Thursday, April 30, 2009

THANGCHHUAH BEL

by Zara, G.T.I

Chhiat ni, that ni leh puipun nikhua ilova, thingpui lum nan chauhva kan hman thin vai bel lian tawk tak, no zanga aia tlem lo lum theihna, a panga beng pali nei chu kan khua leh kan khaw chhevela khuate chuan ‘Thangchhuah Bel’ tiin kan hre lar hle a. Chu vai bel kan lo neih dan pawh kha thilmak sawi sen loh zinga pakhat a tlin ve avangin thang leh tharte sawichhawn zel atan ka rawn sik hawng dawn a ni.

Thang khat lian kal taah khan ti mai ila, 1986-1987 bawr vel kha ni tain ka hria. Kan khaw tlangval chhuanvawr zinga mi, Thangriruma chu kan khaw tleirawl pahnih tuia tla a char laiin amah a aleh chet sual a, a thih phah ta a. A nakum, a thih chamah chuan amah hriat reng nan tiin a chhungte’n Cup chhuah an tum ta a. Chu Cup chu chhun bel khap 12 a ni a, Thangriruma nau Bible School atanga chhuak hlima chuan ‘Thangriruma Memorial Cup’ tiin hming a puttir a, kan khaw lehkha thiam thenkhatte erawh chuan “Bel an chhuah dawn avangin Thangriruma Memorial Pot tih zawk tur a ni” an ti ve thung a. Mahse, Thangriruma Memorial Cup tiin a pu hlen ta tho a ni. Khua leh tui tana nun chan ngam, tlangval tlawmngai hriatrengna Cup a nih bakah, a hming pawh a sap deuh nialnual avangin khawtlang a deng chhuak chakin mite ngaihven a hlawh ta em em a.

Chutichuan, Thangriruma Memorial Cup foot ball tournament chu favang awllen lai chuhin buatsaih a ni ta a. Khaw hnai leh khaw hla atanga foot ball team 16-te chu group 4-a inthenin an inkhel ta char char a. Hnehna changte chu an haw haw a, a tlawm zawkte erawh mittui tap hnap nen lungchhe van kaiin an hawng ve thung a. Chawlh kar hnih a han vei liam leh meuh chuan final-a intawk tur team hnih chu hai rual lohvin a lo lang ta a ni. Rin leh beisei ang ngeiin kan khaw ‘A’ team leh Khawkelek khua ‘A’ team-te chu, amah Zo Beckham-a dan tekin an inkhuai nuai dawn ta a ni. Chhei raw le!

Apui apangina an nghahhlelh em em Thangriruma Memorial Cup final ni chu a lo thleng ta. Kan khaw field-a entu mipui tlim hmur chu Tualte vanglaia theipui rah tha an sawi ang mai, field hual vela in leh thingahte chuan an bei tak fer fur a. Inkhel turte field chhunga an rawn luh hnuah phei chuan lehlam tantute’n ‘Khawkelek….Khawkelek’ tiin an lo au rual thup thup a. Chutiang bawkin min tantute pawhin ‘Khawkhawkherh …. Khawkhawkherh’ tiin an lo au ve bawk a. A lo rei takah chuan ‘Khaw’ tih kha telh tawh lovin, ‘Kelek ….Kelek’ ‘Khawkherh…..Khawkher’ tiin mahni tan lam theuhte chu auvin an thum mup mup mai a. Chu chu lo fing li nga dan atang pawhin a hriat theih a ni an ti.

Keini khaw hnih hi kum dangah pawh final-a intawk fo, pakhatna leh pahnihna inlak chhawk zak zak thin kha kan ni a. Tun tumah pawh hian khap 12 bel chu put hawn ngei tumin tha tawp leh thiam tawp chhuaha an inkhuainuai avangin mipui mit pawh tlai namen lovin a tlai a. Kan khaw team captain, back fual Tuala phei chu a bawihi’n ‘U Tual… goal khat chuk khat a nia aw’ tia a lo intiam vang nge ni dawn, back-ah a awm ta mek emaw ti ila, lehlam goal hmaah a lo thleng daih a. Chutah a la awm mek emaw ti ila, a laiah a lo tlan lut hman leh a. Tan namen lohvin a tang a ni tih a hriat hle a ni. Chutiang bawkin lehlam team pawh tha thlah miah lova an tan ve avangin tu lamah mah inthun goal lo vin, hun chanve chu a zo ta mai a, hun chanve dang khel leh turin an chawl hahdam rih a.

Chutia an chawlh hlan chuan back fual Tuala chuan a naute chu ko khawmin thu a hrilh ta mawlh mawlh a. Ani hi Township slected-a thlan tlin a lo nih thin tawh avangin kan khaw team captain leh coach nih a fawm a, kan rinchhan em em a ni. Tunah pawh hian team lehlam sa panna lai leh sa chhahna lai nia a hriatte chu kawhhmuhin awm dan tur leh chet dan turte a hrilh a ni tih a rin theih nghal mai awm e.

Hun chanve dang chu an han khel tan leh a. Khawkelek ho lah chu atir aiin an che mawi a, an ball lak leh deh dan pawh a that zawk avangin kan lam goal hmaah chuan fanghmir chaw zawng, kal lam leh haw lam insulpel ang main an zi tak mup mup a. Chutih karah, kan lam hmatlanin ball a chang a, Khawkelek goal lama a han tlanpui zar zar mai chu le!... Tlai khawhnuah ka ngaihtuah let thin a. Khami nia, Thangriruma Memorial Cup final inkhelh kha, tun lai chhana mit tla lek leka kan en thin, Worlk Cup final te, Primier League final te leh Champion Leagure final-te nena khaikhin pawhin a mihring leh a leilung tih loh chu danglamna reng neiin ka hre lo zu nia.

Nu pakhatin “A chumi… savun ham puar pakhat uma patling phar phar tak mai chu!... naupang a chhia nghal loh” a tih ang mai, khaw hnih patling rual savun ham puar uma an inbeihbuaina pawh minute 90 dawn lai a lo ni ve ta. Tu zawkin nge thun lut hmasa ang aw tia mipui thin a phut det det lain back fual Tuala chuan a ball chan chu goal veng pek let tum ang ni siin kan lam goal-ah a’n vai lut pawp mai chu le!..Khawkelek tantute au thawm rinzia chu, khatih lai khan vanpui pawh rawn chim se a hriat tham loh vang tih tur hi a ni. Chutih karah ‘Engtiziaa mahni lama thun lut ta nge maw a nih le”tia thenkhat an phun sep sep laiin, ring fahrana “Tuala… chuk ni lovin kuk a ni zawk tawh ang…kuk” tia au ri chuan thenkhatte a lo tihlim ve bawk a.

Lai an han thai a. Rei vak lovah kan khaw goal hmaah chuan an zi leh ta mup mup a. Tawkfangah chuan back fual Tuala bawk chuan ball chu a chang leh a, a ball chhan chu a thiante a pe mai dawn emaw kan tih lain kan lam goal-ah bawk a pet lut leh pek a. Min tantute beidawng au thawm leh lehlam tantute hlim lawm au thawm inhmeh loh zia chu, ruang men zana in chhung lama tap ri leh pawn lama nui ri a inhmeh lo ang chiah kha a ni. Chu nak-a-laiin amah back fual Tuala lah chu field laiah a rulpui lu din thul, a dai-bi-ling vei thul a. Hril a hai duh teh asin.

Lai an han thai leh a. Engtizia nge maw ni.. Khawkelek hma tlan pakhat chuan ball chu a tlanpui nal nal a, an lam goal-ah a’n thun luh hmiah mai chu!...mipui mak ti leh a ngaihna hre lo chu an chiau tak teng tung hlawm a. Hmanhmawh bak lengin lai chu an han thai leh a. Khawkelek lamin an hmahni goal-ah bawk thun luh an tum mek lain, back fual Tuala’n “ Naute u…i tang ang u” tiin a han au va. Chuveleh, kan khaw player ho chu goal veng nalamin Khawkelek goal hmaah an chim phei ta huk a. Khawkelek hovin anmahni lamah thun luh phet an tum laiin kan player ho lah chuan thun lut thei lo turin an lo dang ve vat vat bawk a. Khawvel a buai zo ta. Hun a han zawh meuh chuan goal 2, goal 1-in kan tlawm ta a ni.

A zanah chuan lal leh upate’n public meeting meuh kovin back fual Tuala chu thu an zawt ta a. Amah, back fual Tuala lah chuan, “ A ni khawp mai…atira lawman an siam kha bel pakhat chauh kha a ni a, a hnuah khaw hnai, khaw hlaa an chhungkhat laina rawh phur tharte’n a cheng zawngin lawman pahnihna an rawn siam leh a, an belh an belh ta mai bawk si a. Half-time chawlha an puanah khan cheng sangnga lai a tling hman tawh a, chu chu khap 12 man deuhthaw a ni. Inuan thu lovah, belte chu kan neih zawng tak alawm, a pawisain dawng zawk ila, tichuan, buh zai leh thingai lain kan intuak bawk ang a, Sanmyo-a ka pu Khuangliankhamate belpui ang saw kan lei zawk dawn nia ka ti a, kan naute chek ngeih zawng tak a lo ni a, lungrual takin kan amen ta dial a ni. Chutichuan,Khawkelek ho min tlawm ai chuan tiin mahni kan intlawm ta zawk a ni e” tiin a han chhang dap dap a. Chu chuan paho a tilungawi a, nuho a tilawm a, thalaiho a tiphur bawk a, in chhung kil khat melha thu tum hmuk, back fual Tuala kuk tuma meeting zawh nghak rani pawh a tinui sen sen ve ta ni. Back fual Tuala pawn kuk ni lovin chuk a hlawh ve leh ngei ang le.

Kum a lo thar a, Vau thla a lo det meuh chuan kan nghahhlelh em em bel thar hmel chu kan hmu ve ta a ni. Paho intiremhriain bel hming tur an han ngaihtuah nak nak hlawm a. ‘Thangriruma hriatrengna’ han tih mawl tut lah ni theiin an hre si lo, tuk pumin an inhnial laih laih a. Chutih lai tak chuan, Seipui khaw chhuak, veng mawng hmeithai te hi a lo chho dan dan a, thil awmzia a hriat chuan, “Che!…patling chaw ei hun theihnghilh phunga ngaihtuah nan a va tlak lo et… thang kan chhuahpui alawm, Thangchhuah bel i ti men ang un” a rawn ti ta roh va.

Chutichuan, chhiat ni, that ni leh puipun nikhua ilova, thingpui lum nan chauhva kan hman thin vai bel lian tawk tak, no zanga aia tlem lo lum theihna, a panga beng pali nei chu kan khua leh kan khaw chhehvela khuate chuan Thangchhuah bel tiin an hre lar hlen ta a ni..

Post a Comment

Grab this Widget ~ Blogger Accessories