Sap hovin ‘First Love’ an ti teh chawk a. Ngaihzawng neih hmasak ber boruak kha bo-in a ruak theih hle mai. Tun hnua han thlirlet chang hian nuih a zam a za leh lo, theihnghilh chakawm tak tak lah a inchherchhuan hner hnur. A then chu ngaihtuah chhuah chang a awm palh pawhin ka la zak chem chem. Zirlai by-heart harsa fe si hian kha’ng ka hriat rengnate kha a bo thei bawk si lo. Sawt ve tak anga lang chu kha lai boruak velah kha chuan kan intuai fai peih reng a, fai leh balin awmzia a neih thui chiam pawh ka hre lo. Fai vang ngawta inngaihzawn thu a awm lo va, balh deuh vang maia inhnawl thak thak pawh an awm ka ring hek lo.Tleirawl tantirh ‘love’ lamtluangah khan commission an tih ang chi a thlawna chhawr theih hlek loh palai nuam ti tak tak an va’n tam teh reng. A then rinawm lutuk lah an intat lut ve nawlh bawlh bawk. Kha’ng boruak an palai atanga thiante sawipui lova mahni insawi thiam avanga innei tate pawh an awm lovang tih tunge sawi thei?
Chutichuan hemi kawnga thawkrim zet palaite leh thian mi fuihpawrh thiam tak takte zarah ‘First love’ chu ka tawng ve ta a, nge min tawng zawk ka hre chiah lo. Ami hrutdan a ril ruih mai. Chaw ei laiin ngaihtuahnaah a cheng. Mut hmunah, kan inhmuh huna ka sawi tur tawngkam thlum tuihnai thlifimin ka train chiam chiam. Ngaihzawng neih zet zawng a hlimawm a ni ang. Ek inahte hian ka lo sang nui vur vur. Inthiam lovin ka tum leh hnuk. Ka ngaizawnag tih hre hlei lote’n a hming an lam rik changte hian ka lo sen ap ap vel. thinlunga a thawh dan te reuh kha mak danglam ve tak asin!
Tute remruat nge ka hre tawh lo. A fala kan inhmuh hmasak ber tum kha!!! Inhnaih vak lovin kan thu. Sawi tur a vang a nia! A rehzia mai chu a reh tlawk tlawk a ni ber. Kan ngawi dun vang vang. Tah tak khan fanghmir thaibawi lo awm se, nu berin vin deuh hlak hlak chungin tir vel se, a order pek mai ni lo, pa ber titau nghawng nghawng pawh a ke pen ri thlengin ka hre thei hial ang. In lamah lo training thawkhat mah ila, bul tan dan tur ka hre lo. A tawpah chuan le, an vawkpuiin no engzat nge a hrin tih ka zawt thut. Mi en chuang miah lovin, vawk an vulh loh thu mi hrilh bul hmak. Kan ngawi leh vang vang. Haw ka rawt lah chuan a tho rang phian lehnghal. Inlan vawi khatna kha a ropui lo teh a nia! A thiante a lo hrilh ni ngei tur a ni, vawk piang chhinchhiah department-a convener ka nih leh nih loh thu fiamthuin min zawt sek. A nuam lem lo teh e!
Kan inngaihzawn chinah chuan an veng ngawt pawh tun hma aiin a let zain a mawi a, an run ngat chu ka Duhlaii chenna a nih avangin lunghlu leh rangkachaka thuam ni lo mah se, ka tan a hlu tak meuh. An kawtthler zawh chang hian lungphu a danglam thei daih. Chu mai a ni lo, Sunday chawhma tanna hun hmang rei thei zet A-nu-tei ka lo nin ruk em em thinte kha a reh daih. Thawh fumfe nei lova zinga pelh lova radio ngaithlaa a bengin a hriat bak bak sawi uara phul buan buan thin A-pa-tea pawh khak buai lovin ka thlir liam ve thei ta. Hmangaihna pawhfan (rubber) fan theihzia mai mai hi. Lehkhaden (card) ni thut se Akpui ni ngei ngei tur, Duhlaii hringtu nu, zing bazar rei champion, amah chauha a inhnawhpuar luat avanga tukthuan ei hleih theih loh avanga chawnghei tawngtai lama phusa thin, hmelhriat apiang dilchhut taka engkim zawt peih reng nen pawh kan inmil ta phian. Tawngtai semin tuk tin a feh chhuak a, ina a awm hun chu a an hun. Pa ber a sawisel, fapa a hau, fanu a vin, a mit hmuhah tling zo reng an awm mawlh lo. ‘Piangthar piangsual’ ti rawk turin ka huaisen tawk si lo. Amah zilhin lo tlak ve deuh ila boruak a chingpen vek thei tih ka hre chiang khawp mai.
Hmangaihna kawng lo zawh chiar dup tawhten min lecture ngun nangiang. “Chu tin, kha tin,” a tam ngang mai. Darthlalang hma meuha ding pawhin ka zir lawk thin. A hun a lo thleng tak taka ka theihnghilh vek. A bo hmiah. Tehkhin dawn ila, Beram bo nge, Duli bo? Ka bo lehzual. Insual huai ka ni lo. Mahse, he kawngah hian insual aiin ka dawih fe zawk.
Lehkhawthawn hmanga indawr kha kan ching nasa. A tirah chuan ziak thiam hek lo i. Eng engemaw khilaiin mi ka ziahtir. An thu han ziah chhuahte chu chilthli tla lo chauhin ka lo thlir dauh dauh ringawt. an ziak thenkhatte chu ka chhiar rualin ka tim uai uai.A thu an peih fel diam hnuah, kutziak mawi deuh phungbawm atan sawm a tul leh. Uluk chang chuan pen tui rimtui hman bakah a paper tihrimtui nan naupang powder phul thuak thuak chang pawh kha a awm thinin ka hria. Beisei ruk ang ngeia lehkhathawn chhan letna a lo thlen kha chhiar ngun luat avangin ka khalh zawt hnep thin. Fimkhur lo deuhten kekawrtlawn iptea dah that lehkhathawn ropui an lo suk hnan zet chu a uiawm vawng vawng thin asin! Ka huatthu sawi der lo chhungte chungah buaina hial chawh chhuah a chakawm thin. Lehkhathawn pahnioh khat a thlenna tur dik taka a thlen loh palh chang khan a pawi thui lutuk thin. Thian phawk zualte’n mi hriatah ngei an han chhiar lauh lauh mai thin a, an uar lai leh over deuh lai kha spell fuh hlei thei lo niawm takin muangchanga an han chhiar nawn khauh khauh thinte kha…
Thikthute kha a chhe dun thin a nia. Engemaw hlekah kan intinuar, kan titau, thlem hmasatu nih tlawma laiin chawlhkar meuh a liam chuan chhuanlam remchang dapin kan phi ruai si. Boruak a that leh ni chuan thinrim lai hmel hmang, tawngkam thlengin kan inzirsak leh a, hlimin kan nui leh thin. Thenkhat mi inkar thu chhiatna tur ringawt dapa lo hmanhlel an awm tlat bawk a. Thiante fiamthu kam hnih khat hip fuh loh vanga ni thum chhung inkhawm serh chang pawh a awm tho.
Khaw khat veng khat deuhthawa khawsa si khan thlalak exchange velte kha a hun lai chuan hlimawm deuh mai a ni. Lungrunte thlalak han kawl hnap mai chu ngaihthat thlak tak asin! Mi hmuh loha bih leh zeuh thin kha mahhla ve lo maw? Ani khan thlalak amah ang angeia mawi lutuk mai kha ka kutah a rawn thlen a. Lawm pawh ka lawm. Thlalak chungchangah buai namein ka buai lo. A mala thlalak ka neih zianga mi a ni hnen ema thlen ngam tur ka kawl si lo. Uluk loh chi a ni si lo. Tha ve deuhva ka inhriatna thlalakte lah chu chhungkua emaw, thian zaho emaw, chhungte nena ni pawipawh engemaw denchhena kan lak a ni lawi si. Ka lan fuh deuhna cheh thlak a rem si lo. A buaithlak ngei mai. Thlalak pakhat na na na chu theh chchuak vein ka inhria a, a eng ber nge ka hre thei tawh der lo. ‘First love’ boruakte kha a hun lai rau rauvah chhinchhiah tur leh theihnghilh tlak a tam mang e.
Upa danah a rei ve ta, thangkhat lian lai a liam ta alawm. Khang hun lai khan, neih lung khawngin lilam (tender) chhangin sa zawrh phalna licence dil nan sum thahnem tawk an seng a. Tun lai nena teh chuan an sum chelek tam leh tlem chauh a inthlau ang. Kristian insuihkhawm, Thalai, Nuho, Pawlho leh mimal chenin kha’ng hun lai khan mahni ran ngei mah ni se, a ruka khawn thluka chawlhni chawhmeh zuara sumdawnna remchanga lo hmang angte hi an awm lo mai thei. Ka ‘First Love’ neih hun lai khan!!!
Post a Comment