I DUH CHIAH MAW

by F. Lalrammawia

Heti zawng hian hma i’n la tan daih teh ang: Mi zawng zawng hian mahni nun dan theuh kan hriat fiah theihna turin ni khat chhung chauhva kan thil tih i ziak theuh teh ang u. Hmaih nei reng reng lovin i ziak chhuak fai vek ang aw. Entir nan: Tlangval pakhatin a ni khat chhung hun hman dan a ziak a, zep ruk a nei lo.

“Tukin chu ka tho tlai deuh va, zing dar 8-ah ka tho tawp a. Ni zanah zu ka in tam deuh avangin ka hai chhu mai. Ka nu pawhin “Zu rim i nam vung vung maia ka luak a tichhuak e” a ti a. Mahse ka inthlahrung chuang lo. Ka thawmhnaw ka inbel sawk sawka in atang chuan ka chhuak leh ta mai a. Zu hmun bawk ka pan leh ta a ni. Zu man pawh ka nei a ni lo, a bain ka in leh ta phawt a. Tukthuan ei hun pangngaiah pawh chaw eiin ka haw lo. Nilengin hna pakhat mah thawh ka nei bawk lo. Ka zu inpui thiante nen engmah thawh nei lovin kan khawsa nilung leh ta mai mai a. Tlaiah zu nam phual chungin zanriah ei turin ka haw ve leh ta ringawt a, ka chaw ei pawh chu ka kun chhur a. Ka ei khama ka kalchhuak leh ta thuai a. Zu zawrhna hmunah kalin ka in belhchhah leh hlek a, zu man chu ka bat belh leh ta a ni. Tichuan ka thian zu rui ve bawkte nen nula zahawm em em bik lo kan rim a, tawngkam ho tak tak kan chhak chhuak a. In neitu chhungkua zah der eihna pawh kan nei lo. Tichuan zan rei lam deuhvah khawlaiah kan au thler duar duar a, miin min nin dan tur kan ngaihtuah reng reng lo. Ka zu ruih a reh ta deuh tihah kan in lam panin ka haw ve leh ta ringawt a. Ka pa’n min lo hau va. Ka pa chu zah nachang ka hre miah lo. Ka pa tawng aia ring leh vin zaawkin ka chhang tuar tuar a, ka pa nen chuan kan insual lo chauh a ni ringawt mai. Tichuan ka mu leh ta ringawt mai a ni,” tiin a ziak a.

Chhiartu duh tak, ngun takin i ngaihtuah tlang teh ang. ‘I duh chiah maw?’ tih hi nangma nunah lalut hmiah rawh le. A chunga tlangval pakhatin a ni khat chhung nun a ziak anga nung hi mi engzat nge awma i rin le? He tlangval ama Diary ziaktu ngei hian a fapa a lo tlangval hunah amah ang chuan rawn nung ve chiah sela, amah ngei chu tar upa lam a nih hunah a fapa chuan zah eih lovin rawn ti ve pap pap sela. Chutih hunah chuan a fapa chu thahrui lamah chak zawk tlat tawh mai sela. Hmana ama Pa, zu rui chunga a ngam em em ang khan rawn ngam ve hle mai sela hrehawm a ti hle mai lovang maw? Chu chu alawm “I duh chiah em?” kan tih kalhmang chu.

‘Mahni inhmangaih lo tunge awm ang?’ kan ti theuh. A dik kim meuh vem? Tunah hian mahni inbih chiang ta theuh ila. Zu ina rui reng mai pawh hian mahni inhmangaih a inti ngei ang. Mahni thawh chhuah chhun Money atana hmang zo zel, ei in ral hmiah hmiah mekte pawh hian mahni inhmangaih kan inti tho zel chu ni fahmiang. Silhfen tha leh mawi apiang inbelna atana sum leh pai hmang hem hemtute hi mahni mawina tur ngaihtuah nafam chu mahni inhmangaih an inti lo thei lo vang. Mahni nuam tih ang anga awmte hlei hlei hian mahni inhmangaih thiam hlei hleiah kan inngai a ni mahna! Mahni inhmangaih na na na chuan mahni duhzawng an tih loh nakah. Mahni tui tihzawng apiang ei leh in a, mawi tihzawng apiang silhfen lei zela inbel hmiah hmiah mai chu mahni inhmangaihte nun a ni chiah mai. Eng hna mah thawk lova leng rawlai mai mai leh awm-awl mai maite hlei hlei hi mahni inhmangaih an inti ngeiin a rinawm. Engkim maiah mahni hma sial thiam hlurte hi inhmangaih inti lo awm tak ang maw? An ngaihtuahnaah mahni tana tha tur, mahni tana hlawkna tur, mahni tana chan thatna tur leh mahni lawmna tithei tluka mahni inhmangaih thiam nun a awm chuang dawn em ni? I lo ti chhar chhar a ni mai thei. “I duh chiah maw?”

Chhiartu duh tak - Ngaihtuah chiang la, ngaihtuah chik tak tak la, ngaihtuah nawn fo rawh le. Tunah khan i duh duh i ei pep pep mai ti raw. I mawi tihzawng apiang hlah tum lova leiin i ha a, i feng a, i inbel zel mai maw? Money i ak teuh va, hausa tak angin i hmang hiau hiau zel bawk em ni? Hna pawh thawk hlei lovin ni tin i awm thei bawk. In in, nangmahni in ngeiah khan i lut zeuh zeuh lekfang em ni le? Tukthuan leh zanriah chu Hotel-ah ei lawi si lovin in inah tho maw i ei zel si a? Zu ruiin in inah i haw fo va, i nu i zah lova, i pa i zah bawk lo vem ni? Tuna i awm dan chiah kha ngun takin inen chiang rawh le. Fanu fapa i nei tawh em? I fate kha an nula tlangval tawh em? E, naupang chhia mai an la ni a, an la ngam lo che a, an la hlau che a ni mai thei. Nge, nupui pasal la nei lovin i la awm em ni zawk? Tuna i awm dan ang chiah khan i fate rawn awm ve sela, rawn nung chho ve sela tha i ti ang em? I duh chiah maw? I nulat lai, i tlangval laia mahni hma siala nu leh pate leh chhungkua, inchhung khur tan engmah i ngaihtuah duh lo ang ngat khan i fate chu rawn nung chho ve turin i duh chiah tak tak maw?

Chhungkaw neinung leh awm thei kan tih, sum leh pai intodelha a tui tui ei thei leh an duhzawng apiang nei thei kan tihte hi tu thawh chhuah ber nge, an hausakna chhan ni ang aw? tia ngaihtuah mai mai chang ka nei fo va. An nu leh an pate zara neinung leh hausa an nih ka ring ringawt a. An fate zara neinung leh hausa tate pawh an awm tho ngei ang. Amaherawhchu, a enga pawh chu an neihnun chhan chu lo ni ta sela, nu leh pate huhang chu a tam ber tho tho ka ring tlat pek zuk nia! Mihring tung chhova piang tawh reng chu anmahni hringtu nu leh pa awm lova lo piang ngawt, lo chawr chhuak tawp tumah kan la hriat ngai loh vang a ni. Engvang pawh chuan lo neinungin, hausain lo awm thei ta viau pawh ni raw sek sek, neih chen ni awm taka tlaran fahrana nun hi chu chhungkaw tin tan a thatna reng reng awmin ka hre ve tlat lo.

Zep tur a awm lo. Zep theih pawh a ni hek lo. Nulat tlangval hun, kan vanglai hun na na na hi chuan kan engthawl em asin. Pawisak nei thiam zawng an awm ngei tak a, pawisak nei hranpa lem lova tal hawr hawr erawh kan tam zawk a nih ber hi. Neinung fate zinga thalai tam takin hna thawk lova hun an hman ral mai mai laiin, mi rethei chhungkaw kara nula tlangval tam tak zingah hnathawh tum lova tei rawlai mai mai hmuh tur an tam tho zuk nia! Chuti chung chuan thalai engthawl, pawisak nei lo fahrana tal mawt mawthote hian mahni tana tha lo leh pawi turin kan khawsa a ni tih reng reng an hre pha lo. Zah nachang an hre bawk hek lo.

Lo thlir reng rawh, ninawm i tih khawp chu i hmu thuai mai ang. En rawh saw - Chu tlangval chu a Bike chuan dan a va hlauhawm lu deuh ve. E, saw nula kekawrtlawn ha chu a va tight teng tawng ve, a sam a la hnawih sen vel lehnghal, hmela belh phetin. A bawp kau kau nen, a zak der lo lehnghal a, a hmel phir pher nen. E he.... saw pawh: Tlangval zu ruiin nula pahnih Bike-in a phur, an tluk palh vaih chuan nu leh pate mawh a va rit dawn ve aw. Khai aw - saw tlangval pahnihte Thirsakawr chuan dan chu an va han dim lo mai mai em ve aw, ka ngei zawng tak an ni mai. Khai khai, saw tlangval lu meh dan saw en teh - a hmel chhiat chhiat nen, a inhmeh lo lulai deuh lo maw? Khai aw - saw Kuva dawra tlangval pathumte saw an mak lutuk, an thial seng em em dawn em ni? an fun puar lian lutuk! Khai a, saw - Khaini a inbarha Kuva a hmawm bakah Cigret a petkawh nghal, hem hem mai a. A mak lu deuh ve a! Pengthuam lun lai tak a ni bawka hmuh tur a va’n tam ve le. Khi-laia thingpui dawra khi nula tlangval an thu teuh mai. A, khi an la luh belh zel lehnghal. Khawia pawisa nge maw an neih bik hlawm le? In lam hna thawh tum loho an nih ngei dawn khi. Khai khai, thlir reng lo ila rilru a hahdam a ni mai. Mizohovin thangthar nun ningin Thasiama a thi, an lo ti pawh hi demawm ka ti nek lo ve. Mahni tana hlawkna leh sawtna awm hlei lovah kan thi thei mai dawn alawm.

Kha kha a ni mai. Tun laia kan nula tlangvalho hian an hma lam hun tur reng reng an ngaihtuah lo, an tal bawrh bawrh a, an che hawr hawr a, hiar takin an khawsa bat bat a ni ber a. Mihring hian mahni tuh rah, nun dan hi a chhia emaw a tha emaw, kan upat lamah a rah kan seng thin tih kan hre chiang theuh. Mahse, mi tin mai hian tuna kan nun dan hi fimkhur a tulzia kan hre fuh thei lo hi a pawi a ni. Chuvang chuan mahni nun dan leh hun hman dan inbih chiang ila. Kan upat huna a rah kan seng tur eng ang nge tih chu kan hmu mai ang.

Lo ngai reng rawh, i la hre dawn khawp. Tun, i thatlai hunah i nung duhdahin i nung tlaran viau vei maw? Sum leh pai, engmah reng reng ren i nei lo chiah maw? I nu leh i pa i zah lovin engah mah i ngai lo ngat em ni? Zuk leh hmuam, ruih theih thil insum lek lo leh pawi ti lo fahranin i ti pap pap zel maw? Hna pawh thawk hlei lovin i tal kual vel mai mai ti raw. In lir-thei neih Bike leh Cycle-te pawh chu nuam tawl nan i lenpui piat piat thei maw? Money i nei thei hlura i duh duh inin i hmawm tawn tawn a, i nu leh i pate rilru hah reng rengin i siam em ni? Pawisak reng nei lova nuam tawl hi hlimna leh lawmna ber niin i hre tak tak em?

Khai le, mahni nun i inen fiah theuh teh ang. Tuna i nun dan kha i unau zawng zawngte nun dan atan i duh chiah em? I inkhawm duh si lo. Kohhran i hnuchhawn ti rawh. Nu leh pa leh khawtlang tan chinawm takin i nung a, i tangkai hlawl lo. I hnawksak zawk hial a nih phei chuan lo ngai reng rawh - nangmah ngeiin a rah i la seng dawn alawm. Vawiina i nun dan tha lo, tlaran tak kha i tar huna a rah i seng tur atan tha i ti dawn em? I fate nun dan atan i duh chiah maw?

A ni thei lo. A pawi lutuk dawn. Piansualna chu sim theih ni lo mah se, nungchang tha lo erawh siam that theih a ni. Tuh rah seng tur tha nei turin tuna nun hi fel tak leh tha taka hman i tum ang aw.