihdan huapzo:
Sap thufing pakhatah chuan “Hmanin tun hi a siam a, tun hian nakin a siam tih a, a dik thui hle mai. Hun hmasa lama zirna leh Pathian thu ngaihdanah chuan an la kil khat (one way) rin tlur a, vawiin thlenga a thing ringtute pawh kan la awm ta ve ang. Thu leh hla (literature)-in min tiharh atang phei kha chuan hriatna a lo tizau zel a, ngaihdan tam tak a sawhsawn ta hial reng a ni. Rev. Chuauthuama ziak ‘Ka Kal Zel Dawn’ tih lehkhabu leh Rev. Lalfakzuala ziak ‘Thuthlung Hlui Zirchianna’ tih lehkhabu chhiar phei chuan ngaihtuah tur tam tak min siam a ni.

Keini tlangmite hi changkang mek kan nih avangin fimkhur a tha hle mai. Thliarkar rilruin min la tuh nghet a. Kum 30 vel kal ta ngaihdan la vawng tlatte pawh kan la awm ta ve ang. Heng ngaihdan tizauva nunphung hmasawnna tur chuan ziak leh chhiar lamah leh hnathawh (work ethics) lama tan kan lak a pawimawh takzet a ni.

Thu ziak hian hna a thawh nasatzia tu’n kan hai lovang. Augustine-a chu ‘Life of Antony’ a chhiar atangin a nun a lo danglam a, Martin Luther-a paw’n Tauler thu ziak a chhiar avangin a nun a inlet a. John Wesley pawh Thomas Kempis-a ziak ‘Imitation of Christ’ lehkhabu a chhiar avangin rinnaa mitvarna a hmuh phah ta a ni. Chutichuan mit leh benga kan hriat thil changkang tak lo thleng zingah anchhe dawng lova malsawmna dawn tuma ke kan pen zel a pawimawh ta a ni.

Thalai Quavadis:
Kan rawngbawlnaah tun lai mil tawka nun thiam a pawimawh hle ang. Hmasawn kan dawn rual hian chhiatna hi a paipawn tel zel a. Mipat hmeichhiatna lamah te, ruihtheihthil lamah te, rilru lamah te etc.. hian fimkhur a tul ang. Zir sang leh mi hawi zau kan tam tial tial a, nunphung pawh a dazat lek lek tawh a ni. Khawvel finnaten min bawhbuai zel a, hriatna atang kan dawn lakah mawhphurhna lian tak kan nei a ni.

Lal Solomona kha nawmchenna tinreng a paltlang hnuin ‘Engmah lo mai’ a ti tawp a. Film star hmeltha vawrtawp Marilyn-i pawh mutthilhna damdawi a ei tam lutuk avangin a mu hlum a, khawvel hnehtu Alexander-a kha “Hneh zel tur ka nei ta lo” tiin lunghnurin a tap pur mai a, a va rapthlak em! Keiniho pawh hi khawi kawng nge kan zawh dawn tak le.

Tlangkawmna:
Khawvel hmasawnnain mi tin mi hrut zel a, dan rual a ni hek lo. Culture tharin min run mek zel a, ei leh in, silh leh fen, in leh lo, bung leh bel chenin a lo danglam zo ta. Tawngkam leh hawiher, chetzia leh ngaihtuahte pawh a life style zo vek tawh a ni. Kan hmuh duh zawng leh ei-in lah ni se a mak sawt ta hle mai. Hmasanga kan pipute hnam ro thil leh chin dante (tradition) pawh zawi zawiin a riral tial tial ta mai le. Mahse, kan dinhmun mila kan dawnsawn thiam a tul tak zet a, ni tina hriatnaa kan dawn, kawng hrang hrangah nun chhuahpui tham khawpa lak dan kan thiam chuan he lei hi thlamuang takin kan chen thei dawn a ni.

Thu lakna
1. Dictionary of Theological Terms, FATC, 2007
2. Tun lai khawvela Mizote Harsatna (2005) Rev. L.H. Rawsea
3. Hmasawnna lamtluang (2003) ATC, Venglai, Aizawl
4. An hnung tawlh lo (2003) ATC, Aizawl
5. Chhimbal (2002) KTP, Sateek.

LAWM THU I SAWI ZEL ANG

2009-01-04T08:25:00.000-08:00

by Zalianthanga, Tahan

I hnenah lawm thu kan sawi e,

Ei leh in silhfente nen;

Bouak thianghlim, ni eng ruah sur,

Malsawmna tinrengte nen

(Pastor C.Saikhuma)

Lawm thu sawi hi thil chakawm em em mah ni se, sawi thiam harsa tak a ni thung. Lawm rau rauah pawh lawm ve sathliah leh lawm tak tak a awm thei ngei ang.. ‘Ka lawm e’ tih hian a phenah tawngkama sawi chhuah zawh loh lawmna takzet pawh a awm thei tho bawk.Chu chu a dawngsawngtute azira lo awm mai a ni thin.

Engkim hian siam chhan a ni a, an tangkaina erawh hi chu a inang lo thung ang. Tlang tin mual tina chengte pawh hian kan awmna theuhah tih tur leh tih lo tur kan nei theuh ang le. Dam leh hrisel taka kan awm thei hrim hrim pawh hi Pathian hnena lawm thu sawi mawlh mawlh tlak a ni. Eng vanga nung dam nge kan nih a, eng titura awm ve mai nge ka nih?tia dam chhan hi ni tina kan inzawhna pawimawh tak tur chu a ni.

Ni eng leh suah sur, rawng chi hrang hrang, ei leh in, silh leh fen, boruak thianghlim kan hmuh leh kan dawnte hi ni ve tur rengah kan lo ngai pawh a ni mai thei . Chik takaa chhut chian chuan lei lam mawlsawmna chu sawi loh, chung lam malsawmna liau liau a ni kan tithei awm e. Heng baka lawmawm lehzual chu kan beisei phak loh, kan dil loh zawk malsawmna chen hian kan dawng thin a ni. Chu thu chu kan Bible-ah kan hmu thei a” Engkimah lawm thu hril fo rawh u; chu chu nangmahni lam thuaah Krista Isuaah chuan Pathian duhzawng a ni si a(I Thes.5:18) tih hi a ni.

Miten, thil eng emaw min pek a, kan lo dawnsawn hian ‘Ka lawm e’ tithei zel ila. Thl beitham deuh pawh ni se, a petu tan a pai a nuam a, a dawngsawngtu tan lah ngaihthlaka nuam em em mai a ni.’ Lak aiin pekin lukhawng a nei’ tih ziak a ni si a. Mite hnena lawmthu sawi hi a kha lova, a rawn let leh hian lawmna namenlo a thleng hei bawk a ni. Amaherawh chu, mite thil kan pek a, eng emaw kan tihsak hian beiseina lian tak rawn thleng leh tura ngaihna a awm thei bawk.Chu chu Lal Isua zia a ni lova, a dawngsawngtu chhungril hnathawh zawk hi a pawimawhna lai ber chu a ni.

Ei leh in tuihnai taka kan ei in thei te, che thei leh kal theia kan awm thei te, engthawl fahrana zun leh ek kan inthliar thei te, hnathawk theia kan awm thei te avang hrim hrim pawh hian lawm thu hi kan sawi mawlh mawlh tur a lo ni. Khawvel hmun hrang hranga buainate han thlir hian kan nihlawhzia a lang chiang em em mai a. Damdawi inahte kal ta ila,dam hrisel a hlutzia a lang chiang hle a ni.

Zan khat chu JohnWesley-a inah putar rethei tak pakhat hi a lo leng. Wesley-a chuan ‘Ka pu, I kawr hi a chhe tawh si a, hei lo hi I nei lo em ni? A ti a. Tin, putar chuan ‘Hei chuah lo hi chu kawr dang pakhat mah ka nei lo, mahse; he mi avang hian Pathian hnenah lawm thu ka sawi a ni’ tiin a chhang a.

Tin, a zawt chhunzawm ta zel a,’chaw ei tur I nei em? A ti a,’vawiinah tuisik in tur mai lo chu ka nei lo. Mahse, ka neih chhunah chuan Pathian hnenah lawm thu ka sawi a ni’ tiin a chhang leh a. Wesley-a chuan a zawt leh a, ‘khua a tlai tawh si a, mutna tur a nei em? A ti a. Putar chuan,’mutna tur lungphek pakhat ka nei a, chu mi avang chuan Pathian hnenah lawm thu a sawi dawn asin’ a ti leh mai a. Tichuan, ka taksa leh ka nunna hi rawngbawl chakna thinlung mi pek bawk avangin A hnenah lawm thu kan hril fo thin a ni; tiin putar chuan a chhang leh ta a’. Wesley-a rilru a hneh hle a ni.

Kristian kan inti a, sum leh pai zawn chungchangah hleprukna hian bu a khuar em ni chu aw a titheih ta hial mai. Lal Isua hi hawlhfung hmanga sawm zawn te, mangan nia Pathian au lawm lawm si a, dinhmun a lo san deuh va, theihnghilh ta mai angte hi ringtu nun ziktluak tih atana mawi lo tak a ni. Mizo Kristiante hian Van ram hi kan ngaizual bik em ni a titheih a. Kan hlate reng reng hi han chik chuan, van ram ngaih hla deuh vek ti ila, a sual tam awm lo ve. Van ram kai thu chu lo dah tha ta ila, lei malsawmna kan dawn laia nun hlimawm kan neih theihna tur hi kan ngaihtuah a pawimawh hle a ni.

Kan mihringpuite hi inlawm tawn vek tur kan nia, mamawh huna intanpui tawn theuh tur kan ni. Manganna leh chhiat tawh chungchanga minte kan chunga an lo thatziate hi a ropuiin a mak zawk hial a ni.He fiahna hi a changtu tan lo chuan hriat thiam a har hle ang. Kohhran leh khawtlang duhsakna avanga din hmun sang zawk leh malsawmna eng emaw kan dawn te hi han ngaihtuah chian chuan kan nihlawhzia a lo lang leh thin. Lawm thu sawi tur hi a lo va tam tak em.

Ni e, a chang chuan hring nun khel mualah hian hmun thenkhatah ruah a surin ni a sa thin a, hei hi lei mihring ze pakhat a ni fo. Chutiang vekin kan thiltihnaah harsat chan a lo awm mai thei, heng lakah hian a thim zawnga thlir lovin a eng zawnga kan thlitfim thiam a pawimawh em em mai a. Tirhkoh Paula’n ‘ka tlakchham thu sawi zawng ka ni love, kei zawng eng ang pawhin awm mah ila, lungawi zel ka ching tawh si a’ a tih angin lungawina tluantling kan neih theih nan i ngaihtuah tlang ang u.

LWY ZAIPAWL [VENGPUI] VOL-1 "LALPA LO KAL LEHNA"

2008-12-13T00:49:00.000-08:00

Wesleyan Kohhran Thalai Zaipawl VCD album thar "LALPA LO KAL LEHNA", hla 12 telna chu 9 December 2008 ni atangin theh darh ani ta.

1. Lalpa kan Pathian
2. Ram tinah
3. Engkima min Muantu
4. Lalpa lo kal lehna
5. He khawvel hi
6. Thangvan khawpui
7. Pumkhat kan ni
8. Bible thianghlim
9. Hnehna chu Lalpa ta
10. Chhuan ninawm loh
11. I thu hi
12. Inneihna hlimawm

Hla siamtu - Marvin Lalhrilliana
Guitars - Zaitea
Bass - Hlimtea
Drums - Bawla
Keyboard - Zaitea

Studio - Studio 8 [24-Track Digital HD]

Cameramen - Mawitea [Hello], Babuu [Minuamsa], Sangtea and Hlimtea
Video Edit - TSO Digital Creative
Director - Ni Lian Sang

HRANGHLUI ZAITHIAM DANG LAM [Sweet December LIVE SHOW]

2008-11-17T04:36:00.001-08:00

Zoram khawvela lo lar tawh hming chuai lo tur, Kawlphai Zofate channel chu phochhuahin a awm dawn ta! Hranghlui te an Live Show chu Zofate awmna hmunah tlangzarh a ni ta! Hranghlui leh Thangthar te chetzia chu i en anga, i hre mai ang chu.

Heng te hi an ni e:
Pachhunga [D loh D]
Hmingliana [Vulmawi]
Thangluaia [Zodi]
Darsiamthanga [Zonun]
Lalnunsanga [T.Melody]
Zaithanmawia
Zaidinsanga
J.Malsawma
Zaivulliana
H.Nghaki
Lalhlunmawii
C.Lallawmzuali
lalrinzuali
Zodithangi
Malsawmtluangi leh
L.C.Sangi

Studio - Studio 8 [24-Track Digital HD]
Producer - TSO Music Production
Director - Ni Lian Sang

I AM SORRY, YOU ARE MONKEY [Kan Inpuang Zel Dawn]

2008-11-05T04:18:00.000-08:00

by Zalianthanga, Tahan

Tun tuma kan thil puan tur erawhchu a pui hem hem dawn asin. Dawt a tel lo ang a, anihna ang angina kan pawt kual mai mai dawn a ni. Zing tawh fuih loh avanga tum ber bur ang velte pawh kan dem dawn chaung hek lo. A tlak tlak loh loh vannei kan tizawk ang mai chu maw.

In tifel nazawngin fel nih an hlawh kher lo va, a che sual ve thei tho a ni. Kan thenawm pavana kan tih pawh hi inbualna roomah hmanhmawh zetin a inbual sawk sawk a, a sira inzar under-pen pakhat chu an tae maw tiin a ha ta mai pek a, a thim tawh bawk sin nen a leng chhuak ta mai a, a pen zawng hian a under-pant a tawlh thla leh thin a, a ruk te hian a pawt chho leh thin a ni awm e. A tawp a tawpah chuan a ngaih tha lovin an en chiang ta a, a ni; an nu under-pen hi a lo ha reng mai a lo ni ang a. Zia lo a ti ve naa , a thianten hria lo turah a ngai a, a hnuah an hre leh tho tho bawk si. Tihngaihna awm tawh hek lo le.

Pavana bawk hi alawm, tifuh lo leh pek chu. Tuna thuziaktu hi lu met thiamah a ngai tlat mai pek a. Vawi duai lo a ngen hnuah chuan a met ta nge nge a. A vawi khat metna tur a nih avangin a huphurh nangiang mai. Pavana chu uluk tak mai hian a thu tung ta run a, kan han tan ta chu a ni a. Vawi khat kan han hlawi tan a, a vawi hnihnaah chuan, a aiin a lo ei hek ta hluai mai. A inkhuangrual tawk tur chuan kan hlawi leh kan titeh naa, a hma aiin a ei khuar ta telh telh ta mai, tlem chuan kan inthlahrung tan tawh a ni. Thaw lak phah chuan kan han thlek vel la, lung a awi thiei ngang ta lo a ni. Khaw nge tit a sa sa tiin, tuaihnum leh kan han tum leh thin naa, a zualzapui vaihlenhlo tih ang maiin pangang ei ban a ang ta deuh deuh tawh mai sia. Duh tawk rih mai ang tiin chawl zai ka rel felt a a. Duarthlalang lain a han inen kual ve chu, tha thawkhatah a ngai nifahming. I hi. A that dawn hi ka tih nak alain nu ber vanranda-a lo chhuak chuan thinrim titih hian a rawn nuih vel chu, boruak a fel ta lo. Tihngaihna hre lo chuan ka haw ta ringawt a. A tuka a han leng chhuak chu a hmu a piang hian an lo nuih tet tet hlawm pek a. A tihngaihna hre lo lutuk chuan met kawlh law law mai a ti a, kan met kawl ta ringawt mai a ni. Biak inah pawh lukhum a khum ta vu vu mai a nih chu.

Pu Zamlova kha a haihawt ve hle ni tur a ni. Thirisakawrin Bazaar-ah a kal tum hnih meuh a thirsakawr a theihngilh tawh a, tlaia a leng hawng hi tute meitalh emaw pathum li vel hi a hum haw deuh reng thin a, a tukah a hriat theih chin chin a sem kual leh thin a ni.Tin, Bazar-ah tum khat chu a nu kawr ang chiah hi mu pakhat hian a lo ha a, an nu emaw tiin en chiang ta hlei lo chuan a be mawlh mawlh mai a, a biak nu lah chuan mak tiin a en ang hu hu a, a awmzia a hre bik si lo, a hnu deuhah chuan ‘nu ber min va chhang lo em em ve le? Tiin a han mel chu mi dang a nit a daih si a. A zak lutuk tihngaihna hre lo chu kawng thlangah bekang fun a lei kual ta mai mai a nih chu.

Kan thianpa Te-a kha a che sual ve lulai khawp mai. Thingpui dawrah intithei fe hian Coffee-mix a chah a, a funsa-a rawn dah an ni bawk nen. A hawn dan a thiam ta lo, a sik kual, a sik kual ta mai. A thianteho lah chuan a an in hem hem tawh bawk si, a zak ang reng tawh bawk si , a ha-in a han pet kual leh thul, thiante a la nghawk zui. A che fuh lo ang reng asin. Chu mi hnuah Monghingkha(Chau) a chah lehnghal a, fian rawn chhawp ta lo chuan hmawlhte pahnih hi an rawn chhawp a. Hmawlh-fian a vawi khat hmanna a lo ni vei nen, thawk khat buai chuan ka buai leh dawn a ni tih chu a hai lo chiang kher mai. Le…. Hmawlhte chuan a han pir vel chu, a chep fuh hlei thei ta lo. A kut a aikhirh titih ang reng bawk si, a han chep leh thin, a pir fuh thei chuang ta lo. A pir fuh chhun lah chu a per leh nawlh thin si a, a tawp a tawpah chuan a kutin a bar lawih ta mai a nih chu. A kaw lo ve hrim hrim a ni.

Pu Zuala pawh kha tifuh lo bawk. Mission Veng Biak inah a inkhawm tum khan Hla Bu en reng chung si hian a sa sual tlat pek a,”Ama hnenah kan tawngtaiin, kan tawngtai loh avangin” zu ti reuh a mawle. A nikhua lo a sin aw. Varparh Veng Kohhran Upa pakhat pawh hi a Sermon-naah "Kei leh ka chhungte erawh hi zawngin Lalpa rawng chuah a nia kan bawl dawn ni," tia Tirhkoh Paula lo sawi tawh ang khan, zu ti piap piapa maw le. Leh ta mai mai thin a (A ni Josua sawi a ni reng si a , a pau chiang ve asin). He mite Venga Upa pakhat pawh a inkhawmnaah a Chairman a, ban hla kan sak zawhah kan Pastor-in “Lalpa tawngtainain min tin dawn a nia” a ti a. Hla sak zawhah Pastor a rawn ding ta, Kan pa Vana mi….. tiin an sawi thla ta zel a, …..lei a min ti rawh se… a tih zawhah a theihnghilh tat lat mai , a ngawi vung vung ta mai a, chu tia ngawi ta chu Pi Siami lah chuan a hnuk a ulh emaw tiin Haleluiah a pe thuai thuai mai chu, a tu lo teh asin; insum a har ang reng phian. Bahlah tak chung chuan a chham chhuak thei ta hram a ni.A hmai a sen up up mai tih lohah chuan mit lovin a meng ngam hlawl lo a ni. Nang, han sawi chhuak thut dawn thei le?

Tin, tum khat chu Sakramen kan kilho alawm. Pastor chuan Grape tui a rawn sem ta, ka bula mi chuan vawi-leh-khatah a tlak pup mai ta si a. A bula mi pawh chuan tlak ve pup tumin a han hmuam pawk a, an lem thla tur chu a hak ta alawm, a rawn phuh chhuak ta. Kan inmelh kual zuk zuk ta hlawm a, a thu tak hlei thei ta lo, kan nui ta hak hak mai, chu ti lai chuan ka piah lawka mi lah chuan a pum chhung atang hian a rawn ri ta kuar kuar mai bawk nen, kan insum zo lo hlawm a ni ta ber mai. Chuta chhapah a chhang sem lah chu a lem nghal mai theih loh avangin dangah a la tang zui. A tawpah zawng Pastor pawh a insum zo lo thelh a ni a. Amaherawh chu eng emaw ti ti chuan kan tlingtla ve thei tawk chu a nia.

Vengpui Upa pathum ten mo atan be turin palai an kal a. An kal tur lah chu hre chiang mang hlei lo hian zawt chawp turin an rin kal mai pek a. Zan a ni bawk nen, titi pah chuan an kal chho zel a, in pakhat Mei chit enna bik, awmhonaah chuan an lut ve tawp mai a.In neitute lah chuan 'E… lo leng rawh u…' tiin a lo chiauau a. A nakin lawkah chuan an kal chhan chu an sawi tan ta a le…. Inneitute lah chuan an lo hre der si lo. An hrilhhai tan, an han zawt zau ta chu ‘A ni , chhungkhat unau chaw kilho thufual’ lek hi a lo ni a, palai kalte chu zak em emin an kalna tur zawkah chuan an kal chho leh ta a ni awm e. Mo chhungte chuan an rawn kal tawh dawn lo emaw tiin an lo mangan nasa hle hman a ni. Palai kal sual kan tihphah ringawt mai a ni. Kawlkulh Upa pakhat paw’n khual khuaa an chhungte thi zanah a han kal tumin Mei eng awm hmasa inah lut chawtin a han tah ringawt a ni awm a. In neitute lah chuan ‘Ka pu, hei lai a ni lo, khi lai zawkah khian a ni zawk e’ tiin an lo hrilh a. A kal leh ta mai a ni awm e. Hnarin arbawm a tiat duh ngei ang. Zia lo ve tak chu a ni.

Tun tum atan chuan duh tawk rih phawt mai ila, lehpekah kan la chhunzawm leh dawn a nia. Thil thleng mak puipuite pawh khawrh chhuah tur kan la nei tentung a, khek rih phawt mai teh ang. Bawkkhupin mangtha le...

TAHAN BAZAR THIL MAN RATE-TE [October 18, 2008]

2008-10-22T06:58:00.000-07:00

by Zalianthanga, Tahan

A hmasain kan hriattheih dan tur chuan thil man hi a danglam zel bawk si nen. Tahan Tiau Motor chuan man pawh singkhat vel a ni a, cheng thleng erawhchu India Rs.100 chu Burma 2600 vel a ni a, heng thil rate hi thla kumkhat dawn vel a vei a, a chang leh a sang a, a chang leh a hniam leh thung. Tin, Tahan atanga Tiau (khawmawi) kawng erawhchu a tlangpuiin a chhe deuh reng. Sik lehsa chungchangah a la sa thei hle a, zing lamah chuan thlasik rim a nam deuh ek ek tan tan. Engpawh ni se, a hnuaia kan tarlan tak hi a chunga ni leh thlate huna kan hriat theih a ni tlangpui e.

Badam hriak (Pesi) bukkhat K.4200
Dut (Bawng lu chuang) burkhat K.800
Raja funkhat K.100
Ajinomoto (Sasa) fun lian pakhatah K.1100
Lipo(Lawi chuang) burkhatah K.600
E-lan sahbawnphut(200g) funkhat K.300
Sahbawn rimtui(Family Care) a lian pakhatah K.450
Imperial 90g K.300
Mami Khauhsuai funkhat K.150
Coffenix funkhat K.100
Sahbawn suiwa tlawnkhat K.250
Kabawleih tlawnkhat K.500
Chini bukkhat K.800
Kalape bukkhat K.1300
Sam Hena lian funkhat K.350
Sanghatin lian burkhat K.650
Asia Pinhmeh burkhat K.150
Vegas Sirek burkhat K.500
London sirek burkhat K.1000
Sui Uh Dawng mei zial pahnihah K.50
Meizialte telkhata 5 awm K.50
France ballpen pakhat K.100
Lisa Hasiai lian burkhat K.400
Best-T lian pakhat K.600
Hanawhna pakhat K.200
Miss shampoo dawrzawn khat K.400
O2 dawrzawn khat K.550
Jumbo thosi hlo box khat K.350
Thidamna (SHE, E-va, comfit) funkhat K.400
Thingpuyife (Sawbuagyi) a liana fuinkhat K.250
Samdumna pakhat K.150
Tisung Datsa funkhat K.150
BPI fuinkhat K.350
Thingpui nokhat K.200
Chhang pakhatah K.100
Munghingka (chau) a toh puai khat K.300
Sanpiauh puai khat K.200
Chaw vawikhat ei (takhapin) K.300
Buhfai pyi khat (Iyamin) K.900
Petrol (Diesel) um khat K.1000
Tahan atanga Khampat (mel 45) Bus chuan man mi pakhatah K.1500
Tahan atanga Kawlpui (mel 3) Tax fair mipakhatah K.500
Tahan atanga letpanchaung Bus fair K.500, Bike-in 1000
Banhla thlar (phichian) K.300
Vaimim pyi khat K.400
Pesen (be) pyi khat K.900
Ngahpih(winthi) funkhat K.150
Kuva khawr 4, K.100
Center fresh (PK) pakhat K.50
Sweet (Yess) funkhata 50 awm K.200
Chi funkhat (tical 35 vel) K.400
Khaini burkhat K.300
Vawksa bukkhat K.5000
Bawngsa bukkhat K.6000
Arsa leh Sangha bukkhat K.4000
Chakai pum 10, K.100
Chengkawl no khat K.150
Tui thianghlim litre 20 leng burkhat K.350
Zana mei eng (private current) lak man (feet 2 bulb) thlakhatah K.3000
Kurtai bukkhat K.1200.
Datkhe (Power Battery) pahnih K.450.
Thlalak pakhat tlan man K.500
Thlalak pakhat sil man K.100
Gas lighter pakhat K.150
Balet funkhata 6 awm K.200
Bekang funkhat K.150
Bekangsa bukkhat K.1800
Bawkbawnthur bukkhat K.500
Alu bukkhat K.600
Hangbo (iskut) bukkhat K.400
Vaihlo nokhat K.250
Artui pumkhat K.110
Hmarcha phut no khat K.500
Zikhlum bukkhat K.300
Parbawr bukkhat K.500
Aieng nokhat K.300
Bawnghnute nokhat K.300
Sanghate nokhat K.300
Bawkbawn bukkhat K.400
Thirsakhawr (Hero) pakhatah K.100000
Panbein pakhatah K.250000
Bike (Jialing) pakhatah K.Nuai 7(Laisen awm)

Heng hi a tlangpuia kan lak thuak thuak a ni a, tihsual palh a awm mai thei e. Dawrkai Nl. Mami hnena thu lak a ni e.

HRINGNUN HMASAWN NAN ZIRNA

2008-10-14T10:17:00.000-07:00

by C. Lalrinsanga

Thuhmahruai: Mihringin zir lova a thiam awmchhun chu ‘tah’ hi a ni awm e. Hmasawnna tur kawng dap leh zawn tum lo chu ‘mi a’ nileng an ni. Mihring chuan hmasawn dan tur kawng hrang hrangin a dap thin. Chung hmasawnna tur thilte chu benga hriatna ringawt hi a tawk lova, thiam a ngai tlat a ni. Thiam tur chuan zir a lo tul leh a. Chuvangin hringnun hmasawn nana pawimawh ber chu ‘zirna’ hi a ni. Tun tumah hian hringnun lam sawifiah kan tum lo va, a tihmasawntu ‘zirna’ chauh hi kan bitum ang. Zirna hlutzia leh hringnun a tihhmasawn theihzia chu kheh chhuah kan tum dawn a ni.

Hringnun hmasawnna thuruk: Mihring chuan a chhia leh tha hriatna zawng zawng sawm khawmin hmasawna changkan zel tumin theihtawp a chhuah thin. Chu chu mihring nihphung dik tak pawh a ni. He khawvel hi mihring kan nih chhunga Pathianin ro min pek a ni a. Chutah chuan hringnun hmasawnna thuruk a awm a ni tih hria a rilru leh tihtak zeta dap a, hriat leh thiam tuma zirtu chuan hei hi a hawlh chhuak thin. Ani chuan khawvela thil zawng zawng hi zir tura khat a ni tih a hria a. Tichuan hreawmah pawh a bei fan fan zel a. Mi hmasa, fing leh rilte thu hla chu hriat tuma pachuau sual anga a sual peih avangin a tawpah chuan thuril tak takte hmuh fiah theihna tarmit a lo nei ta a, tlangsang chapona a beng hniam a, vur ram vin takte pawh chu a vau zam ta a. Tuifinriat leh a chhunga biru bote pawh a hai chhuak a, van boruak ropuina inthup a tarlang a.

Tin, puithuna atthlak tak tak a hnawt bo va, kawi sarih en thei khawpa hmeltha Lianchia lem thluk zawh loh tur pawh a lem thlu thei. Chu chauh chu a ni lo, a mihringpuite mak tih khawpa thil a lo tihtheih tak avangin a lamah mi’n beng an lo chhi a, ram leh hnam thlamuantu leh timawitu a nih bakah sorkar leh khawtlang mit leh beng, kut leh ke a nih avangin a kianga awm an thlahlel em em thin. An rinchhan ber khaw dai ngul a ni bawk a, mi zah leh ngaih ropui a hlawh ta thin a ni. Chu achhapah, a ei zawnna kawng hrang hrangah tangkai taka a chhawr thiam bawk chuan he khawvel hi a tan chuan Sekibuhchhuak a ni ringawt mai. Chu hringnun hmasawnna thuruk chu engnge ni? kan tih chuan heng zirna kawng hrang hrang hi ni bawk mah se a bik taka a thuruk funtu chu ‘zirna bulthut’ (Basic Education) kan tih ni tin sikul zirna hi a ni. He zirna bulthut hi thlarau leh tihtak zeta zirtu chuan hmasawnna thuruk a chhar thin a ni.

Zirna bulthut (basic education) chu engnge?: Zirna han tih hian a huam zau hle a. Chu chu kawng hnihin han then ta ila. Pakhat chu hnathawh thiamna atana zirna, a practical-a zirna leh thil nih dan leh awmzia, a theory lam thiamna tura zirna a ni. Chumi pahnihah chuan a theory lam zirna hi kan sawi tum ‘zirna bulthut’ kan tih chu a ni a. Chu zirna chuan hriatna a pe a, hriatna chuan finna a thlen thin. Chu finna chuan hriat leh zualana a thlen a, chu hriat belhchhahna chuan finna a belhchhah zel thin a ni. Mahse, zirna chuan finna a paawh phak loh chuana a tangkai lo chauh ni lovin a lo hnawksak thei hial a ni. Zirna atanga lo rah chhuak finna chuan kan ni tin nunah kawngro a neiin a tangkai thei tur a ni.

Zirna bulthut kan tih ni tin sikula zirna chuan mihrign a tihhmasawn dan chu mithiamten tihian an sawi a; “Sikula kan lehkha zirlai 80% (zaa sawmriat)-in kan thluak a siam tha a, 17% (za sawmpasarih)-in kan nungchang a siam tha leh a, a la bang 3% (zaa pathum) chuan kan thlarau nun a siam tha a ni” tiin. Chuvang chuan hnam changkang leh ram ropui kan tihte chuan he zirna bulthut hi hringnnun chawm len nan a pawimawh ber a ni tih an hria a. A hlawkna tel tumin vawiin thleng hian tha thlah miah lovin an la bei ngar ngar a. Mizotena kan ngaih ropui em em ‘Sap’ kan han tih bikate phei hi chuan an zir thiamna avangin khawvel hi an chhek ar bawm a ni ta ber mai. Keini pawh hian kan Pathian chhang(dawttu) en ti ila a sual tam lo hle ang.

Hruai thlen a tum chin chu: Kan sawi nual tawh na a, mahse zirnain min hruai thlen a tum chin kan hriat a tul tlat. A hmasa berah chuan zirna hian mi puitlinga min siam a tum a. Taksa leh rilru hi inrem thlap leh ziktluak taka thanlentir a tum a ni. A awmzia takah chuan ran hi mihringah siam a tum a, mihring hi Angel-ah, a tawpah Pathian ang min nihtir a tum a ni. Thil tha hmuh ngawtah hi chuan ran nen kan lem chuang lo. Thil tha tih hian mihring min nihtir a, awm that hi chu Pathian anna a ni tawh a ni. Hei ngei hi zirnain min pek a tum chu a ni a. Kan zirna hian heti zawnga min chawikan loh chuan dik lo a awm a ni thin.

Tin, zir thiamnain a tum chu mi tling lo leh tlaktlai lote mi tlaktlaia siam hi a ni bawk. Mimal nun siamthata tawp mai lovin ram leh hnam leh sakhua chena chawikan tumnaah thiamna rilru chu a thang zel thin. An lo sawi thin angin “Thiamnain a tum ber chu mihring pum (workshop) siam hi a ni,” a ti. Kan zirnain ram leh hnam tana mi tangkaiah mi siam loh chuan kan hriatna chu a hlawhchham der a ni ang. Hriatna leh thiamnaah mi chu a lo thuk deuh deuhvin mihring leh khawvel, leh Pathian inlaichin dan a hre tial tial a. A zirna chuan a rilru a tieng a, kawng dikah a hruai zel thin.

Zir thiamna dik takah chuan nun dan tha hi a lo chhuak ngei ngei a. A innghahna lungphum thuk tak atanga tan lain mi thiam chuan he khawvelah hian nun ze mawi tak a rawn sin chhuak thin. Thutaka a innghah avangin a nun zia a dik a, nungchang tha a nghenchhan avangin a hnathawh pawh a tlo thin a ni. Chuvangin a zirlai chuan sakhuanaah a hruai lut a. A hriatna leh finna chu amaha pumbil mai a duh lova mi dangte tan malsawmna ni turin a nung thin.

Kan hun tawng leh zirna: Tun laia zirlai tam zawk chuan an zir chhan leh zirnain hruai thlen a tum chin pawh hre lo leh ngaihtuah lova pawngpaw zira zir an tam ta hle. Thenkhat chuan zirlai nih hi inchei nan an hmang a. A thenin hnathawh pumpelh nan an hmang bawk a. Kan duh tawk chin leh kan tum pawh hi a degree chauh hi ni berin a lang ta. He rilru hian thatchhiatna nasa takin a hriang a. Hriat leh thiam tumna aiin exam pass tumna a tilian a. Chu chuan entawn leh copy-a pass tumna a hring thin. Tin, lehkhabu pakhat pawh chhiar chhuak lova Matric pass, B.A leh B.Sc. degree nei thei nih kan inlawmpui chhung chuan ‘zirna’ chu finna neih nana hmang hman kan tum lohzia a tilang chiang em em a ni.

Hetiang vel kan nih avangin kohhran leh khawtlanga chhawr tlak loh leh hman tlak loh degree nei kan pung ta hluai mai a nih hi! Mi chuan an lehkha thiam an dinchhuahpuiin hma an sawnpui a. Keini chuan kan lehkha zir hi kan la chhiatpui ang tih pawh hlauhawm tak a ni. Kan lehkha thiam neih ang deuhva kan ente lah hian ram leh hnam chenfakawm zawnga nun ai chuan mite chaldelh nan an la hmang leh nghal a. Keini zawng a letlingin hringnun kan hmang ta a ni ber mai tawh e! Mi chuan zirna rah chu hnathawh kawrah an hmang a, keini chuan zirlai nih leh kan pawl san chu chhuanlamah siamin mi dang kan tihek leh fang a ni.

Chuvangin, kan inen chian chu a tul tawh a ni. Hetianga kan kal zel chuan thiamna tak tak zir chhuak si lova pawl sang kan pung zel ang a, mahni intodelh tum lo zirlai kan tam telh telh bawk ang a, engmah thawk thiam lo degree nei kan lo ngah viau phei chuan kan hnam hian tuna kan thawh rah hi thlum ti lo zetin kan la ei ang a, phur lo takin kan la seng dawn a ni.

Tlangkawmna: Kan sawi tak atang khan zirnain a tum leh hringnnun a tihhmasawn dan tlangpui chu kan hre tlangpui tawhin a rinawm. Sawi tur a tam hle a, mahse tun tumah hian sawi kim sen a nih loh avangin zirna hlutzia leh a tumte chu kan Chhura favang buh thlir thuak thuak chauh a ni. Kan thu khaikhawm nan hei hi ni rawh se: Zirna chuan mihring min tihmasawn a, chu chu hriat a tawk lova thiam tura zir a ngai a ni. Pawl sangah kan induh tawk mai tur a ni lova thiam, tumin kan zir tur a ni. Tun laia zirna lama kan intlansiak dan system hi a felhlel deuh a ni tih pawh kan hriat a tha. Keini hnam tlem te hian khawvel her ruala inher ve zel tur chuan lehkha kan thiam a ngai a ni. Zirnaah tlai luat a awm lo an ti thin. Mahse, keini ang hnam fahrah tan tlai nul nul chu thil tih chi a ni lo. A hun taka bak leng mei pira tlan vung tum tur a ni. He zirna hi tih tak thlaka kan beih ngat chuan he ramah hian kan te ber tawp lo vang. Kan kan zir thiamna chu hnathawh kawrah kan hmang tur a ni. Hriatna hi theihnain a tifamkim thin a ni. Zirna kawnga mi hlawhtling mithiam tak tak chuan nun hlimna thuruk a chhar thin. A hlawkna chu amah chauhvin a tel lova, ram leh hnam pawhin a ropuina chenin a lo tel ve nghal a ni. Kohhran leh khawtlang a tithlamuangin a timawi a; tin, kawng dikah hruaiin a tichangkang thin a ni. Chu zawng zawng bul chu kan Pathian hi a ni tih kan theihnghilh tur a ni lo. Pathian tel lo chuan miin a hriatna a dinpui zo ngai lo. Pathian tel lova hriatna khawl khawm vak hi chu ramhuai tihlenna mai a ni a, Lalpa tih hi finna bul chu a ni e.

I DUH CHIAH MAW

2008-10-06T11:34:00.000-07:00

by F. Lalrammawia

Heti zawng hian hma i’n la tan daih teh ang: Mi zawng zawng hian mahni nun dan theuh kan hriat fiah theihna turin ni khat chhung chauhva kan thil tih i ziak theuh teh ang u. Hmaih nei reng reng lovin i ziak chhuak fai vek ang aw. Entir nan: Tlangval pakhatin a ni khat chhung hun hman dan a ziak a, zep ruk a nei lo.

“Tukin chu ka tho tlai deuh va, zing dar 8-ah ka tho tawp a. Ni zanah zu ka in tam deuh avangin ka hai chhu mai. Ka nu pawhin “Zu rim i nam vung vung maia ka luak a tichhuak e” a ti a. Mahse ka inthlahrung chuang lo. Ka thawmhnaw ka inbel sawk sawka in atang chuan ka chhuak leh ta mai a. Zu hmun bawk ka pan leh ta a ni. Zu man pawh ka nei a ni lo, a bain ka in leh ta phawt a. Tukthuan ei hun pangngaiah pawh chaw eiin ka haw lo. Nilengin hna pakhat mah thawh ka nei bawk lo. Ka zu inpui thiante nen engmah thawh nei lovin kan khawsa nilung leh ta mai mai a. Tlaiah zu nam phual chungin zanriah ei turin ka haw ve leh ta ringawt a, ka chaw ei pawh chu ka kun chhur a. Ka ei khama ka kalchhuak leh ta thuai a. Zu zawrhna hmunah kalin ka in belhchhah leh hlek a, zu man chu ka bat belh leh ta a ni. Tichuan ka thian zu rui ve bawkte nen nula zahawm em em bik lo kan rim a, tawngkam ho tak tak kan chhak chhuak a. In neitu chhungkua zah der eihna pawh kan nei lo. Tichuan zan rei lam deuhvah khawlaiah kan au thler duar duar a, miin min nin dan tur kan ngaihtuah reng reng lo. Ka zu ruih a reh ta deuh tihah kan in lam panin ka haw ve leh ta ringawt a. Ka pa’n min lo hau va. Ka pa chu zah nachang ka hre miah lo. Ka pa tawng aia ring leh vin zaawkin ka chhang tuar tuar a, ka pa nen chuan kan insual lo chauh a ni ringawt mai. Tichuan ka mu leh ta ringawt mai a ni,” tiin a ziak a.

Chhiartu duh tak, ngun takin i ngaihtuah tlang teh ang. ‘I duh chiah maw?’ tih hi nangma nunah lalut hmiah rawh le. A chunga tlangval pakhatin a ni khat chhung nun a ziak anga nung hi mi engzat nge awma i rin le? He tlangval ama Diary ziaktu ngei hian a fapa a lo tlangval hunah amah ang chuan rawn nung ve chiah sela, amah ngei chu tar upa lam a nih hunah a fapa chuan zah eih lovin rawn ti ve pap pap sela. Chutih hunah chuan a fapa chu thahrui lamah chak zawk tlat tawh mai sela. Hmana ama Pa, zu rui chunga a ngam em em ang khan rawn ngam ve hle mai sela hrehawm a ti hle mai lovang maw? Chu chu alawm “I duh chiah em?” kan tih kalhmang chu.

‘Mahni inhmangaih lo tunge awm ang?’ kan ti theuh. A dik kim meuh vem? Tunah hian mahni inbih chiang ta theuh ila. Zu ina rui reng mai pawh hian mahni inhmangaih a inti ngei ang. Mahni thawh chhuah chhun Money atana hmang zo zel, ei in ral hmiah hmiah mekte pawh hian mahni inhmangaih kan inti tho zel chu ni fahmiang. Silhfen tha leh mawi apiang inbelna atana sum leh pai hmang hem hemtute hi mahni mawina tur ngaihtuah nafam chu mahni inhmangaih an inti lo thei lo vang. Mahni nuam tih ang anga awmte hlei hlei hian mahni inhmangaih thiam hlei hleiah kan inngai a ni mahna! Mahni inhmangaih na na na chuan mahni duhzawng an tih loh nakah. Mahni tui tihzawng apiang ei leh in a, mawi tihzawng apiang silhfen lei zela inbel hmiah hmiah mai chu mahni inhmangaihte nun a ni chiah mai. Eng hna mah thawk lova leng rawlai mai mai leh awm-awl mai maite hlei hlei hi mahni inhmangaih an inti ngeiin a rinawm. Engkim maiah mahni hma sial thiam hlurte hi inhmangaih inti lo awm tak ang maw? An ngaihtuahnaah mahni tana tha tur, mahni tana hlawkna tur, mahni tana chan thatna tur leh mahni lawmna tithei tluka mahni inhmangaih thiam nun a awm chuang dawn em ni? I lo ti chhar chhar a ni mai thei. “I duh chiah maw?”

Chhiartu duh tak - Ngaihtuah chiang la, ngaihtuah chik tak tak la, ngaihtuah nawn fo rawh le. Tunah khan i duh duh i ei pep pep mai ti raw. I mawi tihzawng apiang hlah tum lova leiin i ha a, i feng a, i inbel zel mai maw? Money i ak teuh va, hausa tak angin i hmang hiau hiau zel bawk em ni? Hna pawh thawk hlei lovin ni tin i awm thei bawk. In in, nangmahni in ngeiah khan i lut zeuh zeuh lekfang em ni le? Tukthuan leh zanriah chu Hotel-ah ei lawi si lovin in inah tho maw i ei zel si a? Zu ruiin in inah i haw fo va, i nu i zah lova, i pa i zah bawk lo vem ni? Tuna i awm dan chiah kha ngun takin inen chiang rawh le. Fanu fapa i nei tawh em? I fate kha an nula tlangval tawh em? E, naupang chhia mai an la ni a, an la ngam lo che a, an la hlau che a ni mai thei. Nge, nupui pasal la nei lovin i la awm em ni zawk? Tuna i awm dan ang chiah khan i fate rawn awm ve sela, rawn nung chho ve sela tha i ti ang em? I duh chiah maw? I nulat lai, i tlangval laia mahni hma siala nu leh pate leh chhungkua, inchhung khur tan engmah i ngaihtuah duh lo ang ngat khan i fate chu rawn nung chho ve turin i duh chiah tak tak maw?

Chhungkaw neinung leh awm thei kan tih, sum leh pai intodelha a tui tui ei thei leh an duhzawng apiang nei thei kan tihte hi tu thawh chhuah ber nge, an hausakna chhan ni ang aw? tia ngaihtuah mai mai chang ka nei fo va. An nu leh an pate zara neinung leh hausa an nih ka ring ringawt a. An fate zara neinung leh hausa tate pawh an awm tho ngei ang. Amaherawhchu, a enga pawh chu an neihnun chhan chu lo ni ta sela, nu leh pate huhang chu a tam ber tho tho ka ring tlat pek zuk nia! Mihring tung chhova piang tawh reng chu anmahni hringtu nu leh pa awm lova lo piang ngawt, lo chawr chhuak tawp tumah kan la hriat ngai loh vang a ni. Engvang pawh chuan lo neinungin, hausain lo awm thei ta viau pawh ni raw sek sek, neih chen ni awm taka tlaran fahrana nun hi chu chhungkaw tin tan a thatna reng reng awmin ka hre ve tlat lo.

Zep tur a awm lo. Zep theih pawh a ni hek lo. Nulat tlangval hun, kan vanglai hun na na na hi chuan kan engthawl em asin. Pawisak nei thiam zawng an awm ngei tak a, pawisak nei hranpa lem lova tal hawr hawr erawh kan tam zawk a nih ber hi. Neinung fate zinga thalai tam takin hna thawk lova hun an hman ral mai mai laiin, mi rethei chhungkaw kara nula tlangval tam tak zingah hnathawh tum lova tei rawlai mai mai hmuh tur an tam tho zuk nia! Chuti chung chuan thalai engthawl, pawisak nei lo fahrana tal mawt mawthote hian mahni tana tha lo leh pawi turin kan khawsa a ni tih reng reng an hre pha lo. Zah nachang an hre bawk hek lo.

Lo thlir reng rawh, ninawm i tih khawp chu i hmu thuai mai ang. En rawh saw - Chu tlangval chu a Bike chuan dan a va hlauhawm lu deuh ve. E, saw nula kekawrtlawn ha chu a va tight teng tawng ve, a sam a la hnawih sen vel lehnghal, hmela belh phetin. A bawp kau kau nen, a zak der lo lehnghal a, a hmel phir pher nen. E he.... saw pawh: Tlangval zu ruiin nula pahnih Bike-in a phur, an tluk palh vaih chuan nu leh pate mawh a va rit dawn ve aw. Khai aw - saw tlangval pahnihte Thirsakawr chuan dan chu an va han dim lo mai mai em ve aw, ka ngei zawng tak an ni mai. Khai khai, saw tlangval lu meh dan saw en teh - a hmel chhiat chhiat nen, a inhmeh lo lulai deuh lo maw? Khai aw - saw Kuva dawra tlangval pathumte saw an mak lutuk, an thial seng em em dawn em ni? an fun puar lian lutuk! Khai a, saw - Khaini a inbarha Kuva a hmawm bakah Cigret a petkawh nghal, hem hem mai a. A mak lu deuh ve a! Pengthuam lun lai tak a ni bawka hmuh tur a va’n tam ve le. Khi-laia thingpui dawra khi nula tlangval an thu teuh mai. A, khi an la luh belh zel lehnghal. Khawia pawisa nge maw an neih bik hlawm le? In lam hna thawh tum loho an nih ngei dawn khi. Khai khai, thlir reng lo ila rilru a hahdam a ni mai. Mizohovin thangthar nun ningin Thasiama a thi, an lo ti pawh hi demawm ka ti nek lo ve. Mahni tana hlawkna leh sawtna awm hlei lovah kan thi thei mai dawn alawm.

Kha kha a ni mai. Tun laia kan nula tlangvalho hian an hma lam hun tur reng reng an ngaihtuah lo, an tal bawrh bawrh a, an che hawr hawr a, hiar takin an khawsa bat bat a ni ber a. Mihring hian mahni tuh rah, nun dan hi a chhia emaw a tha emaw, kan upat lamah a rah kan seng thin tih kan hre chiang theuh. Mahse, mi tin mai hian tuna kan nun dan hi fimkhur a tulzia kan hre fuh thei lo hi a pawi a ni. Chuvang chuan mahni nun dan leh hun hman dan inbih chiang ila. Kan upat huna a rah kan seng tur eng ang nge tih chu kan hmu mai ang.

Lo ngai reng rawh, i la hre dawn khawp. Tun, i thatlai hunah i nung duhdahin i nung tlaran viau vei maw? Sum leh pai, engmah reng reng ren i nei lo chiah maw? I nu leh i pa i zah lovin engah mah i ngai lo ngat em ni? Zuk leh hmuam, ruih theih thil insum lek lo leh pawi ti lo fahranin i ti pap pap zel maw? Hna pawh thawk hlei lovin i tal kual vel mai mai ti raw. In lir-thei neih Bike leh Cycle-te pawh chu nuam tawl nan i lenpui piat piat thei maw? Money i nei thei hlura i duh duh inin i hmawm tawn tawn a, i nu leh i pate rilru hah reng rengin i siam em ni? Pawisak reng nei lova nuam tawl hi hlimna leh lawmna ber niin i hre tak tak em?

Khai le, mahni nun i inen fiah theuh teh ang. Tuna i nun dan kha i unau zawng zawngte nun dan atan i duh chiah em? I inkhawm duh si lo. Kohhran i hnuchhawn ti rawh. Nu leh pa leh khawtlang tan chinawm takin i nung a, i tangkai hlawl lo. I hnawksak zawk hial a nih phei chuan lo ngai reng rawh - nangmah ngeiin a rah i la seng dawn alawm. Vawiina i nun dan tha lo, tlaran tak kha i tar huna a rah i seng tur atan tha i ti dawn em? I fate nun dan atan i duh chiah maw?

A ni thei lo. A pawi lutuk dawn. Piansualna chu sim theih ni lo mah se, nungchang tha lo erawh siam that theih a ni. Tuh rah seng tur tha nei turin tuna nun hi fel tak leh tha taka hman i tum ang aw.

ZU NOKHAT A AWM LO

2008-10-05T08:43:00.000-07:00

by Hlua [Norway]

Tahan a ka khawsak ve thin lai khan , Tlaitla eng "tlai lam ni tlak dawn ruai hian ka rilru a khawih hle in ka hre thin,nikhat chhung a hun awm darkar 24 ah hian hetih hun Tlaitla eng hi ka ngai nat ber a ni thin.Ni a han tlak dawn ruai hi chuan, Tuivar tlang pawh khi a lo nguai deuh tan a, a thim deuh mup thin, chutin, HAN khawpui a valrualte hnapui ber leh lungrual tak a kan duh thu sam kan sawiho theihna chu tlai tla eng in a hrin tlai lam ZU hmun chu a ni a, nikhua a lo her deuh duai tawh hi chuan,a hman hma sa sa in thian te kan va tlawh a, kalo va kal hmasa a nge a hmun ah kalo nghak dawn che nia ti in kan in sawm kual thin.Ka la hriat reng ka chet tlat tam ve na chu -Paluaia in a ni a, (Zodi Thangluaia a ni nghe nghe), Chingal leh saum tel lo a awmtheilo chu Zodi music group an ni an ti thin a, kei pawh Zodi Thangluai a chingal thlawr (dawidim telh kha) tem lo chuan ka awm theibik lo thin ni ber khan ka hria. Paluai an Pahlu zan in chu kan nei tui viau a nia a han tih zauh tawh hi chuan thinlung chhung a tang hian hlim rukna a lo chhuak a, music lam a thiam tak tak te, sport mi te leh thu leh hla lam a tui mi te kan thu ho a, kan in hlim chhuah thin a ni. Tah chuan nu leh pa ten a, Zu in na a tan a min pek ni hoh lo pawisa kha Paluaia in ah kan chhung lut ta thin a nih kha. Mahse zan in chu Paluai ka ba dawn a nia han tih zoh tawh chuan kan in hlim chhuah ngailo a tin Zu pawh kha a K deuh thin ni in kahre bawk, Zu hian mi ti tla ran tih chu kan hre theuh a mahse min hlim chhuah ve nasa hle in ka hria kan tleiraawl lai phei chuan ngaih zawng te hnen a thu kan sawi ngam loh minsawi puitlin tir tu a ni a,a tang kai phian ani. Tin, Bawng sa rep, Sazu chhum a Tum thang par thlak, Uisa chhum hluah a phui hnam thlak te hniang hnar tak a kan in chhawp theih a kan han in kawm nak nak hi chuan kan dam chhung hian chumi ai a din hmun nuam dang hi a awm pawh kalo ring ngailo ani.

Pinkhung lay khaw mawng, phulzawl lui sir,kapu te lei let a buh tun ni ah ngat phei chuan kan u te ho lung chhiat vang pawh ni chuang lo a, Lallianmawi a hla lo sak pui pah leh zurui lug puam in mit tui tlapur a an lam vut vut thin te pawh kha kala hre reng a ni.fa vang lo thleng lawm in an mit tui an ti tla lui thin ni te pawh i ka ring bawk, favang a lo thlen hi chuan lung te a leng thin tih erawh ka pawm thlap. Chutiang chuan in neih ni khua ah te, chhiatni that ni ah te Zu hi kanlo hmang tangkai ve thin hle in ka hria a Zu lo siam chhuak tu pawh hi kei chuan ka fak hle nghe nghe a ni.

Ka pen chhuak: Ni khat chu ka pa in kafapa Tahan a i khaw sak chuan Zubur ah i chhuak mai ang ram dang a inkah chhuah dan ngaihtuah rawh a rawn ti thut a, ka tawmpui nghal a, nireilo te ah Rangoon ka pan a Malaysia lam ka hawi ta a ni. Malaysia a ka thian lo thleng hmasa te chu Biakkima nau Sangtea leh Pulianchia fate an ni. Malay ka thlen chanchin an hriat ve leh uluk tak a bawkkhup chung a luak tur in minlo welcome a, kal kawng tluan a ka rawn nghei tawh a vang in ka chak huam huam mai a ka lawm hle a ni (Malay ka thlen tirh hian zofa te pa-6 chiah kanla awm, pawisa thlengna rate RM-1, ah kyat-16 a ni). Tichuan ka thlen zan milo welcome na ah chuan Pulianchi a fapa Dingtea (fam) chuan pathian thu ni lem lo chu min hrilh pah in heti hian thu zawhna min nei a, Malaysia zu zawng zawng hi in zawh vek kan tum a, kan zing ah i tel ve duh em ? i tel ve duh loh chuan hna kan zawn sak lo ang che a han ti nghal thuai mai a, zan in tan chuan no khat kalo lem ve ang chu ka han ti fiam a! het-het ! KHAWVEL AH ZU NOKHAT A AWM LO, a tlem ber ah um 10 a ni mai a han ti tawp mai a, ka rilru chhung tak ah chuan ka lawm hle Malaysia ka kal pawh hlawh tling ta ni in ka in hre nghal ani.chu mi zan chuan luak zawng kan luak mahse u luk tak chuan kanla bawk khup rih lo a ni.

Khhua alo rei a hnate pawh chu ka han thawk ve a, Restaurant a kathawhpui china ho lah zu heh tak tak minlo welcome tu ka thiante lah hehlo lem lo, hlawh te ka han dawngve thin nan ka thian te motto kha Malaysia zu zawng zawng in zawh vek a nih a vang in tlin leh tlin lo thlansa phung a ka thawh chhuah thla hlawh hu, Thaisong, Kapak, leh Sevensea, hawn hmui cham cham nan ka han sem chhuak zar zar tamai thin a ni chu, zu in ve duh lo te chu mi ang lo leh thil hmu zau lo ah kan puh ti tih thin bawk nghe nghe.

Kum-5 vel a lo rei a kan hotupa Dingte a chu ka han zawt a, Malaysia zu hi kan in zo tep tawh lo maw ti in, a ni chuan ngawi teh kan in tam tawh teh reng nen a tam tulh tulh mai nia tan kan lak leh zual sauh a ngai anih hi, tun ah phei chuan a rak an tih buh zu kan lam ami nen khan in ang chiah hmui tui lu tuk a rawn chhuakthar leh nghal a,a strong ngaihtuah in a man pawh a tamlo ti in mawi tak in a han hlap a, a ngaithla tu ho chuan chil lem tur ang leh,dar ti phu hlat hlat chung hian kan phur zia kanlo lan tir hlawm a,a lei tu tur kan in ruat nghal bawk. Chu ta tang chuan zu chhuak thar a piang kan lawr a, kan han ruih deuh phei chuan ram dang kal man ah ti in kan in ngai sang hle ani, kan hna thawhna pu ten awmna tur room minpe tho nan, chung ai chuan Chowkit mi bathlar leh Klang bustand khi riahna a tan kan ngaina zawk hle thin ani, Bus lut chhuk vel rum beng chheng in min kaih thawh chiah hian mahni in lam kan pan thin ani.

Kum-2 vel a lo thang leh hnu chuan,hetiang chuan anitheilo, Tahan khawtlang an hmai zah awm lu tukti in Johor lam ah ka pem chhuak ta ani. Zu zawrhna ka tlan chhuah san a zu thlawrna kava panhi ani leh ri ngawt mai le discoo, pub, nightclub vel ah hna ka han thawk a in hranpa pawh ngailo hian a khu leh a rim in minur rui hi a niringawt mai hun a lo kal zel a Tahan a piang Malaysia a seilian nih hming pu chung leh kut khur dur dur chung in antui ka han hawp tanta a ni. KL ah ka rawn zina hman a kathiankan hotupa Dingtea kha Malaysia zu kan in zawh tep tawh leh tawh loh han zawh ka tum a ka zawh hma in zu vang a Thailand leh Malay ramri a a thihthu puesa Zawn an minlo hrilh a ni, Uluk tak a bawk khup chung a luak tur a minlo welcome tu leh kan hotu pa ber zu vang a a boral tak si ah chuan hlau thawng ve a ngeitalo chuan thiante boral sunpui nan MCK (Myanmar, Chin, Kachin) zu dawr ah ka han chen zui leh anih kha, tichuan thuihhruai ka nei veleh zel a, Malaysia ka chhuah san hnu thleng in ka ai awh a Malaysia zu zawng zawng in zawh tum thian tam tak ka hnut chhiah nghe nghe a ni, tun kum chhung a anlo in zawh hman loh pawh in kum sangthum hma ngei chuan an in zawh hman ka beiseipui.

A rah kaseng dan: Zu in thatna leh that lohna hi ka khai khin thin a in level lek lek in a chang chuan ka chhuah thin Europe ka thlenhnu hian ka in tlem ta deuh a mahse tun hma a, Malaysia zu zawng zawng in zawh vek tum a beihpui kanlo thlakna ah khan ka chuap leh ka thin, ka pumpui te a khawih chhe hman hle in ka hria ani. Heng lam a mite hi an hrisel hlawm rapthlak si a, thinvung leh chuap vungte an awmve ngailo emi tih tur khawp hian Doctor te han hrilh pawh in an awi tha duh lo leh nghal a,mahni taksa chung a thil thleng chu mahni in kan hre chiang a chu vang in zu in a thawh rah thin vung leh chuap vung a vang a, a ruk a hlauh thawn na leh hlimloh ruk na chuan min kawm ngaih tanta ani Zu vang a hlimna zawng zawng chu a kal liam tawh a, zu vang a hlim loh ruk na chuan minlo hmuak ve ta a nih hi, a tawp ah phei chuan hun lo tak a thihna chuan min lo hmuak ngei ang tih pawh ka ring nghe nghe. Chawei tui nan a zu nokhat lek sawi mawitu te pawh kha sawi mawi duh tawh lo se kava ti em a chhan chu khawvel eh ZU NOKHAT A AWM LOH VANG A NI. Chhiar kawp siam chhuak tu chuan pakhat leh pakhat belh chu pa hnih a ti a,alchohol siam chhuaktu ve thung chuan nokhat leh nokhat belh chu no-4 a ti ve thung, tin nokhat leh no thum bel chu no-9 a ni, mahni limit chin leh nokhat belh chu u luk tak a bawkkhup chung a luak ani, ka theory ve ah chuan luak zawh hnu a nokhat belh leh chu -Bawngpa a chan a ni e...

[Kan banphak tawka kan chhiar zingah chuan tha kan ti ber zing a mi pakhat a nia, mi dang te pawh hian lo chhiar ve se ti duhsakna vangin kan rawn tar lang a ni. Admin]

ANNI LEH KEI

2008-10-04T10:02:00.000-07:00

by JF. Lalhmangaihzuala

Mi laklawh - huaibak suakpak, hawklak dawklak, hnawksak, lawk tak, hawkdak veivak, theuleu lam chauhva theuneu lo, virpilh khawpa huamhap ching, lir pilh phunga ving chak thin, meng rei mu rei, kum tling patling si lo ka nih hi!

Therhlo mamawh ni tin, bawlhlo leh hmuihmer tel lova ei tuitang lo, dawihlo dawi at, ruihhlo ngai nih duh si lova vaihlo tak ngial pawh thlah thei thak lo, ei bo bar lei nana sum khawhral hmang, thilphal kawm ngil ngel, fiamthu duh fiam dawl si lo, mi pawk phawk mai ka lo ni e... Tha lo lama sihhnip, tha lam kawnga hmin har fu, mahni hnam kalchar kalcharpui aia kamram kalchar sahuai thing vawn tlut reng, hnehtu chan chang ngai hlei lo kei ve tehlul hian HNEHTUTE ngaihsan nachang erawh ka hre ve phian ang lawi a! Chu’ng mite chanchin chu ka’n nger ve nger nger te’ng... (Ka IQ hniam hle mahse, ka BP erawh a sang ve tlats!)

George Washington atanga George Walker Bush thleng khuan 42 an ni a, President Bush khu erawh a 43rd a ni tlat thung! Engvang nge ni teh chai? E le, 22nd leh 24th kha mi pakhat a ni miau alawm. Grover Cleveland (Democratic) a nia... USA President lo ni tawh zawng zawng mi 42 zinga a chungchuanna chi khat chu a ni mawlh ang. A ropui vei roh mang e!

Khu ram ropui America President pahnihna chu John Adams (Federalist) a ni a, a hming tawpa ‘s’ a bei vang emaw ni teh lek - lei malsawmna a dawn ngheng bakah van thutiamna lam pawh a chungah a thleng dik bik riauvin ka hre thin. USA President te zinga White House luah hmasa ber a ni a, President-te zinga dam rei ber (kum 96 a dam) a ni bawk. Chu mai a ni nem, President zinga pawl bik nei lo awmchhun, John Quincy Adams (President 6th) kha a fapa a ni asin! Ropui lama khawvel hmatheh, zau lamah pawh palina ni pha America ber kher lehnghal, a khalh kaltu pawimawh hmasa an lo ni pafa thei bik kha... an theuneu lo dun mang tak e maw! History chuan a hre kiau kuau reng dawn a ni.

United States bawk khu alawm, ‘Super Power’ dinhmuna hlangkaitu mi thahnem tham zet zingah a meizang hlap pha chin pafa chhuanawm elkhen an rawn inlar leh tak khu! Republican ve ve, President 41st George Herbert Walker Bush leh 43rd George Walker Bush te an nia. An inkarah Democratic hawlh lawr Bill Clinton a rawn tlazep lai lawk zuai. Engpawhnise, a pa thut hmun chuha chhuh hialtu Clinton-a lalthutthleng a’n thut ve leh ngat thei khu Bush Hnuhnunga ropui danglam riauna a va’n ni chiangkuang em!

A pa thlaktu hnawt kiang ve leh dawrh Indira Gandhi khan India Prime Minister hmasa ber Jawaharlal Nehru-a fanu nih ngawt chu a duh khawp lo tawp mai. A martyr zui ta lehnghal! Kan la chheu kim lo cheu. Rajiv Gandhi lehzelin a Pilot hna bansanin a pu leh a nu te hmun hlui chu a rawn luah lum ve leh rap mai le! A nuthai duat lai Sonia Gandhi (Italian) paw’n an-hla a cheh phah hial a nih kha! Chuachhapah, rawng taka thah a’n ni zui sapbai! Aw, Patriot chhaltlak (Ram leh Hnam hmangaihtu) an va ni tehlul em ve maw!!

Israel Independence sual chhuaktu zinga a khaipa, an Prime Minister hmasa ber lo ni ta hial David Ben Gurion-a inlan dan mawlh kha ropui ka ti thin. 1948-1954 chhung Prime Minister a nih hnuah amah rawn bawhbettu Moshe Sharett-a chu a’n lehthal leh thawk a. Rei ngial chhung Israel lu a ni ta nghe nghe a nih kha! “A duai bil lo hle mai” tih tehtlawng chuan a dinhmun a hrilhfiah zo hlei lo’ng e..

Keini, Mizo hnam pawh hian hnam kal siamtu chhiar sen mai loh kan neihte zingah chhuanawm thama filawr leh thawhhlawk tawp thang kan tlachham hauh bik lo asin. Khawvel mi hriat kan nih theihna tura tan la nasa leh mi thahnemngai kan nei ve chiang alawm. Infiamna lamah pawh Mizo hnam tihmingthatu an chhuak ta nawlh nawlh mai a nih hi! An hming kan lam kim thei ta lo hial mai.. A ni zel dawn kum leh khuain.. Mizo nih hi a va’n nuam em!

Aw le, ka’n phul phuan ve ta buah a, tawk phawt teh sen... Ka sawi takte (Anni) leh kei chu inthlau tak kan ni. Chhiartu nang eng dinhmunah nge i din? Eng lam nge i awn a, khawi lam nge i pan dawn? I thu thu a ni e...

KAN VENGAH CHUAN MAWM! Episode 1

2008-09-25T04:30:00.000-07:00

by Red Corner

Tun kar chhung thawhtur 0%. zing dar 8 pel chauha thawh. Cafe-a darkar khat chuang hun khawh ral. Thiante tihtur hiat loh thu inhrilh tawn sek. Dar 11,12 vela tukthuan hmawm, internet-a ninhlei, eng Site emaw a comment ziah... Site hawn kual dun dun a, mahni blog up-date hman loh. Chhun lam Man-U crazy Way Lay Cafe [Thingpui dawr]-a Premier League ti ti, C.Ronaldo ngeiawm zia ral atanga lo sawi vak vak.... an sawi hat that Chin Concert, a nung chuanga hmuh phak loh Ivanovic lo sep chiam chim. Chawhnu lamah Wrestling, Ultimate fighting lama pakai. Zzanriah ei khamah Cafe bawka Korea film tlan chhiatsan. Cafe-a Yangon ral thar zai nge rak nge rap tih pawh hriat loh zaidam taka ngaihthlak. Zan 9,10 velah Western film la en loh (CD 500/- lei, mi pawisa pukin) en mak mawh...tiang vel chuan darkar khat...ni khat...chawlhkar khat pawh a liam.

Pawl 8,9 atangin khawi boarder-ah nge aw tih a intan daih tawh. Matric fail meuh chuan awmna boarder sawisel ruala insawn, a aia tlawm ngaihtuah a tul. Discipline khauh lo zawk leh guide te nen in-signal theihna hmun mel thiam a ngai. Awm loh zawkna boarder apiang nuam zawk tura ngaihna rilru a lian. Guide hmuh laia uluk taka lehkha chhiar melh melh (heading leh spelling inmil lo-ah mawhphurhna nei lo angin), guide awm lo veleh khuhva pack (pocket), Raja ka-a thun goal zung zung, out pass nia nu leh pa leh zirtirtute inhmuh thiam lohna tur kawng dap ngar ngar. Exam...result.. fail... pass.. eng nge ni ta zel. Matric zawh hnu chuan computer, speaking, rilruin zirtur a dap ruai. Kenbo bike kar chah chunga training kal. Hun bichilh vanga thenkhatte hmuaka chiau-au hun a awm lo. A rawng bawla Pastor tan tur nge, US lam hawia tawngtai tlut tlut. He lamah min hre chiang tawh em a, ram dang atang parcel beisei. Hmeichhe tan...zawm theih theih school zawm emaw, parcel ngaaka ni tin thahnemngai taka inchei a, foreign kal chhuak fapa tlangval nei nu leh pate biak chhiat loh. Zirna khar nan B.RE chai chunga hlim hlaw zawn chap. Van nei zualte chu mi pocket ringin hming thatna pawh an la khum mahna. Vannei chung chuang an ni. A rem dawn chuan eng emaw ti takin thil hi a rem ve khiat zel. Kan vengah chuan mawm!....

(La chhunzawmah aw!)

5:00 PM ORCHESTRA

2008-09-24T05:45:00.000-07:00

by Editor

5:00 pm a ri leh dawn. He hun hian mimal tin tan pawimawhna a nei theuh va. Nileng hna chawlhsan hun, dawr khar hun, chawlh hahdam hun...

He hun hi alawm! Saw...a then chuan racket an rawn lek...Tennis inkhel tur pawh an insiam tawh. Pu VL-a [Samkir] pawh choka lamah thlai hna nen an inchibai leh lawp lawp ang a, bai tur leh kan tur team hnih-ah a then hrang mek ta ve ang (Amah hi Vegetarian chu a ni lo, Presbyterian zawk a ni.). U Mawitea (Hello) pawh dawr sengin a thlan huh dep dup (Nupui hlauh vang ni lovin, duat vang....awih loh tur). eng dang vak tih tur a nei hlei nem, zanah Video capture lam thawkin ('cial mei eng a neih thut chuan) a buai ang. Zaithiam (Sunday chawhmeh mi hnawn ching) Ronaldinho? Melchiot? pawh TIT field panin a pen hnak hnak. Hranghlui u Changliana pawh Man-U jerssy nen. Halkha Queen melh ralh ralh chunga a ruaka put chhuah tum ran Lalsena pawh. Ani tan chuan inkhel hi out-pass mai a ni, field thleng ve uk a ball dek miah lova min hawsan zat hi U Zalianthanga kum zat aiin a tlem miah lovang. Live show nei tura Tahana lo zin lawk, awptu nei lo pakhat pawh hi Bass perh lovin tunah chuan Group selected team-a tel turin a thisen an check-up mek a ni. Mahse, player indaih lohna team-ah chuan hneh ngei tur chauh cho thiam tur. Native striker Drogba leh goal a chhuah tam pauh leh inti-zahawm thiam U Mawitea thenawm pa...belh khawmin he mite pahnih tel lo chuan sub 'cial tem. Anni pahnih tel hi hnehna a ni lo, ngaihthatna chauh. First line-up a tel thei lo i lo thlir ang; khawi hnum pawh tlan thei, zing thawk hun no limit, riltam reng Zama (drummer), TV repair dawr hawng bel bela bihruksan ziah Bawla (drummer), mi appoinment pe-a tiam te te a, theihnghilh luih ching tlat Pathlawi Lawmsanga, fuihpawrh pawh nghak zo lova, nupui nei va ta mai Siama (Bass), a zin chhuak dek dek a, TSO computer-a 'U Ni...I'm home soon' tih lo inziak hman ziah te nen. A khat tawka lo inrawlh ve thin Billy Khe [Za Khe] te team hi an hmel ngawt pawh huphurhawm. He music team hi result i hriat hma chuan an chak ziah emaw i ti mai thei, completely No! an inhmuam up mai a ni. Score aiin Style an nei tha zawk. Mahse, professional an ni lova. an inkhel zo hi Bazar venga lead perhtu leh mikhual cham rei bass tumtu te chu Eden thar lamah, an nu zin remchan lai a nih chuan C.Ronaldinho pawh. Chutih lai chuan Han khawpui rawl tharte entawn luai luai arsi pathum pawh Bike hawlin kawng kawi biboh-ah sun-glass Zaia vun rawng bunin an rawn inlar. Hun dangah an tlai a ni thei, evening attendence chu 99%. Zodi thenawm ha siamtu-in a ho chang chuan A-Bauh-Chi goal bana thlungin an ri rap zel. 5:00 pm Orchestra atangin music piece tlemte ka han tarlang mai a ni.

RILRU FAR CHHUAK

2008-09-23T07:52:00.001-07:00

by Editor

2008 May 31 khan T.Melody [Tlai Melody ni lo, "Tahan Melody"] hmingin nikum lam atang an khelh ngat ngat 'Thinlung Thawnthu' Mizo VCD chu TSO Music Production atangin released a ni a. He albuma hlate hi VL Awia, The Rengs (Rengpuia) leh Hlimtea ten an ziak luam (Khawhar hnemah). Hla 11 an thawh a, Live version hla khat bonus track atan (mi mit tikham atan) an telh talh kha.

Hlate hi thalai lam tan (tak takah chuan puitling lam an kher zawk) siam a ni. Hard Rock album kan la neih zen zen loh a ni. Singer chung chuang (Power Rangers...sorry...solly..Power Singers) Lalnunsanga leh Zaithanmawiaten hrawk na phungin Studio-8-ah an sak nawn tluk tluk hnuin Sound engineer-in a ning em em a, a duhtawk hnuah, zo fel anga ngaih a ni.

Mawitea (Hello), Babuu (Minuamsa) ten an phak tawk thiamna sawrkhawmin nupuite rawn duh miah loin an shoot tak tak mai a...Hei..law..heiti kan nih tak hi. TSO Digital Creative atangin uluk takin kekawrtlawn pawh ha hman lovin, free-movement-in a edit a ni.

He VCD-ah hian Ni Lian Sang (Lian lo, sang bawk lo) hi producer niin rilru, taksa, thlarau, sumte sengin ama thu ngeiin Director a ni ve tawp. (Amah aiin a kut-chhuak sulhnu a ropui an ti zel. Computer hmaah naupang TB vei ang maiin a lo thu khar ang a, Pu Niliana ka hmu duh, va ko teh, tia amah ngeiin tirh sual loh nan fimkhur a tul ania!!!)

VAL SENIOR-A INPUANNA: A Pa Rim Nam

2008-09-23T06:49:00.000-07:00

by Tattooed Basser

Intro
Thlabial zan.....
Thlabial zan chuan thla chu a bial ang chu. A bial thlawt lo, tia hnial rual va ni suh. Mihring pakhat, kei ka tan zawng thla hi a bial lova... Chhum dum chhah mupin a hliah, Awklem zante nen. Ka hring nunah thla a la bial ve mawlh lo.

Verse-1
"Pangpar i hmuhin lo mai suh, kal zel la, par huan ropui i hmu ang". Het, sala-maitalh-tui! He thu vawrh chhuaktu hi a nung chunga a vun lihsak veka a hnuk chah hma loh pawhfankuala perh ngat ngat ka chak. Ani alawm, Enga ti nge? Val dang chu ka hre lo le...Kei ve chu par huan ropui thlir chungin nghal fim rawl phung leh kephah durh hrepin he thu-lawi-lo hi ka um a, inchhirin ban aia sei a chen ta. A par hmuh leh a rim hriat chu sawi loh, a hmun pawh ka dai hmain par mawi chhiar sen loh chu miin min tawn khalh hi. Eng vang nge, tu vang nge, khawiah nge, rilruah question mark hlir (Whys? Whos? Whens?). Chil puta ui chunga thlir dauh dauh chungin ka ui chuang that mai mai.

Verse-2
A thlawn liau liaua dawn PSI lukhum (cap) khuma, tih tur vak hre lova buai ve em em tho...Polite loh hlau ve nui hmel ui ngai lo, HRB-a chan tawk column khat vela kut thlak vak vak. 5:00 pm football khel huna inlan loh tum maih lo, a dang zawng aia 'Ka' in-fit zawk...6:00 pm-a thil siam rim tinreng kara a rim thahna nen tang khap chunga zahawmna derthawng hauh lo tura inhmuam up vang vang....

Verse-3
Sira ianga zar khata lenga
Sa-um nih pawha bur khata luangza turin.....
Pian tirah atan la bo vang vang Nak-ruh bo chu kiltin hrutin hmuntin dapin ka zawng ruai a, tawn ni awm lo. (A tu ber nge ka tawn loh loh pawh chu ka hre chiah lo). He lama talent dawn hi a chau hrim hrim a nih hi. Van a duai a ni. An ti, "Len rei chu thil hlui nihna a ni a, an man pawh a sangin mi pangngai neih phak chi an ni lo", inhriat loh chuan lo ngawi hmak tawh rawh u. Tlin lohna mi hriat hlauvin hna cover-a hmangin 'Ar biru' angin taksa dang lang kuauvin kan hai der mai mai, zap lovah chuan nakruh kim thap thawpa awm tur kan ni ve tawh, kum pawhin a tlin val val. An zun theih tek tek chuan hei ngei hi a nih hi ka 'something' ve tur chu, tia 'Amen' hreh lo tur dinhmunah hian...Aw Lalpa i fapa nakruk retheite hi min ensan lul suh ang che (Tawngtai thupui). He 'Love without Lover' story hi Mawitea (Hello), Babuu(Minuamsa) te'n theih tawp chhuahin shooting han bei leh se, kei zawng ka thlir ngam lovang.

Verse-4
Inthlahrung deka khua chuanin...W.Clinic-a staff naupang tawh miah lote leh WY-a vanglai pel hret tawhte zarah khuar-khu-ruma tla bo mai tur ka rilru riangvai tak mai chu chhan chhuaha awmin tuama hnem lohin inhnem phur chawp a lo tul ta a. Beiseina sang tak nen chuan ding-di-hip meuhin tan ka huam a. Mi chimawm, ram dang feh chhuak, nakruh keng nghal mai lote lah hian min zawhna nei miah lovin 'Parcel' hripui an lentir chiam a. Chu hri chuan tleirawl tuai thar leh beiseina rem mek nula te chu Flashy Virus angin a fan chhuak a. an mitmei leh tawngkam tha kam hnih khat lo um vete pawh puan ang hnawlin kan awm leh ta. Beisei a san tawh vaih vaih nen, tlakna a va sang tak em! He 'Parcel' hri leng pui roh hian tlangval hun pawt seiin Hattrick hmang tak meuhvin min tlawm ta...

Fine-Out
'Parcel' tia a hmei a pa inthliarna awm lova ngaihdam hlui tak Berlin khulhpui chhut chhiat a nih anga chhut chhiat a, remna siamtu, ram danga feh chhuak nakruh duhawm tak takte hnenah, he ta hi 'Ready Made Packing' ngat kan la awm, tih hi min lo hriatpui ve teh u. Mamawh hun inneih pawh mai thei a nia aw...(Duhsakna aw maw). G-talk ahte lo leng thu ve teh u, TSO Net Cafe-ah zan dar 9 atangin Ready standby-in tlangval senior sih-hnip tak takin la hmuh ngai loh mumang man tumin 'A pa rim nam hum humin' kan lo welcome a che. My dear Nakruh te u..... Klome...

WRESTLING AN TIH FO CHU

2008-09-22T01:19:00.000-07:00

by Samuel-a

Bawngkawn tlangval US-a thlawk lut tur pakhat paw’n a pa hnenah, “Ka pa vissa a fel vek tawh thlawh chhuah chauh ka hmabak ta, kan inhmu tawh lo mai thei a nia. Min hrilh tur leh ka hriat reng atana thu mi chah duh i nei em?” a han ti a. A pa chuan, “Nei teh meuh meuh mai. America i thlen ve leh Wrestling hi a tak tak nge a nih a, lem tih zuk chian vat la, a rang thei ang berin mi rawn hriattir thuai ang che, chu chu vawng reng rawh,” a ti ta hem mai a.

A ni taka tun hmaa ‘Titan Sport’ tih leh a hnu deuhva WWF tia hriat lar, tun laia WWE an tih World Wrestling Entertainment hian Zoram khawvel pawh a rawn len-pawh hneh ve tak em avang hian WWE hi han hrut thuak thuak a tul tawh a ni.

Internet, T.V., Video leh a hmun ngei pawha thlir theih he inrum nuai, inchai, inchhuih, inbuan leh innghawk, inkhelhna hi khawvel hmun hrang hrang atanga lo thlirtute nen inkungkaih thui zau hle mahse, mi mal din chhuah a lo nih tak angin thuneihna tam tak leh inrelbawl a lo nih tak angin thuneihna tam tak leh inrelbawl leh kalphung pawh sawrkar ni lovin mimal kut zawka awm a ni a tih theih awm e.

He pawl chairman hi Vince McMahon-a a ni a, tin an nupui Linda McMahon-i chuan Chief Excecutive Officer (CEO) hna a chelh tlat bakah an faten he pawla hna pawimawh leh thupui dang dang an chelh nual bawk avangin he WWE hi McMahon-a te chhung thlawhhma bil liau ang deuhvin a sawi huai theih viau ang.

Sum dawnna lamah pawh he pawl atanga hmuh chhuah, a hlep hlang tlafir zaa sawmsarih zel hi chu V. McMahon-a te chhung thul chhungah a luang lut nguai nguai zel a. Tin, he pawl hi zalen taka inthlang thin nimahse a hnar lawk chin leh vote nei pha chin zaa sawmkua leh paruk zel chu Pu McMahon-a bel chhung sa ang an la nih tlat avangin McMahon-a hi WWE-ah hi chuan tun thleng hi chuan a sanghal patitawlh len zar zar mai.

He pawl thuthmun pui ber chu 1241 East Maiin Street, Stamford, Connecticut a ni a, khawvel pum huap Pisa chu Los Angeles, New York, London leh Toranto khawpuiah te an hung thluah bawk.

Kan lo thlir leh hmuh thin angin WWE inkhelh dawh (thleng) sangah khian paawmthira te leh paawmkhauhlutuka te chu nuai theih dan dana innuai vut vut an ni mai. Mahse, a paber chin, paber leh zual chin leh paber ber lutuk chin tiin an then hrang a. RAW, Smash Dawn tih leh ECW tia kan hriatte hi WWE ruahmansak dan ang veka kal an ni. Tin, khawvel pum huap palian inchai zinga cham fal sawm zinga pathumte (a tlem berah) riah buk a ni bawk. Nikum May leh April inkarah chauh an sum hmuh chhuak hlep hlang chu American $ maktaduai sawmli leh pasarih lek a ni.

He WWE hian awlsam takin tun dinhmun hi a tawlh thleng a ni lova, a dik taka sawi chuan harsatna tam tak an lo pal tlang vang zawk a ni e.

MI RAMAH ZAWNG LUNGLEN A NA E

2008-09-21T20:06:00.000-07:00

by Zalianthanga

Mizo hnahthlak zawng zawng hi lunglen hnam ti ila, kan sawi sual tam kher awm lo ve. Kan pi leh pu hun lai atang tawh khan tlang rama khawsa an lo ni a. Khaw khat tlangvalin khawkhat nula a va rim a, chu lo rengah pawh lawmte ruaiin tur nipui pawh an do dai hial a ni lawm ni. Nikhat inhmuh lo ringawt pawh kha chhun ni a rei an lo ti awl lo va, an lung a leng thei em em mai a,tlangtin mualtin thlirin an mit an leng thin a, chu ta an awmngaihna hre lo chuan hla hmangin an lunglen an lo hritla thin a ni. Amah kan hla pu, Lalzova'n' Ka rawn fang leh hmana kan tuanna tlang' tih hla , a thunawnah khan Tawnmang em ni , lunglem ka nei lo,
Ka hawi vel a, ka tawng si lo;
Zun leng erawh a cham tanglaiah,
Luahloh lungdi nghilhni awm lo.

Ni e, lungleng mi tak tak chu a hunbi a lo thlen chuan, an la run bik emaw a tihtheih a, lunglen vanga fam tate pawh kan thawnthuah sawi tur a awm a ni lawm ni. Lunglen kan tih pawh hian tawn dan chi hrang hrang a awm thei bawk ang. A thenin ngaihzawng lamah an rilru an lo sen laiin, khawlang lungleng vanga lo kur nguai nguai tate pawh an awm ang. Thian leh thian avang emaw nu le pa karah emaw an sawi laiin fanau leh u leh naute ngaih chan a awm chawk ang..A enga pawh chu lo ni ta se la, kan sawi tum ber erawhchu lunglen hrim hrim hi a ni ber mai a.

Hunin a rawn her chhuhpui a ni bawk a, a ni telin changkanna khawvelah kan chuangkai chho zel a, ei leh in a lo harsa ve ta tial tial a, in lum pawh luah hman lovin hmun hlaah pen chhuah a lo tul ta si a. Nupui fanau leh chhungte han kalsan tur chu lung zawng a leng zual dawn tih erawchu hai rual a ni lo vang. In Compound atanga chhungte han vai liam hi chu lung lam lam a chhiate hial thin a ni. Rilru chhungril takah chuan damten kan la in hmu leh dawn a nia tih mai chu berisei tur dang a awm thei mawlh tawh si lo. Hmun dang leh ram dang dangah chuan kan han thleng ta ngei a, hapta khat a rawn vei a, thla khat, thla hnih a rawn vei meuh chuan lung hi a leng leng em em mai a, ngaihtuahna a kal thui duh hle ang le.Zan mut dawnah lek phei chuan lunglen zual avanga hnukulha,mitui parawl kuang tate pawh an awm ta ve hial ang. Dem chin an ni lo va, a ho e mai tih ringawt theih lah a ni hek lo. Laltanpuia hla ang khan;
Mampui kan hrai- duh-lengte kha an dam thin maw,
Aw ka va han ngai thin teh lul em;
Mampui nang tak pawh kha , i ngaihawm thin a sin;
Lungphang reng reng suh aw, ka lo haw thuai dawn.

tia a chham chhuakte pawh kha, a mawh hran lo ve.Tunlai Zoram khawvel deng chhuak hla ropui Rosangliana hla phuah, hla changkim pakhatah chuan' Mi ramah zawng lunglen a na e' tih hian a hrilhfiah thui hle maw e. Khawii ramah pawh awm mah ila, mahni in chhete hi kan ngai em em mai a, hmuntin ram tinah Building lian puipui, leh chenna nuam takin chenchilh thin mah ila, kan sawi tawh ang khan Mahna Ina zalen taka awm thlahlelna hian min hip na zual a, chu lungkimna hmun kan In, kan ram ngei chu thlen hlan kan ngakhlel em em thin a ni. I rilru awmna apiangah in ro a awm ang tih ang maiin kan hring taksa chu mi ramah awm mah se la, kan rilru erawh hi chu chhungte(kan runah) hnenah a awm zawk a ni.Aw...Chung Pathianin min veng zel ang a, mi ramah zawng lunglen a na e mai a, lungphan reng reng suh aw ka lo haw dawn e , ........ tiin kan thu hi tlang i'n kawm phawt mai teh ang. Mangtha aw........

EM EM A CHE

2008-09-19T23:04:00.000-07:00

by Zalianthanga

Kan khawvel pui reuh hi a pirpak leh kaihlai deuhin an chheihbawr a, a then lahin lungchhe van kaiin lei kum an lo chhiar ve bawk nen famkimna khawvel a nih tak hi maw. Ngaihdan chi hrang hrang lerhburna hmun nafam chu, kan ngaihdan pawh kan ngaihdan a ni ta lo hial emaw ni, a suakpak zo ta emaw tihial ila, thu dik chanve sadai chu kan thiat em lovang chu maw!

Keini ang dai kil kara ngal tle rulh leh kang mei tichhuak thei awm ang hiala lu thur bimbem tan chuan vawkte thang thei lo lu lawk liklek tuallen huang pawh hi kan hmu zau nasa mai si a, tuichhuna uchangin tui a hmuh zauzia khawvel nen hian kan lem chuang lo ni fahmiang. Mahse, mi thenkhat lu zo deuhtena khawvel tual an lim dan leh an chilpherh dan atanga sawr zim a nihzia erawh hi chu themte liak paw’n a boruak kan hip pha lo achha a ni.

Amaherawhchu kan duh emaw, duh lo tawpkhawk emaw pawh, a hunin min lo nangching tak avang pheng hian khawngkhawbai chung chuan kan han ti vel sasawi a, engemaw ti ti chuan hmelhbel chawpin tun dinhmun hi hnimphumin kan lo awm ve ta a nih phiangsen hi.

A ni lah tak a, khawl thluak nei tha eltiang leh nun phur sanna buzawla awm takah si chuan nih dan phung chu sawi loh nih loh dan phung thlengin a pik chuai chuai mai tawh si a, dan rual lo hian nun sang ram ata nun mual liam pialtlepah min hlang chho dawrh a nih tih loh rual va ni suh. Kan nasa lo nasa mai a ni.

Raltiang ram nun chu sirah hnawl rih phawtin kan tuallenna ar hmai tiat lek hi tarmit tha chak ber hmangin bih ngur ngur chhin dawn ila, ha hipa sawi tur tingtang chu kan nei hnerhnur ta ve ang. Hla pakhat han kaihlek ve lek khanglang teh ang:
I feng chhing lua, aw tleitir,
Phai khawpui tuallaiah;
I chhuang em ni, i silhfen,
Leng thiam hram rawh, leng thiam rawh.
(Mahni inhrem reng mai zawng a nuam ngai em ni)2

Mahni nihna dinhmun phak baka inchei teh hluai erawh hi chu a tha lo chhiava tih kan hre bel tlun em e. Ama’rawhchu a hunin a rawn tur luih a ni chek ang, boruak a dang ta riau. Petikawt thui zawh loh ni awm fahrana a kak thui ta lutuk hi mipa tan chuan a pawi vak lo lulai khawp. Ni e,,,, a kak chin ramri hi chu tu sawi phak mah va ni hek suh. An duh leh a khuaivah lawi thleng thleng paw’n lang ang hmiang, ngai thiam mai teh. Mahse, a funna leh tuamna kekawrte hnungzang thlur hniam lama lang ve kher kher hi chu paho tan hlei hlei mit a tikham lo mai thei,. Um.... laipawng lang hiar hiar paha mawngbawr sawi tittet nena an han tei itawm vel hi chu... khawvel hi a tizauthau kan ti dawn em ni?

A chung lamah lawn chho leh ila, naute chaw bur, a kawr hmain a khuh zawh vak loh a ramri hmun thuma then hmun khat lang viai viai, kun zawng pawha... en chak si, en chak lo anga awm der vel hi a tul si thin. Sam cheibawl lah, kar hmasaah a buang, vawiinah rawng dang, kar lehah buang si lo, dum si lovin an pawt mar vel thur, khuavangchhinchhiah insawn zung zung tawk lah bo lo, hmai chei dawna vawi thum pamtul, ni khatah kawr leh puanfen vawi duai lo thlak sek, Kuva thial sen reng vangin em em a che i ti mai thei, “I a ta mi” lo ti rawk suh. A entute min suai takah eng nge pawi teh viau ang le. Tunlai alawm, mahse a hleihluak erawh chu a chi nang. Lerh chu lerh tur mahse ... (lol).

Mipate lah hi kan hluarkai khawp. Pa rum rut hi a hri vei pakhat a ni ve lawi a. Sam sawngbawl dan a hirha a ni ang, saisu kung ang hrimin a ding sung a, Pastor nen lamin meh kawlh relrul a nih tak hlawm hi. Kekawrtlawn pahnih daih tur ang hi pakhatah hmangin an thlep chuang linglet kual kawi ngil vel a, hruihrual ang deuh hnawk berbur hi an bun fur hlawm bawk a. Kawr hak dan lah a ni lo zawng chu sawi loh a herh zawnga inthuam hi kan chaw tui ber, a ang ta hial mai. Bike an khalh chak thei viau emaw i ti a ni mai thei. Mipain a rum ring leh kawr hnung leng duai duaiin an khalh a, hmeichhia erawh chuan phurh tam leh tei tam an uar a ni mai thei. Heng hi hnual suatin pawng dem ngawt chi a ni lo. A hun lai boruak a awm a, an upat hnuah chuan engah nge an tih peih tawh malek ang. Ti dawn lo sawhbeh.

Nutling leh nuthlawi sumdawng an hmui a ngil a, zei pawh an zei narawh. A tulna chin a awm a, tlema an tih ve hah hah lohte chuan dawrtu an hmu nang. A nih leh Paa, khaw pelha i rilru put leh mi ningkhawng i hap dan kha sawi ngam a ni ang em? A pawnah chuan “an hawi ha ha” a, inchhungah chuan “an hawi hu hu” tih hi thu delh kilh nan chuan a daw lo ta ve ang. He mi zulzuia sawi chakawm tak pakhat chu tlangmite tlakchham chu thu khuh uar vanga thinrim khek khawl, hre reng sia hre lo awm der, tihsualna hailan hnua thungrul tum ran tan kan nih avangin inthen a tam phah em em a ni. Chuta an hla ber chu a tu ve ve tan pawh “em em a che” tih hi a ni awm e. Harh fim meuh chuan a lo tlai leh si thin.

Mizia hi inang lo thei tak a ni. Unau piang zingah pawh tu kan huat thu suhah tha bik leh awm herh deuh a awm theih ang. Engti khawpa thu tha leh kawng kawhhmuh pawha um e ve lawi si, mahni tih tum thlulh chuang si lo, that hmel viau si, tulung kar ngai khawpa luhlul, tawng tam lem lova sahuai thut tlur, khauphar thawven ve lawi sia, rin tlak mumal lem lo, mahni phur zawnga sahawk chiam, mi dang papek hnua chhuamlam siam thiam riaute hi thil awm thei tak a ni. He pa hi chu khawi maw nikhuaah sawm hleih lovin a tei ve sek mai, tlema tham then (huih then) a ni hial lo maw? an tih pawha khawi lam lam.... a vum zawk a nih hi, ruat loh a tawk chauh tih ang vel, em em deuh a, beng tulul.

Thu sawi lah hi kan han uar thei laileng khawp. Rin thu pawh ni se, hnunhnang taka an han serawtui tawh hian kan awi thluam thei zel a. Hmun hla deuha dam lo pawh vawi duai lo an sawi chhawn meuh chuan a thi titih chu a ni der mai. Khap chen lek hriat pawh hi intih hriat duh aleiah chawhma daih khawpin kan sawi punlun thei bawk nen, pui tak kan ni. A chang phei chuan “Thiana khawngaih takin hre lo ve deuh em em teh” tih mai a nap awm rum rum mai a ni. Upa zawkte hian tute emaw thu sawi apiang zawm ahnekin chhunzawm thei zela, an ti ti kotlanga min thingtuai dintir reng an tum fo chuan ninawmah a kal a, an ngeiawm phian. Tawng thei hlephlup lah hi an hrawk a pawp tawh laklawh hi chuan det det det .... an tih chhung hian bawmrang khat hi chu nuamsa a ni...

Ni e, heti hian thiante khabe liam atang leh rilru ram tla chu kan han tlai lam umpawngpar ta hluai mai pek a, a pawi pha em lo ang chu maw. Engpawh ni se, chhuahchhal leh bawl ve hrim hrim kan duh a nih pawhin leh pekah kan khaikhawm leh ang a, eng emaw ti ti chuan thu tesep chu a la piang ve mahna. Chuti a nih lohva pawngpaw phul phuan ve ngawt hi zawng miten em em a che tia min kik hma hian thlang kawlah liam phawt mai teh ang.

HRINGNUN KHAWVEL

2008-09-19T02:45:00.004-07:00

by Lalchhawnzova

Tumah mahni duhthusam anga awm tak tak theih lohna, mahni duhthusam ang lo theuhva nun hona. Mahni chan tawka lungawi taka lang, mahse tumah lungawi theih lohna. Mahni dinhmun hriat thiam lohna leh lungrual ang taka kan khawsak tlanna thin; lemchanna hmun ropui hringnun khawvel tak hi chu aw.....! Hmuh tur a tam poh leh ngaihtuah tur a tam ting a ni mai si a, ngaihtuah tur a tam poh leh thawh tur a tam bawk si a nih hi!

Hringnun khawvelah hian pianhmang inang lo, khawsak dan thuhmun lo, rilru put hmang inchen lo leh ngaihdan inpersan tak tak hian mahni thlirna durbin atang theuh hian kan thlir kawi a. Thlir dan zau a awm angin thlir dan zim a awm bawk thin. Kan thlek dan leh kan hmuh thiam dan takngial pawh a inthuhmun thei thin lo. Chuvangin, mahni thlirna durbin atang theuhvin hringnun khawvel hi a zauvin a zim hlei dawn niin a lang. ‘Tha’ kan tih leh ‘ho’ kan tih hi sawi awlsam tak, ho ang reng a ni a, mahse a hnu leh chu inkar hla tak a ni leh lawi si a. Chhia leh tha intihria em em si hian engvang nge a tha lam aia a chhe lam zawka kan ngaihtuahna khawopui hi a her chak zawk tlat le! Dikna intingaina em em si hian dik lo lamah kan ke chheh a chak zawk tlat. Hringnun khawvel hi chu chhui zau poh leh a li a zau va, chhui chian poh leh a li a thuk ting mai a ni.

Hringnun khawvelah hian mahni pawh inthunun thei si lo hian mi dangte va thunun a, kan ngaihdan chu dik ber leh tha berah kan ngai tlat a, keimahni fel intihna atangin tehna chi hrang hrang kan siam chawp thin. Kan ngaihdan leh dun atan chu dik ber leh tha berah kan ngai tlat a. Keimahni fel intihna atang vekin tehna chi hrang hrang kan siam chawp thin. Kan ngaihdan leh duhdan anga a awm loh chuan kan dem a, kan sawisel nghal a. Mi dangte dinhmun thlir thiam kan tum lova mahni lam ringawt kan inen tawh thin a ni. Massinger-a pawhin, “Mi dang chunga rorel tur chuan amah ro a inrel hmasa tur a ni” a ti hial a. Mite va thunun tum ringawt aiin mahni inthunun theihna hi a ropuiin a hlu zawk ngei ang tih chu hringnun khawvelah hian a inlar fiah em em a ni.

Ti hian ka ngaihtuah fo thin a. Kan mizia, kan rilru put hmang ang tak hian TV-ah rawn lang iar dawn ta se tunge en ngam ang aw!! “Hei chu kei ka ni lo, kawm chhak pa, kawm thlang nu a ni zawk” kan ti mai lovang maw? Kan mizia ang takin hringnun khawvelah hian han inlar chhuak teh reng ila, a ropuiin a hmuhnawm phianin ka ring. Kan sakhuanate hi eng angah ngai hlawm tak ang imaw...! A nasa apiangin lal an hrawt dawn a ni mai si a. Mi dangte chunga kan rilru put hmang ang hian miin min rawn en ve ta se. Biak Inah takngial pawh kan thu tlang thei dawn em ni le? Mihring mahni nihna inhre miah lo, fel leh thaa inngai tlatte hi an hnawksak a, an bula khawsak a hahthlak, mi hriat thiam leh ngaihdamna a tlachham a, anmahni pawh an hah a, nguai hun an nei thin.

Min thunun tumtute kianga awm hrehawm kan tih tehlul nen, mite chunga len kan tum theuh si. Kan lemchanpuite rel tur leh sawisel tur kan ngaihtuah laiin min rela min sawiseltute chu “Engnge a nih bik” tiin anchhia kan lawh leh bawrh bawrh thung a. Hringnun khawvelah hian mihring rilru ang tluka hlu leh thianghlim a awm lo angin mihring rilru ang bawka sual leh tenawm a awm chuang lo.

A mak ka ti, kan fate chu an thiante zingah tlatlum se tih kan duh laiin a tiduhdahtu leh cheksawlh thintu chu an ina luhkhung tak kan nap a. Kan faten mi tha lo deuh nia kan hriat chu kawm lo se kan ti a, lehlam chuan mi tha chauh kawm turin an lo infuih ve mek bawk a. A ni taka lungpui pawh lungtein a kamki loh chuan hringnun khawvelah a awm thei lo a nih tak kha!

Thil-kawm ber paw’n mite chu a chunga thil-phal theuh turin a phut ru ve tho. Thinchhia mi tak paw’n zaidam bula khawsak hi nuam a ti ve asin. Mi rel ching tak paw’n midang mi rel hmangte chu zu hmusit ve tlat a! Hringnun khawvelah hian lemchang thiam apiang an vannei mai niin a lang. Lemchang thiam lo leh zei lo deuhte tan chuan lungngaihna leh tahna chirhdupah an chantir ve thung a. A ni, retheihna hi kutdawh nun a ni a, hausakna nun erawh chu chapona nun a ni thung si a.

Hringnun khawvela kan nun ho dante hi mak ang reng tak chu a ni. Mo fel leh zaidam, taima kan duhin makpa atan pawh zu in lo, taima tak, mi hausa fa emaw, degree nei pha chin emaw kan duh theuhva, mahse mahni fate chu zirtir kan tum hlei lo va. Kan fanuten pasal an neihin min chu-kha tha turin kan pasalte thunun thei ngei se kan ti a. Kan Mote erawh chuan an chhungte an chu-kha that deuh leh kan thikthu a chhe hman a, an pasalte an thunun theih lek phei chuan Mo sualah kan chan leh bawk si. A mak mang tak emaw... hringnun khawvel indona ram tak hi chu aw....!

Kan Moten an chhungte an tanpui lohin kan hmu thei bawk si lo, kan fanuten in hrang an chan atanga min rawn tanpui fo chuan fanu fel, chhungte hmangaihtu kan ti leh lawi si a nih hi. Kan makpaten min duat thiamin min chhawmdawl thei reng se emaw, thilphal em em tura kan beisei laiin kan fapaten an pu-zawnte chunga fel an tumin emaw, an tawiawm deuh fo chuan “An nu chhung lam ringawt a tanpui, keini lam chu engah min ngai lo, chu ti, kha ti,” kan ti leh bawk si a, aw,.... hringnun tak hi chu... ngaihtuah thiam a harin ngaihhna thiam a va har tak em! Nu-hrawn tawh phawt chu sual hle turah kan ruat sa nge ni, sawisel tur hlir kan zawng a. Fa-hrawn pawh chiti tho. Lehlamin “I nu-hrawn hi a chu ti” an tih mek laiin, lehlam paw’n “I fa-hrawn hi chutia i tih loh chuan” an lo ti ve bawk si a, inhmuh thiamna reng hringnun khawvelah hian a awm tawh thin lo. Buk dik lova zuartu paw’n buk dika lei tho a ni a tum.

Mihring hi a nihna dik takah chuan mitha a nih lohzia leh a nihna dik tak chu a chunga thil lo thleng apiangin a rawn hai lang mai thin. Kan duhdan leh ngaihdan a inthuhmun theih loh avang hian lungawina kan zawng thiam tawh lova, chu chu min tiluhai a, kan nun chu tawrhnain a khat a, hmelthatnate, chaknate chu bawrhsawmnaah a tawp a, nunna kan thlakhlelh em emte chu thihnaah a tawp a. Kan thil duh lai ngawih ngawihte pawh min tiluhaitu leh nakina la chhe leh vek tur an ni si. Hringnun khawvel zawng hman thiam a ngai a ni. A hmang thiam chuan thil engkim mai hi a hlimawm zawngin leh a tha zawngin an thlir a. Lungawi lohna an zawng lo a, lungawina chu an zawng zawk a, an zawn na na na chuan an hmu thin a ni. Mahse, mi tam zawk chuan lungawi lohna hi kan zawng zawk tlat si a!

Buddha-a khan hringnun awmzia hi a ngaihtuah nasa a, hrehawmna chi tinreng a tawrh hnua hringnun awmzia a ngaihtuah chhuah hmasak ber chu thatna hian thatna a hring a, sualna hian sualna a hring tih hi a ni. Ni, hringnun awmzia chu khawiah mah a awm lo. Hringnun chu keimahniah hian a awm a, a hmang thiam tan chuan nun hlimna an chhar ang a, a hmang thiam lo tan chuan lungngaihna khawvel chirhdupah a chan fo thin. Hei....ha... hringnun khawvel tak hi chu aw....!

ZEI VANGA LUCK

2008-09-19T02:45:00.003-07:00

by Lalena

Luck i duh em? Tu nge duh lo awm ang. Zei phawt mai teh.

Indopui II-na zawh hlim vel khan sipai tlangvalte chu an luck mai mai asin. An unitform nena nula an rim ngat chuan nula intivei takte pawhin an zui dawr dawr mai zel. Pa darben deuhva ngaih pawhin khaw khat nula hmeltha an tihte chu an kai chhuak nawlh nawlh zel. An hmel leh pumrua lam a ni lo, an nihna zawk a ni. A hun lai chuan an zei bera an luck tlat.

A hnu deuhvah chuan tuifinriata lawngpute chuan tlangval luck ber nihna duhawm tak chu an rawn chang leh a. An zin bo rei theih teh reng nen nulaten zu duh ber tlat a! Ina an awm rei leh rei loh lam a ni tawh lo, ram dang sum an neih tin ten vang zawk a ni. Nulate chuan an tam dawn lo tih an hre tlat. An melh zeuh tawh chuan an hmin sa tawp.

Tun hma deuh kha chuan in lam rawngbawl thiam leh khawsak tha nula an luck. Hmeltha leh sam sei apiang an luck leh. Nula apiangin sam zuah tur emaw an ti. A zuah sei nazawng an luck kher lo.

Tun I.T. (Information & Technology) hunah vethung, tu nge luck? Huaisen leh sum ngah, pian nalh leh sam sei lam a ni tawh lo. Sipai nih vang ngawtin nula hmeltha a neih mai theih tawh loh. Lawnga hnathawh leh ram danga inhlawh nazawng an ngaisang hran lo. Hmeltha satliah lahin “Tha mawl” tih bak an hlawh lo. A va buaithlak tak. A tu ber chu nge luck ta ang? “Luck i duh chuan zei rawh”. Zei avanga luck hun a thleng tlats.

IT hun a ni a, khawvel pum huapa mi chet dan. An thawmhnaw hak. An in chhung leh an bungrua. An eiin leh an hnathawh dan zawng zawng ni tin, darkar tinin a hmuh theih. Kawr hma hawng huai leh pheikhawk hrut thlurh thlurha khawlaia vak. Kal pai chhu chhu leh thur bem bum hmuh tur an vang hle a. Colom-board kil bial tuau tuau leh vak rawlai mai mai hmuh tur an vang.

Nula kal kak tluh tluh leh pheikhawk hrut hruih hruih. Ban then kak tuai tuai leh pawnfen rap chut chut. Sam hmawr kak fer fur leh ro bem bum. Ei leh in lama insum loh vanga thau vum thur. Infit lo tih hriat fahrana kal chak hlei thei lo. Hmai thu tak leh tum hmel pu reng. Mahni inring tawk lo tih hriat fahrana ip chui chui reng hmuh tur an vang khawp. An awm pawhin an luck lo hrim hrim.

Tu thawh sa mah a ring lo tih inhria ni awm taka hawiher zang vah mai. Lu leh hmai, taksa tifai vang reng. Thawmhnaw dak zaiha ha reng thawh hreh nei chuang si lo. A thil tih tawh reng reng hlawhtling ngei tura bei. A tih tawh lam chu a hnehsawh tih hriat reng mai. Hlim hmel pu sang reng thei, biak chakawm tak. A tulna hmun leh huna huaisen bawraw taka che si lo, mi dangte zahthiam. Hawihhawm taka mi tupawh be thei, a tul dan anga sum leh pai sen hreh lo chhuihthangvala chu a zei tlata a luck lo thei lo.

Pheikhawk sang leh hniam bun vanga a kal dan danglam chuang lo. Uluk taka mahni taksa vawng thianghlim. A hun lai ang zela lu, hmai, taksa bung hrang hrang chei thiam. Pawnfen a fen laia a rilru leh petikawt chhing a fen laia rilru inang reng. Kekawrtlawn a hak pawha lepchiah chuang lo. Hmeichhia a nihna hre reng, hmeichhia a nih vang ngawta zam chuang si lo. Pitar putar, naupang chhia leh tlangval a biak pawha aw ki danglam lo. Mi dangte zahthiam. An nihna ena mi pak huam leh hmuhsit ching mai lo. A tul dan anga muangchanga kal leh tlan dawr dawr pawh huam. Tul lem lo pawha biak chakawm tak, hmel pu. Va biak tak tak pawha hawihhawm taka mi lo chhawn thiam. Bag ah leh incheina sang deuh “ka zawk” ti mai maia rilru hniam pu lo. A khawsakna hmun tura zira inzir sa peih. Miin an tih theih chu ti ve thei mai tura inhuam lanute chuan khawiah pawh hmun an chang mai ni lovin miin an duhin an ngaisang. An zei a vangin an luck.

Zir avanga thiam. Thiam avanga mahni inrintawkna neih. Mahni inrintawk avanga zei. Zei avanga luck hunah kan chuangkai a. Eng nge i dinhmun le?

FIRST LOVE

2008-09-19T02:45:00.002-07:00

by VL Awia

Sap hovin ‘First Love’ an ti teh chawk a. Ngaihzawng neih hmasak ber boruak kha bo-in a ruak theih hle mai. Tun hnua han thlirlet chang hian nuih a zam a za leh lo, theihnghilh chakawm tak tak lah a inchherchhuan hner hnur. A then chu ngaihtuah chhuah chang a awm palh pawhin ka la zak chem chem. Zirlai by-heart harsa fe si hian kha’ng ka hriat rengnate kha a bo thei bawk si lo. Sawt ve tak anga lang chu kha lai boruak velah kha chuan kan intuai fai peih reng a, fai leh balin awmzia a neih thui chiam pawh ka hre lo. Fai vang ngawta inngaihzawn thu a awm lo va, balh deuh vang maia inhnawl thak thak pawh an awm ka ring hek lo.

Tleirawl tantirh ‘love’ lamtluangah khan commission an tih ang chi a thlawna chhawr theih hlek loh palai nuam ti tak tak an va’n tam teh reng. A then rinawm lutuk lah an intat lut ve nawlh bawlh bawk. Kha’ng boruak an palai atanga thiante sawipui lova mahni insawi thiam avanga innei tate pawh an awm lovang tih tunge sawi thei?

Chutichuan hemi kawnga thawkrim zet palaite leh thian mi fuihpawrh thiam tak takte zarah ‘First love’ chu ka tawng ve ta a, nge min tawng zawk ka hre chiah lo. Ami hrutdan a ril ruih mai. Chaw ei laiin ngaihtuahnaah a cheng. Mut hmunah, kan inhmuh huna ka sawi tur tawngkam thlum tuihnai thlifimin ka train chiam chiam. Ngaihzawng neih zet zawng a hlimawm a ni ang. Ek inahte hian ka lo sang nui vur vur. Inthiam lovin ka tum leh hnuk. Ka ngaizawnag tih hre hlei lote’n a hming an lam rik changte hian ka lo sen ap ap vel. thinlunga a thawh dan te reuh kha mak danglam ve tak asin!

Tute remruat nge ka hre tawh lo. A fala kan inhmuh hmasak ber tum kha!!! Inhnaih vak lovin kan thu. Sawi tur a vang a nia! A rehzia mai chu a reh tlawk tlawk a ni ber. Kan ngawi dun vang vang. Tah tak khan fanghmir thaibawi lo awm se, nu berin vin deuh hlak hlak chungin tir vel se, a order pek mai ni lo, pa ber titau nghawng nghawng pawh a ke pen ri thlengin ka hre thei hial ang. In lamah lo training thawkhat mah ila, bul tan dan tur ka hre lo. A tawpah chuan le, an vawkpuiin no engzat nge a hrin tih ka zawt thut. Mi en chuang miah lovin, vawk an vulh loh thu mi hrilh bul hmak. Kan ngawi leh vang vang. Haw ka rawt lah chuan a tho rang phian lehnghal. Inlan vawi khatna kha a ropui lo teh a nia! A thiante a lo hrilh ni ngei tur a ni, vawk piang chhinchhiah department-a convener ka nih leh nih loh thu fiamthuin min zawt sek. A nuam lem lo teh e!

Kan inngaihzawn chinah chuan an veng ngawt pawh tun hma aiin a let zain a mawi a, an run ngat chu ka Duhlaii chenna a nih avangin lunghlu leh rangkachaka thuam ni lo mah se, ka tan a hlu tak meuh. An kawtthler zawh chang hian lungphu a danglam thei daih. Chu mai a ni lo, Sunday chawhma tanna hun hmang rei thei zet A-nu-tei ka lo nin ruk em em thinte kha a reh daih. Thawh fumfe nei lova zinga pelh lova radio ngaithlaa a bengin a hriat bak bak sawi uara phul buan buan thin A-pa-tea pawh khak buai lovin ka thlir liam ve thei ta. Hmangaihna pawhfan (rubber) fan theihzia mai mai hi. Lehkhaden (card) ni thut se Akpui ni ngei ngei tur, Duhlaii hringtu nu, zing bazar rei champion, amah chauha a inhnawhpuar luat avanga tukthuan ei hleih theih loh avanga chawnghei tawngtai lama phusa thin, hmelhriat apiang dilchhut taka engkim zawt peih reng nen pawh kan inmil ta phian. Tawngtai semin tuk tin a feh chhuak a, ina a awm hun chu a an hun. Pa ber a sawisel, fapa a hau, fanu a vin, a mit hmuhah tling zo reng an awm mawlh lo. ‘Piangthar piangsual’ ti rawk turin ka huaisen tawk si lo. Amah zilhin lo tlak ve deuh ila boruak a chingpen vek thei tih ka hre chiang khawp mai.

Hmangaihna kawng lo zawh chiar dup tawhten min lecture ngun nangiang. “Chu tin, kha tin,” a tam ngang mai. Darthlalang hma meuha ding pawhin ka zir lawk thin. A hun a lo thleng tak taka ka theihnghilh vek. A bo hmiah. Tehkhin dawn ila, Beram bo nge, Duli bo? Ka bo lehzual. Insual huai ka ni lo. Mahse, he kawngah hian insual aiin ka dawih fe zawk.

Lehkhawthawn hmanga indawr kha kan ching nasa. A tirah chuan ziak thiam hek lo i. Eng engemaw khilaiin mi ka ziahtir. An thu han ziah chhuahte chu chilthli tla lo chauhin ka lo thlir dauh dauh ringawt. an ziak thenkhatte chu ka chhiar rualin ka tim uai uai.A thu an peih fel diam hnuah, kutziak mawi deuh phungbawm atan sawm a tul leh. Uluk chang chuan pen tui rimtui hman bakah a paper tihrimtui nan naupang powder phul thuak thuak chang pawh kha a awm thinin ka hria. Beisei ruk ang ngeia lehkhathawn chhan letna a lo thlen kha chhiar ngun luat avangin ka khalh zawt hnep thin. Fimkhur lo deuhten kekawrtlawn iptea dah that lehkhathawn ropui an lo suk hnan zet chu a uiawm vawng vawng thin asin! Ka huatthu sawi der lo chhungte chungah buaina hial chawh chhuah a chakawm thin. Lehkhathawn pahnioh khat a thlenna tur dik taka a thlen loh palh chang khan a pawi thui lutuk thin. Thian phawk zualte’n mi hriatah ngei an han chhiar lauh lauh mai thin a, an uar lai leh over deuh lai kha spell fuh hlei thei lo niawm takin muangchanga an han chhiar nawn khauh khauh thinte kha…

Thikthute kha a chhe dun thin a nia. Engemaw hlekah kan intinuar, kan titau, thlem hmasatu nih tlawma laiin chawlhkar meuh a liam chuan chhuanlam remchang dapin kan phi ruai si. Boruak a that leh ni chuan thinrim lai hmel hmang, tawngkam thlengin kan inzirsak leh a, hlimin kan nui leh thin. Thenkhat mi inkar thu chhiatna tur ringawt dapa lo hmanhlel an awm tlat bawk a. Thiante fiamthu kam hnih khat hip fuh loh vanga ni thum chhung inkhawm serh chang pawh a awm tho.

Khaw khat veng khat deuhthawa khawsa si khan thlalak exchange velte kha a hun lai chuan hlimawm deuh mai a ni. Lungrunte thlalak han kawl hnap mai chu ngaihthat thlak tak asin! Mi hmuh loha bih leh zeuh thin kha mahhla ve lo maw? Ani khan thlalak amah ang angeia mawi lutuk mai kha ka kutah a rawn thlen a. Lawm pawh ka lawm. Thlalak chungchangah buai namein ka buai lo. A mala thlalak ka neih zianga mi a ni hnen ema thlen ngam tur ka kawl si lo. Uluk loh chi a ni si lo. Tha ve deuhva ka inhriatna thlalakte lah chu chhungkua emaw, thian zaho emaw, chhungte nena ni pawipawh engemaw denchhena kan lak a ni lawi si. Ka lan fuh deuhna cheh thlak a rem si lo. A buaithlak ngei mai. Thlalak pakhat na na na chu theh chchuak vein ka inhria a, a eng ber nge ka hre thei tawh der lo. ‘First love’ boruakte kha a hun lai rau rauvah chhinchhiah tur leh theihnghilh tlak a tam mang e.

Upa danah a rei ve ta, thangkhat lian lai a liam ta alawm. Khang hun lai khan, neih lung khawngin lilam (tender) chhangin sa zawrh phalna licence dil nan sum thahnem tawk an seng a. Tun lai nena teh chuan an sum chelek tam leh tlem chauh a inthlau ang. Kristian insuihkhawm, Thalai, Nuho, Pawlho leh mimal chenin kha’ng hun lai khan mahni ran ngei mah ni se, a ruka khawn thluka chawlhni chawhmeh zuara sumdawnna remchanga lo hmang angte hi an awm lo mai thei. Ka ‘First Love’ neih hun lai khan!!!

BLUES GUITARIST ROPUI BER: B.B.King

2008-09-19T02:45:00.001-07:00

by The Rengs

B.B.King tiha hriatlar, American blues guitarist leh singer-song writer , Riley B.King chu September 16, 1925 khan khawvela blues musician thiam ber leh zah kai ber ni turin a lo piang a. Mahse rhythm a perh ngai miah lo . A guitar (Lucille) chu solo perh na’n chauh a hmang thin . Perh chungin a zai thei lo bawk . Kum 82-a upa tawh Kinga hi zu in lo leh zial zu lo mi a ni . Tunah hian zunthlum natna veiin a awm mek.

1947-ah Los Angeles khua-a R P M Records – ah hla a thun tan a , 1950 chho velah chuan R & B music-ah mi pawimawh be rte zingah a tel pha der mai . November 1964 khan Chicago , Illinois-a Regal Theater-ah a chatuan rotling tur Live at the Regal a record . 1969 khan blues market piah lamah , R & B artist-te’n an tawn ngai zen zen loh , Pop leh R & B chart-a hit nih kawpna chu “ The Thrill is Gone “ chuan a tawng riap mai . Kum1970 chho lamah pawh a hla “ To Know Is to Love You”-te leh “I Like to Live the Love”-te chuan a hlawhtlinna lui pui an la luan tir hum hum reng a.1951 atanga 1985 inkar, kum 34 chhungin Billboard’s R&B charts-ah vawi 74 the meuh a han lan chu!

1980,1990,2000 chho lamah chuan Kinga hla thar ngaihthlak tur a vang chho tial tail a,mahse television show lamah a lar tulh tulh ve thung.Kum khat chhungin zan 300 lek lek te mawle a lan thin le!Kum 1998-a Irish band U2 nena an thun “Rattle and Hum” album-a single,”When Love Comes to Town” zarah thangtharte’n Kinga an hre lar thar leh a.Kum 2000 khan guitarist Eric Clipton nen “Riding with the King”record-in an inkawp bawk.Khawvel ram tin hmun tinah B.B.Kinga concert 100 chuang TV leh Radio atangin tihchhuah a ni tawh.

B.B.King tiha hriatlar, American blues guitarist leh singer-song writer , Riley B.King chu September 16, 1925 khan khawvela blues musician thiam ber leh zah kai ber ni turin a lo piang a. Mahse rhythm a perh ngai miah lo . A guitar (Lucille) chu solo perh na’n chauh a hmang thin . Perh chungin a zai thei lo bawk . Kum 82-a upa tawh Kinga hi zu in lo leh zial zu lo mi a ni . Tunah hian zunthlum natna veiin a awm mek .

1947-ah Los Angeles khua-a R P M Records – ah hla a thun tan a , 1950 chho velah chuan R & B music-ah mi pawimawh be rte zingah a tel pha der mai . November 1964 khan Chicago , Illinois-a Regal Theater-ah a chatuan rotling tur Live at the Regal a record . 1969 khan blues market piah lamah , R & B artist-te’n an tawn ngai zen zen loh , Pop leh R & B chart-a hit nih kawpna chu “ The Thrill is Gone “ chuan a tawng riap mai . Kum1970 chho lamah pawh a hla “ To Know Is to Love You”-te leh “I Like to Live the Love”-te chuan a hlawhtlinna lui pui an la luan tir hum hum reng a.1951 atanga 1985 inkar, kum 34 chhungin Billboard’s R&B charts-ah vawi 74 the meuh a han lan chu!

1980,1990,2000 chho lamah chuan Kinga hla thar ngaihthlak tur a vang chho tial tail a,mahse television show lamah a lar tulh tulh ve thung.Kum khat chhungin zan 300 lek lek te mawle a lan thin le!Kum 1998-a Irish band U2 nena an thun “Rattle and Hum” album-a single,”When Love Comes to Town” zarah thangtharte’n Kinga an hre lar thar leh a.Kum 2000 khan guitarist Eric Clipton nen “Riding with the King”record-in an inkawp bawk.Khawvel ram tin hmun tinah B.B.Kinga concert 100 chuang TV leh Radio atangin tihchhuah a ni tawh.

Farewell Tour

Kum 80 a pelh hnu, March 29, 2006 khan England ram Sheffield khua Hallam Arena-ah UK leh Europe tana farewell (inthlahna) tour chu a tan a.He tour-ah hian Gary Moore a hruai tel.April 4 khan Wembley Arena-ah concert hnuhnung ber neiin he tour hi a titawp ta.

Mahse July thla-ah Europe-ah kal lehin Switzerland rama khawvel ngaihsan Montreux Jazz Festival vawi 40-na-ah tum hnih (July 2nd-leh 3rd-ah) inshow-in inthlahna a va hmang leh a. July 14th-ah Germany rama Zurich khuaa Blues at Sunset-ah a inlan bawk.

November leh December chhungin Brazil-ah vawi ruk show a nei bawk.November ni 29 khan Sao Paulo khuaah journalist pakhatin Kinga hnenah Chu mi tum chu a farewell tour a nih tak tak leh tak tak loh a zawt a, a ni chuan “Film star zingah chuan Sean Connery hi ka duh ber a, a film siam pakhat hming chu “Never Say Never Again” tih a ni “ tiin a chhang daih.

Honors and Awards

-1990-ah National Medal of Arts award a dawng.
-2004-ah “blues tana a thawh hlawkna avangin University of Mississipi atang honorary Ph.D nihna leh Royal Swedish Academy of Music atang “Polar Music Prize” a dawng.
-December 15, 2006 khan President George W. Busha’n “Presidential Medal of Freedom” a hlan.

Grammy Awards

-1987-ah Grammy Lifetime Achievement Award a dawng.
-Best Traditional Blues album-ah vawi kua Grammy Award a dawng. Chung te chu : (i) 1984 (for Blues N’ Jazz), (ii) 1986(for My Guitar Sings the Blues), (iii) 1991(for Live at San Quentin), (iv) 1992(for Live at the Apollo), (v) 1994(for Blues Summit), (vi)2000 (for Blues on the Bayou), (vii) 2001(forRi ding with the King), (viii) 2003(for A Christmas Celebration of Hope), (ix) 2006 (for B.B.King & Friends:80).
-1982 khan Best Ethnic or Traditional Folk Recording-ah Grammy (for There Must Be a Better World Somewhere) a dawng.
1997 khan Best Rock Instrumental Performance-ah Grammy (for SRV Shuffle) a dawng.
-1971 khan Best Male R&B Vocal Performance-ah Grammy (for The Thrill is Gone) a dawng.
-1998-ah “The Thrill is Gone” album vangin “Grammy Hall of Fame Award” a dawng. He award dawng tur chuan a tlem berah kum 25 tal that danglam bikna nei album a nih a ngai.
-1995-ah “Kennedy Center Honors” award hlan a ni. Hei hi “a dam chhung hna thawh that leh a thiamna danglam bik “ vanga dawng a ni.

Trivia

-2003 kuma Rolling Stone magazine puan danin Kinga hi nung dama la awm zinga guitarist ropui bera thlan a ni. “100 greatest guitarists of all time”-ah pathumna a ni bawk.(1st = Jimi Hendrix, 2nd = Duyane Allman-an thi ve ve tawh :R.P-a)
-Kum tin June thla chawlhkar hmasa ber chhungin Indianola-ah B.B.King homecoming festival an hmang ziah.
-Live at the Regal hi Kinga album tha bera ngaih ni fo mahse a ni chuan My Kind of Blues chu a kut chhuak tha berah a ngai.
-Kinga hi Bluesville khaw Mayor a ni.
-A hming lem “B.B” hi “Beale Street Blues Boy” kaih tawi a ni.

KA NU KA NU LO HAW THUAI THUAI

2008-09-18T10:52:00.000-07:00

by Lalhmingthanga

Tun hma kan nu leh pate huna an hnathawh dan leh an khawsak dan chhuitute tan chuan he hla ‘Ka nu ka nu lo haw thuai thuai’ tih hi rinchhan tlak tak a ni ngei ang. Naupan laia kan lo sak ve mai mai thin dan chuan:
Ka nu ka pa lo haw thuai thuai,
Tlangah ruahpui a sur e;
Sakhi lampeng rawn zawh la,
Lo zangphar der der ang che;
Chhingmita a tap e, Rolengi a tap e,
Ka mumang mang chu ni sela;
Tlangah ka zuk au naral ral tur a.. tih hi a ni.

A chhan leh vang kan lo ngaihtuah chiang ngai lem lo va, kan lo tawng sak ve mai mai thin kha a ni a, Chhingmiti nge Chhingmita tih pawh ka chiang tawh mang lo. Tlar thumnaa ‘Sakhi lampeng’ tih pawh hi thenkhat chuan Sakhiin lampeng leh peng lo a nei chuang lo, "A khi lampeng" tih zawk tur hi a lo ni tiin an sawi a, mahni lo tihdan vete kha a ngainatawm e tih lovah chuan ka pawm ve tho mai.

A hla hi a tawi hle naa han belh chian chuan tun hmaa kan nu leh pate thingtlang lo nei, thlawhhma la an tul theih thinzia mai kha mitthlaah a lo lang iar iar thin. Lo vahna emah chuan nu hi an tel vak lova, mangkhawh atang tawh hi chuan tul namenin an tul tawh lo. Nau pawm lai leh hnute hne lai ngat pawh an feh chhuahsan dawr dawr thin. Nau chu a uten emaw an lo awm a, engmaw ti tiin an lo nilenpui mai thin a ni.

Tun hma kan nu leh pate huna an hnathawh dan leh an khawsak dan chhuitute tan chuan he hla ‘Ka nu ka nu lo haw thuai thuai’ tih hi rinchhan tlak tak a ni ngei ang. Naupan laia kan lo sak ve mai mai thin dan chuan:
Ka nu ka pa lo haw thuai thuai,
Tlangah ruahpui a sur e;
Sakhi lampeng rawn zawh la,
Lo zangphar der der ang che;
Chhingmita a tap e, Rolengi a tap e,
Ka mumang mang chu ni sela;
Tlangah ka zuk au naral ral tur a.. tih hi a ni.

A chhan leh vang kan lo ngaihtuah chiang ngai lem lo va, kan lo tawng sak ve mai mai thin kha a ni a, Chhingmiti nge Chhingmita tih pawh ka chiang tawh mang lo. Tlar thumnaa ‘Sakhi lampeng’ tih pawh hi thenkhat chuan Sakhiin lampeng leh peng lo a nei chuang lo, "A khi lampeng" tih zawk tur hi a lo ni tiin an sawi a, mahni lo tihdan vete kha a ngainatawm e tih lovah chuan ka pawm ve tho mai.

A hla hi a tawi hle naa han belh chian chuan tun hmaa kan nu leh pate thingtlang lo nei, thlawhhma la an tul theih thinzia mai kha mitthlaah a lo lang iar iar thin. Lo vahna emah chuan nu hi an tel vak lova, mangkhawh atang tawh hi chuan tul namenin an tul tawh lo. Nau pawm lai leh hnute hne lai ngat pawh an feh chhuahsan dawr dawr thin. Nau chu a uten emaw an lo awm a, engmaw ti tiin an lo nilenpui mai thin a ni.

Nau riltam leh tuihal lutuk tawh lah chuan engmah sawi thei ve lo nafam chu tah ngawtin ro an lo rel ve tawh thin. A awmtu a u te chuan nute feh hawn hlan nghakhlelin an lo hawnna lam tur hlir an thlir a, lo sul hawn hun chuan a u kaiin a nau zawk an pua a, kawtchhuah lam an pan hna hna a, kawtchhuah atang chuan nau awi chungin he hla hi an sa ta thin a ni phawt mai. Nau a tlei duh tawh si lova, nute lah an lo la thleng thei bawk si lo chu, a awmtu tan chuan an lo thlen hlan an va nghakhlel dawn tak em!

Mit tla lek leka an lo thlir, sakuh ser nghah taka an nghah chu an lo thleng ta a, mahse, nu ber chuan tuahthing a rawn phur a, eng engemaw a rawn pawm haw bawk. A lu thurzia lah chu sawi thu cheng lo, a han balhzia lah chuti hlauh. Mahse, balh leh thur, tul leh hah engmah sawi thei ziazang ni tawh hek lo, a thil pawm chu tu ber emaw hnenah a han hlan a, naute, a u puak lai chu a han pawm sawk sawk a, a rit phurh pawh hre lek lovin a hnuntui chu lungchim takin a hnek ta. Hetih lai hian a nu nge lawm zawk anga a fa tih zawhna hi chhan thiam a har ngawt ang.
He hla hi tu thinlungah emaw chuan a cham ve a ni phawt ang, Lianthangpuia’n chang li leh a thunawn thiam tak leh a thua cheng tak, ngaihnawm takin a rawn sa ta a. A chang a pung ta bawk a, a thuin a fawm kim zawk ta bawk nen ngaihthlak a manhla hle a ni. A hla tlem han tarlang ila.

Aw, ka dawn ngam lo ka nu vawiin nilen tur,
I tel lo chuan e ka nau a tlei thei si lo;
Nichhun tluana awi leh e tangah ka vuan a,
Mahse ka hnem zo lo ve, hnuntui ngai a lo tap e.
A chang dang pawh han en ila, a phuahtu hian nau awmtua inchanin hna tul avangin a nu chuan a nau chu ngaihtuah chung chungin a fehsan thin dan, lal leh hausaa khawsa ve thei deuh zawng ni se a nu hian a liamsan bik hauh lo tur hi a ni a. Mahse, a feh chhuah a tul miau siziate inbelin a phuah ta a ni. Ani chuan nau chu awmin duat takin awi hlen hlen mah se, "Ka hnem zo lo ve, hnuntui ngai a lo tap e" a ti lo thei lo a ni. Hei vang tak hian a nu lo hawn chu nghakhlel takin "Lo haw thuai thuai, lo haw thuai thuai" a ti ta lawm lawm mai a ni.

A nu hi feh lovin awm sela an hlim thin tur dante a han dawn kual a. A nu zawng anmahni avanga hah tak leh rim taka thawk a nih chu a hai lo, a nu a khawngaih a, a nau a lainat bawk a, inthlahlel ve vete pahnih inkarah dingin:
"A dam kan hauh zel ang a, chung Khuanu zarah,
Sial ang ka len ve hun chuan hahdam ni i tawng ngei ang"
tiin thu tlukna nghet tak a chher chhuak ta a ni.

He hla hian thiltihtheihna mak tak a nei a ni ngei ang, Yangon-a Dinga leh Ramsiamite fa pahnihna Bush-a an tih mai hi kum sarih mi lek a nih laiin he hla an hawn tawh chuan a ngaithla vang vang a, a mittui a tla leh zawih zawih thin. A thluk a lunglen thlak a, a thu a mawi a, a satu’n a thiam bawk si nen, ka ngaihthlak apiangin ka hnim deuh ruih thin (Kei chang ka ni lo, in nih ve tho kha).

Tunlai mite tan chuan ‘A mawl thlak’ tih mai a awl viau ang. Mahse hmangaih tawp lova hmangaihtu a nu chuan a hmangaih a rila rahte nunkhua tur dawnin a sur a sa hnuaiah hrehawm pawisa lovin a thawk a ni zawk. Kawng tam takah Pa aiin nute hi dawihzep zawk mah se, fa tan erawh chuan ngunhnam an tih lova, silaimu an hlau hek lo, engkim an hmachhawn ngam tlat thung.
He hla ka ngaihthlak apiangin kum sawmthum dawn lai liam taa min liamsan ka nu kha ka mitthlaah fiah takin a lo lang thin a, ka pum na ka vial ngawlh ngawlh laia "Aw, Mamte, i tawrh ai hi han tawrh zawk ka va duh tak em!" a tih tawngkamte kha ka bengah fiah takin a lo lang leh thin. Ka nu khan tawngkam tha hmang mai a ni lo va, min hnem satliah mai lah a ni hek lo. Ka tawrh ai tawrh a ngam tih chu Pathian thu anga chiang a ni. Dawt sawi hmang ber ni ta ila, he thuah ngat hi chuan thu dik ka sawi tih min hriatpuitu ka ngah ve tho vang.

Enga tinge Lianthangpuia hian a pa a lam tak loh, paber nen feh tlang a ni si a? Zawhna awm tak a nih laiin in lama nau lo awmtu dinhmun atang chuan nu mawlh kha a thlahlel zawk lo thei lo a ni. Nipolien ropuia ngat pawh khan "Nu nau thenna kut hi khawvel awptu a ni" a ti a, Pu Bawihchhuaka pawh khan "Nu hi kan innghahna kulhpui a ni" a ni lawm ni kha. Nu thlakhlelhawmzia hi sawi sen rual a ni lo. Kha lam kha dah thain nu leh paten fate tana an lo thawh nasatzia lamin tlangkawm lam i pan mai teh ang.

Tuna ka thlir hla atang ngawt pawh hian nu leh paten fate rualawh hlau reng renga eng hrehawm mah pawisa lova an inpek dan a lang nghal ruak mai. A huna zirin fate tana an nun an hlanna hi chhum lo chat lovin a lang zel a. Tunlai mite hi chuan min lo retheihpuizia hi a hriat pawh kan hre tawh lo. Zum leh hriam karah ke lawngin an awm a, tunah erawh sen lai atangin pheikhawk chi hrang hrang kan bun ta thung. An chawlhni kawr tha ber chu tualtah kut thui a ni a, tunah erawh an chawlhni kawrte chu hnathawh nan pawh kan duh tawh lo. E khai, kan inthlauh dan hi sawiin a siak lo a ni ber mai.

An thiam tawk thlawhhma lain a sur a sa hnuaiah kawla ni chhuak chhiara rim lutuka an thawh rah chu faten an seng ta. Fate mi ang sa anga an khawsak theih phawt chuan an thawhrimna zawng zawng kha hre chang tawh lovin lungsi takin an hun an hmang liam thin.

Ha hla atanga thangtharten kan zir tur ber nia lang chu, nu leh pate liam hma ngeia ‘tihnawm ve’ hi a ni.

"Sial ang ka len ve hun chuan,
Hahdam ni i tawng ngei ang..." tih ang hian.